Da Mme Magazine Nnyịn Nam N̄kpọ ke Mfọnn̄kan Usụn̄
1 Ke ini asan̄ade ekpere itie unyam n̄wedmbụk n̄kpọntịbe, nso ke afo esikụt? Mme magazine. Ke odude ye anyam n̄wedmbụk n̄kpọntịbe, nso isidụri ntịn̄enyịn fo? Mme magazine. Mme owo, n̄kpri ye ikpọ, ke ẹtọn̄ọ ndikot mme magazine. Ererimbot enyene udọn̄ ke mme magazine.
2 Nte nnyịn imekeme ndinam mme owo oro ẹnyenede esịt akpanikọ ẹnyene udọn̄ ke Enyọn̄-Ukpeme ye Awake!? Ih, edieke NNYỊN inyenede udọn̄ ke Enyọn̄-Ukpeme ye Awake! Nso ikeme ndin̄wam nnyịn? Kere ban̄a mme ekikere ẹmi:
◼ Kot Mme Magazine: Esenyịn kiet emi asan̄ade-san̄a ama ọtọt ete ke asuanetop 1 kpọt ke otu 3 ke circuit imọ esikot nsiondi Enyọn̄-Ukpeme ye Awake! kiet kiet okụre. Nte afo emesikot? Nte afo okotde ibuotikọ kiet kiet, bụp idemfo ete, ‘Anie edima ntọt emi—eka eyen, anam mbubehe, uyen?’ Ke ọkpọkpọ okwommọ, dụri udịm ke akpan n̄kpọ kiet m̀mê iba oro afo ekemede ndikama ke ini ọnọde magazine oro. Ekem kere nte ekemede ndidemede udọn̄ ke ibuotikọ oro ke ikọ kiet m̀mê iba kpọt.
◼ Nyene Akpan Ibat Magazine Oro Esibọde: Nyene iwụk ke akpan ibat nsiondi kiet kiet oro oyomde eyenete oro akamade magazine esinọ fi. Ke ndinam ntem, afo ye ubon fo ẹyenyene mme magazine oro ẹkemde kpukpru ini. Akpan ibat oro ekpenyene ndisịne mme magazine Ikọmbakara ọkọrọ ye mme magazine ke mme usem eken ẹmi mme owo ẹsemde ke efakutom mbufo.
◼ Nam Ndutịm nọ Usen Magazine Ofụri Ini: Ediwak esop ẹmek usen kiet ẹnịm san̄asan̄a ẹnọ edida mme magazine nnọ ikọ ntiense. Nte afo emekeme ndinọ Usen Magazine esop ibetedem? Edieke mûkemeke, domo ndida ndusụk ini an̄wautom ke ini ke ini nda mme magazine nnọ ikọ ntiense ke efak nnyụn̄ nsuan mme magazine ke idemfo, to ke enyịnusụn̄ sịm enyịnusụn̄ ye ke mme afan̄ magazine.
◼ Nyene Udọn̄ ke “Enyọn̄-Ukpeme” ye “Awake!”: Kama mme magazine ke ini akade isan̄ m̀mê akade ndidep n̄kpọ. Nọ mmọ ke ini enemede nneme ye mme nsan̄autom, mme mbọhọidụn̄, mme nsan̄a ufọkn̄wed, m̀mê mme andikpep. Ebe ye n̄wan oro ẹsiwakde ndika isan̄ ke ubomofụm ẹsida akpan n̄kpọ kiet ke kiet ke otu mme magazine eke ndondo emi nditọn̄ọ nneme ye akaisan̄ oro etiede adiana mmọ. Mmọ ẹsinyene ediwak inem inem ifiọkutom. Ndusụk uyen ẹsikama mme ibuotikọ oro mmọ ẹkerede ke ẹyedemede udọn̄ mme andikpep m̀mê eke ekemmọ nditọ ufọkn̄wed ẹka ufọkn̄wed ofụri ini. Kama ndusụk mmọ ke ini afo akade utom, nyụn̄ kpọn̄ mmọ nọ mbonurua fo ke ini okụrede mbubehe fo. Ediwak nnyịn imesidep aranuwat kpukpru ini; ntak emi mûnọhọ anyam aranuwat oro mme magazine? Nịm mmọ ke ebiet ẹkemede ndisọp n̄kụt ke ini mme iman ẹdide ndise fi, ke ini odụkde n̄kpọ isan̄ ofụri owo, m̀mê ke ini adade ebet ini oro ẹkenịmde. Nte afo emekeme ndikere mban̄a mme idaha efen oro ẹdotde?
