N̄wam Mmọ Efen Ẹbọ Ufọn
1 Jehovah ọn̄wọn̄ọ ndikpep nnyịn mme n̄kpọ oro oyomde nnyịn ifiọk. Enye ọsọn̄ọ ọnọ nnyịn ke Psalm 32:8 ete: “Nyeteme fi, nnyụn̄ n̄wụt fi usụn̄ eke afo edisan̄ade: nyeteme fi, nyetịn̄ fi enyịn mi ke idem.” Un̄wọn̄ọ emi enyene akamba ufọn ọnọ nnyịn. Ye unana ibụk, nnyịn iyom ndiwụt mmọ efen nte mmọ ẹkemede ndida ufọn nsọk idemmọ ebe ke ndida item ọniọn̄ otode Bible nsịn ke edinam. (Isa. 48:17) Ke September nnyịn imekeme ndinam emi ebe ke ndinọ n̄wed Ndidu Uwem ke Nsinsi. Ke nneme nnyịn, nsio nsio usụn̄ ẹdu emi nnyịn ikemede ndiwụt ataata ufọn oro Bible enyenede.
2 Ke ntak mme mfịna ndọ ẹwakde mfịn, afo emekeme ndimek ndineme ekikere emi ke n̄wed “Ndidu Uwem ke Nsinsi”:
◼ “Ata ediwak owo oro nnyenede nneme ẹnen̄ede ẹkere ẹban̄a akwa n̄kọri eke unana inemesịt ke ndọ ye usiondọ. Afo ekere didie aban̄a mfịna emi? [Bet ibọrọ.] Ediwak owo ẹkpu ndifiọk se idide mme akpan ntak. Edieke mmọ ẹsịnde ofụri ukeme, mme ọdọ ndọ idikpanke ndọ mmọ ndibiara kpọt edi mmọ ẹkeme ndinyene ata inemesịt n̄ko. Ukpọhọde edikụt unen edi ndida mme item oro ẹkụtde ke Bible nsịn ke edinam.” Kot N̄wed Mbon Ephesus 5:28, 29, 33. Kụbọde ka page 243, neme ikpehe ekikere 16 ye 17, ndien ekem nọ n̄wed.
3 Nditọwọn̄ ẹyom ini oro ekemde ye ukpep ẹto mme ete ye eka mmọ. Ke ọnọde n̄wed “Ndidu Uwem ke Nsinsi,” afo emekeme ndidọhọ:
◼ “Kpukpru nnyịn imekere iban̄a mfọnọn̄kpọ ini iso n̄kpri owo nnyịn. Ke ekikere fo, nso idi mfọnn̄kan usụn̄ oro mme ete ye eka ẹkemede ndin̄wam nditọ mmọ ẹkụt ini iso oro enyenede ifụre? [Bet ibọrọ.] Kpan̄ utọn̄ ke item otode n̄ke Bible emi ẹkewetde n̄kpọ nte isua 3,000 ẹmi ẹkebede. [Kot Mme N̄ke 22:6.] Ke adan̄aemi nditọ nnyịn ẹkemede ndibọ ufọn akamba akamba nto mme item ẹmi mmọ ẹbọde ke ufọkn̄wed, mmọ ẹbọ ukpep oro ẹnyenede ufọn akan ẹto mme ete ye eka mmọ ke ufọk. Oyom ini, ntịn̄enyịn, ye ima, edi enye enen̄ede odot ye ukeme oro ẹsịnde.” Kụbọde ka page 245, neme ikpehe ekikere 20 ye 21, ndien ekem nam an̄wan̄a nte ẹkemede ndikama n̄wed emi nte n̄kpọ ukpep Bible ke ubon.
4 Ekeme ndidi afo eyema ndinọ n̄wed “Ndidu Uwem ke Nsinsi” ke ndiwụt nte isọn̄ edikabarede edi paradise:
◼ “Mmonịm ke akpanikọ nte ke afo emekere aban̄a nte uwem editiede ke ini iso. Ke Akam Ọbọn̄, Jesus ama ekpep nnyịn ndibọn̄ akam mben̄e ẹnam uduak Abasi ke isọn̄ nte ẹnamde ke heaven. Isọn̄ editie didie ke ini oro adade itie? [Bet ibọrọ.] Se ndise owụtde nte ererimbot paradise editiede mi. [Wụt ndise oro odude ke page 12 ye 13. Ekem kot Isaiah 11:6-9, emi esịnede ke ikpehe ekikere 12.] Nte ididịghe utịben̄kpọ ndidụn̄ ke utọ ererimbot oro? N̄wed emi eyewụt fi nte afo ye ubon fo ẹkemede ndidụn̄ ke paradise oro etiede ntem.”
5 Ndibem iso ntịm nneme fo edi akpan n̄kpọ ke ndibiere unen oro afo edinyenede ke enyịnusụn̄. Mbemiso ọkọn̄de usụn̄, kụt ete ke imenyene akpan n̄kpọ nditịn̄ mban̄a ekikere N̄wed Abasi. N̄ko, nyene ibio ibio utịn̄ikọ ke ekikere ban̄a ikpehe oro omụmde owo udọn̄ ke magazine m̀mê tract oro afo aduakde ndinọ edieke owo mîbọhọ n̄wed. Da kpukpru ifet oro afo enyenede nditọ n̄kpasịp akpanikọ Obio Ubọn̄ ke September. (Eccl. 11:6) Afo eyen̄wam mbon efen ndidọk mme ufọn oro ẹdibịghide ke nsinsi.