Toro Jehovah ke Usen ke Usen
1 Abasi nnyịn, Jehovah, edi utịbe utịbe, ima ima Andibot, Ntọn̄ọ ofụri uwem ye inemesịt. Ke ntak ubom esie, enye ke akpanikọ odot ndibọ itoro nto kpukpru edibotn̄kpọ esie. Nte owo kiet kiet, ọdọn̄ nnyịn nditịn̄ nte andiwet psalm: “Ami . . . [nyenyụn̄] nnam ofụri itoro fo ọdọdiọn̄ akaiso. Inua mi eyebụk mfọnido fo, ye edinyan̄a fo ofụri usen.” (Ps. 71:14, 15) Man inam emi, ana nnyịn iyom usụn̄ nditoro Jehovah ke usen ke usen onyụn̄ edemede nnyịn ke esịt nditịn̄ nti n̄kpọ mban̄a enye, edinen ido esie, ye ndutịm esie kaban̄a edinyan̄a.
2 Mme akpa Christian ẹma ẹnịm eti uwụtn̄kpọ editoro Jehovah. Kaban̄a owo 3,000 oro ẹkenade baptism ke Pentecost, nnyịn ikot ke Utom 2:46, 47 ite: “Ke usen ke usen mmọ ẹnyene iwụk ẹdu ke temple ye esịt kiet, . . . ẹtoro Abasi; kpukpru owo ẹnyụn̄ ẹnen iso ye mmọ. Ndien Ọbọn̄ ada mmọemi ke ẹnyanyan̄a adian ye mmọ ke usen ke usen.” Mmọ ẹma ẹkpep utịbe utịbe akpanikọ ẹban̄a Jehovah ye Messiah esie. Idatesịt mmọ ekebebe owo, esịnde udọn̄ ọnọ mme owo efen efen ẹnọ n̄kpan̄utọn̄ ẹnyụn̄ ẹtoro Jehovah.
3 Mme Ifet Ẹdu Kpukpru Usen: Mfịn ediwak owo ẹkụt ẹte ke mmimọ imekeme nditoro Jehovah ke usen ke usen ebe ke unọ ikọ ntiense ido nneme. Mbemiso ntịmidem esin̄wam mmọ ẹnen̄ede ẹnyene uforo. Eyenete an̄wan oro ekebierede ndibuana ke unọ ikọ ntiense ido nneme ama okụt ke owo ama ọtọ window iba obom onyụn̄ ebe odụk moto imọ. Enye ama okot ọdiọn̄ o-moto onyụn̄ otịm idem ndinọ ọdiọn̄ o-moto emi ikọ ntiense. Ntịmidem esie ama esịne edibọn̄ akam nyom ndausụn̄ Jehovah. Nte n̄kpọ eketiede, enye ama ọnọ ọdiọn̄ o-moto oro ikọ ntiense ke hour kiet onyụn̄ ọnọ enye n̄wed Ndidu Uwem ke Nsinsi.
4 Eyenete an̄wan efen ama esisobo mbọhọidụn̄ esie kpukpru ini ke adan̄aemi mmọ ẹnamde isan̄. Ke ini edisobo kiet, mmọ ẹma ẹnyene ntotụn̄ọ nneme ẹban̄a mme mfịna uwem, ndien oro ama ada okosịm mme nneme efen efen. Nte ini akade, ẹma ẹtọn̄ọ ukpepn̄kpọ Bible. Nte enemde, mbọhọidụn̄ oro ama etịn̄ ete ke imọ ikpakakpan̄ke utọn̄ inọ Mme Ntiense Jehovah edieke ekpedide mmọ ẹkewaha ẹdi ke enyịnusụn̄ imọ, sia imọ mîkonịmke Abasi m̀mê Bible ke akpanikọ.
5 Esidi mmemmem n̄kpọ ọnọ ndusụk owo ndinọ ikọ ntiense ke ini mme anyam n̄kpọurua m̀mê mbon en̄wen ẹwahade enyịnusụn̄ mmọ. Eyenete an̄wan kiet ke Ireland ama ọbọ ikot oto eren kiet akanamde mbubehe edibọ mme owo okụk nnịm man ẹn̄wam mbonubon ke owo oro akpade. Enye ama anam an̄wan̄a ete ke imọ imodori enyịn ndidara nsinsi uwem. Emi ekedi ata obufa ekikere ọnọ eren emi ọkọkọride okpon nte owo Roman Catholic. Enye ama ọbọ n̄wed Ndidu Uwem ke Nsinsi, odụk mbonoesop ke urua oro eketienede, onyụn̄ onyịme ukpepn̄kpọ Bible. Idahaemi anam mbubehe emi edi eyenete eren oro ama akana baptism.
6 Kpukpru nnyịn ikpenyene ndidu ke edidemede mban̄a mme ifet editoro Jehovah ke usen ke usen. Edi n̄kpọ un̄wam ndinịm ibat ibat magazine m̀mê mme tract ke ebiet emi ẹkemede ndisọp n̄kụt ẹnyụn̄ ẹkemede ndisọp nnọ isenowo. Edi n̄ko se ifọnde ndikama mme magazine ye mme tract ke ini idụkde n̄kpọisan̄ ofụri owo inyụn̄ idu ke mben̄eidem nditọn̄ọ nneme oro ekemede ndida n̄kosịm edinọ ikọ ntiense ye mbon oro ẹtiede ẹkpere nnyịn. Ndusụk uyen Ntiense ke ufọkn̄wed ẹsinịm n̄wed ukpep Bible ke enyọn̄ okpokoro mmọ nte usụn̄ ndida ntọn̄ọ nneme ye owo emi edikụtde enye onyụn̄ obụp mbụme. Nyene itien̄wed Abasi kiet m̀mê iba oro afo edikamade ke ekikere. Ben̄e Jehovah an̄wam fi. Afo eyebọ edidiọn̄ ke ndinam ntre.—1 John 5:14.