◼ Tịm Ibio Ibio Nneme Edinọ Magazine: Diomi nditịn̄ esisịt ikọ kpọt, edi tịm tịn̄. Sịn ufiop. Tịn̄ ikọ oro otụkde esịt. Tịn̄ akpan n̄kpọ. Sio ekikere kiet ke ibuotikọ kiet, tịn̄ enye ke mme ikọ ifan̄, nyụn̄ nọ mme magazine. Usụn̄ nneme oro ọfọnde akan edi ndidemede mbụme mban̄a n̄kpọ oro omụmde owo udọn̄ ndien ekem owụt ibuotikọ oro ọnọde ibọrọ oro ọkọn̄ọde ke N̄wed Abasi. Kere ban̄a uwụtn̄kpọ ifan̄ ke nte ẹkemede ndinam emi:
3 Edieke afo owụtde ibuotikọ oro aban̄ade ubiatibet oro ọkọride-kọri, afo emekeme ndibụp ete:
◼ “Nso ke oyom ẹnam man nnyịn ikeme ndide idap ke okoneyo ye unana ndịk kaban̄a ubiatibet?” Enyeneufọk ekeme ndinyene etikwo etikwo ekikere mban̄a mme n̄kpọ ndikabade mfọn n̄kan. Afo emekeme ndibọrọ ete ke ediwak owo ẹnyene ukem ekikere oro onyụn̄ adian ete ke afo emenyene ntọt oro afo onịmde ke akpanikọ ke eyenyene ufọn ọnọ enye. Ekem wụt n̄kpọ oro odotde ke ibuotikọ oro.
4 Ke ini ọnọde ibuotikọ oro aban̄ade uwem ubon, afo emekeme ndidọhọ ete:
◼ “Ediwak owo ẹkụt nte edide n̄kpọ-ata ndinyene se ẹdade ẹdu uwem nnyụn̄ mbọk ubon mfịn. Ẹwet ediwak n̄wed ẹban̄a n̄kpọ emi, edi idem mbon oro ẹdide nta inyịmeke ye mme usọbọ oro ẹnọde ke mme mfịna nnyịn. Nte odu ebiet ekededi oro nnyịn ikemede ndika n̄kọbọ ndausụn̄ oro ẹkemede ndiberi edem?” Ekem wụt akpan utịn̄ikọ kiet ke magazine oro owụtde ọniọn̄ oro ẹkụtde ke Bible.
5 Afo emekeme ndida usụn̄ edisobo ye owo enyeemi ke ini owụtde ibuotikọ oro aban̄ade mfịna n̄kaowo:
◼ “Ata ediwak owo mfịn ẹdu ke mfịghe. Akananam Abasi iduakke ite nnyịn idu uwem ke utọ usụn̄ emi.” Ekem wụt nte n̄kpọ ẹsiode ẹto Bible emi odude ke ibuotikọ oro ekemede ndin̄wam nnyịn ndiyọ mme mfịna uwem idahaemi onyụn̄ ọnọde idotenyịn kaban̄a nsinsi usọbọ ke ini iso.
6 Unọ Ikọ Ntiense Efak Enyene Uforo: Ekedi ke nsiondi Informant (Utom Obio Ubọn̄ Nnyịn) eke January 1940 ke ẹkesịn udọn̄ ẹnọ mme asuanetop ke akpa ini ndisio akpan usen kiet kpukpru urua nnịm nnọ edida mme magazine nnọ ikọ ntiense ke efak. Nte afo emesibuana ke edinọ ikọ ntiense ke efak ke ini ke ini? Edieke esibuanade, nte usụn̄ oro afo esinamde enen̄ede enyene uforo? Ẹsikụt ndusụk asuanetop ẹdade ke inụk efak oro owo ẹwakde, ẹnemede nneme ye kiet eken ke adan̄aemi ediwak owo ẹbede edi mmọ ikwe. Utu ke ndikama mme magazine nda ndiana owo enye eken, se inyenede uforo ikan edi ndibahade nda nnyụn̄ nsan̄a n̄kpere mme owo. Isenowo ẹkeme ndituak nda nnyụn̄ nnọ esisịt n̄kpan̄utọn̄ edieke edide owo kiet kpọt asan̄a ekpere mmọ, edi ibat ibat owo kpọt ẹdikeme ndisan̄a n̄kpere otuowo oro ẹnemede nneme. Sia nnyịn isidụride ntịn̄enyịn ediwak owo ke efak, enen̄ede oyom ikama idem nte ọfọnde inyụn̄ isịne n̄kpọ oro owụtde iso o-bụt nte odotde ye mme asan̄autom Abasi.—1 Tim. 2:9, 10.
