Fiak Tiene Kpukpru Udọn̄ Oro Ẹkewụtde Man Mbon En̄wen Ẹbọ Ufọn
1 Nso idi akpan n̄kpọ oro esinamde owo ọbọ n̄wed nnyịn? Udọn̄! Ukem oro ke edi ke ini edide edisịm edinam mme mfiakn̄ka. Ini ekededi oro owo owụtde ekpededi ekpri udọn̄ ke etop Obio Ubọn̄, nnyịn iyom ndinam se ededi oro nnyịn ikemede man owo oro ọbọ ufọn. Ntre nnyịn inam mme mfiakn̄ka ye uduak edinam udọn̄ owo oro ọkọri nnyụn̄ ntọn̄ọ ukpepn̄kpọ Bible. Emi edi utịtmbuba nnyịn idem ke ini nnyịn mînịmke n̄wed. Didie ke ekeme ndinam emi?
2 Edieke nneme fo isan̄ oko akaban̄ade mme mfịna ndọ oro ẹwakde mfịn afo okonyụn̄ ọnọde n̄wed “Ndidu Uwem ke Nsinsi,” afo emekeme nditọn̄ọ nneme fo ke usụn̄ emi:
◼ “Isan̄ oko n̄kedide mi, nnyịn ima ineme iban̄a ndọ ye nti item ẹmi Bible ọnọde oro ẹkemede ndin̄wam nnyịn ndinyene n̄kponn̄kan inemesịt. Nte idịghe akpanikọ nte ke idem ke mme ubon oro ẹfọnde ẹkan, mme mfịna ẹsidemede ke ini ke ini? [Bet ibọrọ.] Bible ọnọ nnyịn mfọnn̄kan item oro ẹkemde ndin̄wam nnyịn ndikọk mme mfịna ke itie ebuana ubon. Ubon ekeme ndibọ edidiọn̄ ebe ke ndikpep Bible ọtọkiet.” Kụbọde ka page 246, nyụn̄ neme ikpehe ekikere 23. Kot John 17:3, nyụn̄ dọhọ ke iyen̄wam ubon oro ọtọn̄ọ ndikpep Bible ke ufọk.
3 Edieke afo ekenemede aban̄a nditọ ye ediyom oro oyomde ẹnọ mmọ ukpep, afo emekeme ndikaiso ke nneme emi ke usụn̄ emi:
◼ “Isan̄ oko nnyịn ima ineme iban̄a ukpep eke spirit oro nditọ ẹyomde ye nte mme ete ye eka ẹkemede ndin̄wam mmọ. Ata ediwak ete ye eka oro n̄kenyenede nneme ẹma ẹdu ke n̄kpaidem ẹban̄a idiọk eduuwem ata ediwak uyen mfịn. Nso ke afo ekere aban̄a oro . . . ? [Tịn̄ ban̄a uwụtn̄kpọ idiọkido uyen oro ẹsiwakde ndikụt ke n̄kann̄kụk mbufo. Bet ibọrọ.] Yak n̄wụt fi ndusụk nti item oro ẹnọde ke Bible.” Kụbọde ka ikpehe ekikere 22 ke page 246 ke n̄wed Ndidu Uwem ke Nsinsi, neme akpan n̄kpọ, nyụn̄ kot Ephesus 6:4. Wụt ete ke ata ediwak nditọwọn̄ ẹnen̄ede ẹyom ntụnọ ye ndausụn̄. Ke ini mme ete ye eka ẹtịn̄de enyịn ke ndinọ oro, nditọ ẹsinen̄ede ẹkop inemesịt ẹnyụn̄ ẹtie ata ukpono ukpono ke eduuwem mmọ. Nam an̄wan̄a nte nnyịn isikpepde Bible ye nditọ nnyịn.
4 Edieke ibuot nneme fo akaban̄ade Paradise isọn̄, do afo emekeme nditịn̄ emi ndifiak ndemede udọn̄:
◼ “Nnyịn ima ise ndusụk ndise ke n̄wed emi oro ẹkewụtde nnyịn nte isọn̄ editiede ke ini Abasi edinamde enye akabade edi paradise. Enye idinen̄ekede inem edieke nnyịn mîdikemeke ndidara enye ye mbonima nnyịn. Nte afo unyịmeke ntre?” Bet ibọrọ. Ekem kụbọde ka page 162 ke n̄wed Ndidu Uwem ke Nsinsi. Kot Ediyarade 21:3, 4, nyụn̄ nam an̄wan̄a nte mbonima nnyịn ẹdidude ye nnyịn kpukpru ini. Edieke ẹnen̄erede ẹwụt udọn̄, kot John 5:28, 29 ndiwụt nte ke mme akpan̄kpa ẹyefiak ẹdidu uwem. Wụt ikpaedem n̄wed emi nyụn̄ dọhọ ete: “Enen̄ede edi akpanikọ—nnyịn imekeme ndidu uwem ke nsinsi ke Paradise ke isọn̄!” Diomi mfiakn̄ka efen man ekpeneme ntak emi nnyịn ifiọkde ite ke enye ekpere.
5 Akpan uduak mfiakn̄ka edi man in̄wam mbon oro ẹnyenede udọn̄ ẹbọ ufọn ẹto etop Obio Ubọn̄. Ata ediwak owo ẹyom n̄kpọ oro edidemede udọn̄ mmọ ọnọ n̄kpọ eke spirit. Dụri ntịn̄enyịn mmọ ka akpan n̄kpọ oro enyenede ataata ufọn ke n̄wed emi, ọsọn̄ọde etịn̄ nte enye ekemede ndin̄wam mmọ ẹfiọk Bible ọfọn akan. Mme mfiakn̄ka oro ẹyọhọde mme uduak ẹmi ẹyen̄wam mmọ efen ẹbọ ufọn ke mfọnn̄kan usụn̄ oro ẹkemede.