7 Mme Afan̄ Magazine: Mbon oro ẹnyenede afan̄ magazine ẹsinịm ediwak magazine kpa ye oro ẹsikụrede efakutom ndien ndien. Mme afan̄ magazine ẹdi ata nti ntọn̄ọ edinịm ukpepn̄kpọ Bible.
8 Ke ini afo anamde mfiakn̄ka ndien ndien man ọkọnọ mme magazine, afo eyekụt ete ke ufiop ufiop ye ufan ufan itie ebuana fo ye enyeneufọk eyekọri. Nte mbufo ẹkabarede ẹmehe ọfọn akan, ntre ke edinen̄ede edi mmemmem ndineme mban̄a mme ibuotikọ N̄wed Abasi. Emi ekeme ndida n̄kosịm editọn̄ọ ukpepn̄kpọ Bible oro on̄wụmde mfri. Ke mme mfiakn̄ka oro ẹnen̄erede ẹwụt esịtekọm ke mme magazine, nọ editobo. Nyụn̄ ti ete, ini kiet kiet oro afo osobode ye enyeneufọk afo emekeme ndibat mfiakn̄ka kiet.
9 Eyenete an̄wan kiet ama esida mme magazine ọsọk n̄wan kiet oro ekesibọde mmọ kpukpru ini edi ọdọhọde ete: “Nnịmke se afo etịn̄de ọnọ mi.” Ke mfiakn̄ka efen, eyenete an̄wan emi ama okụt ebe an̄wan oro ke ufọk. Ke ẹma ẹkekụre ufan ufan nneme, ẹma ẹnam ndutịm nditọn̄ọ ukpepn̄kpọ Bible. Eyenete an̄wan emi ama anam ufan ye nditọ iren ita oro ẹketienede ẹbuana ke ukpepn̄kpọ oro. Ke akpatre, eka ye nditọiren esie ẹma ẹyak uwem mmọ ẹnọ Jehovah ẹnyụn̄ ẹna baptism. Idahaemi, owo 35 ke ubon oro ẹbọ akpanikọ. Kpukpru emi edi koro eyenete an̄wan oro ama esifiak aka afan̄ magazine esie!
10 Ediwak usụn̄ ẹdu nditọn̄ọ mme afan̄ magazine. Afo emekeme nditọn̄ọ afan̄ ebe n̄kukụre ke ndinyene n̄wetnnịm n̄kpọ nnọ mme magazine oro onịmde nnyụn̄ nnam ndutịm ndifiak n̄ka kpukpru urua iba akamade mme nsiondi eke ndondo emi. Usụn̄ kiet edi ndida etop oro odude ke idak ibuotikọ oro “Ke Nsiondi Nnyịn Efen.” Ke ini afiakde aka, dọhọ enyeneufọk ke imọ imenyene ibuotikọ oro imọ iketịn̄de iban̄a isan̄ oko. Mîdịghe, ke ini afiakde aka, afo emekeme ndidọhọ: “Ke ini n̄kokotde ibuotikọ emi, mma n̄kere ke ekeme ndidi afo eyema enye . . . ” Ekem tịn̄ ikọ ifan̄ aban̄ade ibuotikọ oro nyụn̄ yak enye nọ. Ke ama okokụre ediwaha oro, wet n̄kpri n̄kpọ ition ke n̄wetnnịm n̄kpọ eke ufọk ke ufọk fo: (1) enyịn̄ enyeneufọk, (2) adres enyeneufọk, (3) usenọfiọn̄ akade ekese, (4) nsiondi okonịmde, ye (5) ibuotikọ oro okowụtde. Ndusụk asuanetop ẹsinen̄ede ẹkụt unen ke nditọn̄ọ mme afan̄ magazine, tutu ẹnyene n̄kpọ nte mfiakn̄ka 40 efen ke n̄wed mmọ!
11 Efakutom Mbubehe: Mme asuanetop oro ẹsinamde utom ke efakutom mbubehe ẹsinịm ediwak magazine. Nte akanam omodomo ndinam utom to ke ufọkurua sịm ufọkurua ese? Ntọt owụt ete ke ndusụk esop, ibat ibat owo ẹsibuana ke ikpehe utom enyeemi. Ke akpa ini, ndusụk owo ẹsikop ndịk ndisobo ye mme anam mbubehe, edi ke mmọ ẹma ẹkedomo n̄kpọ nte ikafan̄ ẹse, mmọ ẹsikụt nte enye enemde onyụn̄ enyenede utịp. Ntak mûdọhọke asuanetop oro enyenede ifiọk m̀mê asiakusụn̄ an̄wam fi man ọtọn̄ọ?
12 Ediwak ufọn ẹdu ke ndinam utom to ke ufọkurua sịm ufọkurua. Ibat ibat ufọk oro owo mîdụhe ẹsidu, ke nsụhọde n̄kaha ke mme ini mbubehe! Mme anam mbubehe ẹsiwak nditie ufan ufan, idem ọkpọkọm mmọ inen̄ekede inyene udọn̄ ke Bible. Babak tọn̄ọ; ekeme ndidi ẹyenen̄ede ẹdara fi. Ke ama eketịn̄ owo emi afo edide, afo emekeme ndidọhọ ke imọ isiwakke ndikụt mme anam mbubehe ke ufọk, nte ke imọ iwaha itieutom mmọ ndisobo ye mmọ ke esisịt ini man inọ mmọ mme nsiondi Enyọn̄-Ukpeme ye Awake! eke ndondo emi. Dọhọ ete ke ediwak mme anam mbubehe ẹsima mme magazine nnyịn koro oyomde mmọ ẹfiọk se itịbede ke ererimbot idahaemi edi mmọ ẹsinyene esisịt ini ndikot n̄wed. Mme magazine ẹnọ mme ntọt oro ẹdemerede owo ekikere ke obufa usụn̄, ye unana udu kaban̄a ido ukpono, mbre ukara, m̀mê unyamurua. Ẹkeme nditọn̄ọ afan̄ magazine ye mme owo oro ẹnyenede udọn̄ ẹmi ẹkụtde ke efakutom mbubehe.
13 Ẹtịm Idem nte Ubon: Ẹmekeme ndisio ndusụk ini nnịm ke ini ukpepn̄kpọ ubon mbufo ndineme m̀mê ewe ibuotikọ ke mme nsiondi eke ndondo emi ẹkpedot ndikama ke efakutom mbufo. Mme andibuana ke ubon—esịnede nditọwọn̄—ẹkeme ndinam nneme n̄wụt ke adiana ke adiana ẹnyụn̄ ẹbọrọ mme ọsọ mfan̄a oro ẹsidemerede, utọ nte: “Nnam n̄kpọ,” “Nnyịn imenyene ido ukpono nnyịn,” m̀mê “Nnyeneke udọn̄.” Edidianakiet ke eti usụn̄ ekeme ndinam ofụri ubon ekeme ndinyene ebuana ofụri ini ke ndisuan mme magazine.
14 Mme Ada Ukpepn̄kpọ N̄wedesop Ẹkeme Ndin̄wam: Ini ekededi oro ọfọnde, ẹdiomi mme mbono an̄wautom Usen Magazine ke mme itie ukpepn̄kpọ n̄wedesop utu ke ndinam ofụri esop ẹboho ke Ufọkmbono Obio Ubọn̄. Mbon oro ẹnyenede ndinịm mme mbono an̄wautom ẹkpenyene nditịm idem ọfọn ẹnyenede mme akpan ekikere ndinọ otu oro. Ẹmi ẹkeme ndisịne nneme oro ẹnamde ẹwụt ye akpan n̄kpọ kiet m̀mê iba ke nsiondi eke ndondo emi oro ẹkemede ndikama ke ndidemede owo udọn̄ ke n̄kann̄kụk. Mme mbono an̄wautom—esịnede edidian mme owo—ẹkpenyene ndidi ibio ibio, ibịghike ikan minit 10 osịm 15. Mme ada ukpepn̄kpọ ẹkpenyene ndikụt nte ke efakutom oro ekemde ẹdu man ẹnam otu oro ẹnam utom ke ofụri ini an̄wautom oro. Ndien ẹkeme ndibọn̄ akam mbemiso m̀mê ke ẹma ẹkekụre ndidian mme asuanetop ndisan̄a ye kiet eken.
15 Wụt Esịtekọm Ban̄a Mme Magazine: Ibuotikọ oro “Ndida Enyọn̄-Ukpeme ye Awake! Nnam N̄kpọ ke Eti Usụn̄” oro ẹkemịn̄de ke nsiondi Utom Obio Ubọn̄ Nnyịn eke July 1993, ama etịn̄ akpan n̄kpọ emi: “Enyọn̄-Ukpeme ye Awake! itreke ndinyene ufọn, idem ọkpọkọm owo ikonịmke kpukpru mmọ ke ufan̄ ọfiọn̄ kiet m̀mê iba eke usenọfiọn̄ nsiondi mmọ. Ntọt oro mmọ ẹkamade isụhọkede nte ini ebede . . . Ndiyak n̄kani magazine mbon ye unana edida mmọ nnam n̄kpọ owụt unana ediwụt esịtekọm nnọ mme n̄kpọutom oro ẹnyenede ufọn mi. . . . Utu ke ndikpọnọde n̄kani nsiondi nnịm nnyụn̄ mfre enyịn mban̄a mmọ, nte ikpọfọnke ikan ndisịn san̄asan̄a ukeme ndiyak mmọ nnọ mbon oro ẹnyenede udọn̄?”
16 Mfịn ediwak mbon esịt akpanikọ ẹdu ẹmi ẹyomde akpanikọ. Ntọt odude ke magazine kiet ekeme ndidi kpa se mmọ ẹyomde man anam ẹfiọk akpanikọ! Jehovah ọmọnọ nnyịn etop oro aduaide owo idem nditan̄a, ndien mme magazine nnyịn ẹnyene akpan udeme ke ndida etop emi nsọk mbon efen. Nte afo eyenen̄ede enyene udọn̄ ke ndisuan mme magazine ke ini iso? Nte afo eyeda ndusụk ekikere emi anam n̄kpọ ke utịturua emi? Afo eyebọ ekese edidiọn̄ edieke anamde.
Nti Ekikere:
◼ Bemiso kot mme magazine, nyụn̄ mehe ye mme ibuotikọ.
◼ Mek ibuotikọ oro otụkde n̄kpọ oro ebehede kpukpru owo ke obio mbufo.
◼ Tịm nneme oro edifọnde ye nsio nsio owo, edide irenowo, iban, m̀mê mme uyen. Wụt nte magazine oro otụkde enyeneufọk ye nte ofụri ubon edibọde ufọn oto enye.
◼ Diomi ndibuana ke utom an̄wautom fo ke ini ata ediwak owo ẹdude ke ufọk. Ndusụk esop ẹnam ndutịm ẹnọ edida mme magazine nnọ ikọ ntiense mbubịteyo.
◼ Nam nneme fo edi ibio ibio nyụn̄ tịn̄ akpan n̄kpọ.
◼ Kûtịn̄ ikọ usọp inua ukaha. Edieke owo emi etịn̄de ikọ ọnọ mînyeneke udọn̄, ndisọsọp inua ntịn̄ ikọ idin̄wamke. Domo ndimụm idem n̄kama, nyụn̄ nọ enyeneufọk ifet nditịn̄ ikọ.
◼ Nyene mme magazine usem en̄wen man ọnọ mme owo oro ẹkemede ndiyom mmọ.
Ndinọ Mme Magazine ke Ufọk ke Ufọk:
◼ Tuak inua imam ufan ufan nyụn̄ tịn̄ ikọ ke uyo oro owụtde mfọnido.
◼ Nyene nduaidem ban̄a mme magazine.
◼ Tịn̄ ikọ sụn̄sụn̄ nyụn̄ tịn̄ an̄wan̄a.
◼ Neme ban̄a n̄kpọ kiet kpọt; demede udọn̄ ibio ibio, nyụn̄ wụt enyeneufọk ufọn esie.
◼ Wụt ibuotikọ kiet kpọt.
◼ Wụt magazine kiet kpọt, nọ mbon eken nte nsan̄a.
◼ Yak mme magazine dọn̄ enyeneufọk ke ubọk.
◼ Nam enyeneufọk ọfiọk ke amaduak ndifiak n̄waha.
◼ Tre nneme ke ufan ufan ye in̄wan̄în̄wan̄ edu edieke ẹsịnde ndibọ mme magazine.
◼ Wet n̄kpọ ke n̄wetnnịm n̄kpọ eke ufọk ke ufọk ban̄a kpukpru udọn̄ oro ẹkewụtde ye se okonịmde.
Mme Ifet Ndinịm Mme Magazine:
◼ Edinọ ikọ ntiense eke ufọk ke ufọk
◼ Edinọ ikọ ntiense efak
◼ Utom eke ufọkurua ke ufọkurua
◼ Mme afan̄ magazine
◼ Edinọ ikọ ntiense mbubịteyo
◼ Ke ini anamde mme mfiakn̄ka
◼ Ke ini akade ndise n̄kani nditọ ukpepn̄kpọ Bible
◼ Ke ini akade isan̄, akade ndidep n̄kpọ
◼ Ke ini enemede nneme ye mme iman, mme nsan̄autom, mme mbọhọidụn̄, mme nsan̄a ufọkn̄wed, mme andikpep
◼ Ke n̄kpọisan̄ ofụri owo, ke ubet emi mme akaisan̄ ẹtiede ẹbet n̄kpọisan̄