Afo Emekeme Ndinọ Ikọ Ntiense Ido Nneme!
1. (a) Nso idi unọ ikọ ntiense ido nneme? (b) Owo ifan̄ ke mbono esop emi ẹkebọ akpanikọ ebe ke ikọ ntiense ido nneme?
1 Owo ifan̄ ke esop mbufo ẹkebem iso ẹbọ akpanikọ ebe ke ikọ ntiense ido nneme? Ibọrọ mbụme emi ekeme ndikpa fi idem. Unọ ikọ ntiense ido nneme esịne edibuana eti mbụk ye mbon emi nnyịn isobode ke ini inamde mme mbubehe nnyịn eke usen ke usen—ke ini ikade isan̄, ikade ndise mme iman m̀mê mbọhọidụn̄ nnyịn, m̀mê ikade ndidep n̄kpọ, ọkọrọ ye ke ufọkn̄wed, ke itieutom, ye ntre ntre eken. Ke otu kiet emi ẹsịnede se ibede Mme Ntiense 200 oro ẹma ẹkena baptism, ẹkebem iso ẹsobo mbahade 40 eke ikie ke otu mmọ ke unọ ikọ ntiense ido nneme! Ke ntem, usụn̄ ukwọrọikọ enye emi enen̄ede enyene uforo.
2. Nso uwụtn̄kpọ unọ ikọ ntiense ido nneme ke ikụt ke N̄wed Abasi?
2 Mme ọkwọrọ eti mbụk ke akpa isua ikie ẹma ẹsiwak ndinọ ikọ ntiense ido nneme. Ke uwụtn̄kpọ, ke ini Jesus akasan̄ade ke Samaria ebe, enye ama ọnọ n̄wan kiet oro okokoide mmọn̄ ke obube mmọn̄ Jacob ikọ ntiense. (John 4:6-26) Philip ọkọtọn̄ọ nneme ye Eunuch owo Ethiopia emi okosụk okotde n̄wed Isaiah ke ndibụp ete: “Nte afo emetịm ọfiọk se afo okotde?” (Utom 8:26-38) Apostle Paul ama ọnọ ekpeme ufọk-n̄kpọkọbi ikọ ntiense ke ini ẹkesịnde enye ke ufọk-n̄kpọkọbi ke Philippi. (Utom 16:23-34) Ekem, ke ini okodude ke n̄kọbi-ntem ke ufọk, Paul ama “adara kpukpru mmọ eke ẹdụkde ẹdise enye, ọkwọrọ obio ubọn̄ Abasi ọnọ mmọ onyụn̄ ada akakan ifụre utịn̄ikọ ekpep mmọ mme n̄kpọ emi ẹban̄ade Ọbọn̄ Jesus Christ.” (Utom 28:30, 31) Afo n̄ko emekeme ndinọ ikọ ntiense ido nneme, idem ọkpọkọm edi owo emi esikopde bụt. Didie?
3. Nso ikeme ndin̄wam nnyịn ikan bụt?
3 Nte Ẹkpetọn̄ọde: Esisọn̄ ediwak nnyịn nditọn̄ọ nneme ye isenowo. Isinyụn̄ imemke utom nditọn̄ọ ndineme n̄kpọ aban̄ade akpanikọ ye mme ọdiọn̄ọ nnyịn. Edi edieke itiede ikere nte Jehovah ọfọnde, mme n̄kpọuto eke spirit oro enye ọnọde mme asan̄autom esie, ye nte n̄kpọ ọsọn̄de ye mme owo ke ererimbot, emi oyonụk nnyịn nditọn̄ọ nneme. (Jonah 4:11; Ps. 40:5; Matt. 13:52) Ke adianade do, imekeme ndiben̄e Jehovah ite an̄wam nnyịn ‘inyene uko.’ (1 Thess. 2:2) Eyen ufọkn̄wed Gilead kiet ọkọdọhọ ete: “Mmokụt ediwak ini nte ke akam esin̄wam mi ke ini ọsọn̄de mi ndinyene nneme ye mme owo.” Edieke esimụmde fi umiọn̄ nditịn̄ ikọ, bọn̄ akam ibio ibio ke esịt fo.—Neh. 2:4.
4. Nso utịtmbuba ke ikpenịm inọ idem nnyịn, ndien ntak-a?
4 Nte enyịn̄ oro owụtde, unọ ikọ ntiense ido nneme iyomke itọn̄ọ nneme ye akpakịp ntịmidem m̀mê ndikot Bible. Edieke idomode nditọn̄ọ nneme mmemmem mmemmem, inyụn̄ ikereke ke akpana ikwọrọ ikọ ke ebe oro, emi ekeme ndin̄wam nnyịn. Ediwak mme asuanetop ẹdọhọ ke ndinam ntem esinam mmimọ inyene uko ndinọ mme owo eti mbụk nte ini akade. Edieke owo mîyomke nneme, ufọn idụhe ndinyịk enye etịn̄ ikọ. Tre nneme oro ukpono ukpono nyụn̄ be kpọn̄ enye.
5. Nso isin̄wam eyenete an̄wan kiet emi esikopde bụt ndinọ ikọ ntiense ido nneme?
5 Ke adan̄aemi edepde n̄kpọ ke urua, eyenete an̄wan kiet emi esikopde bụt esimenede enyịn ese owo onyụn̄ atuak inua imam. Edieke owo oro atuakde inua imam n̄ko, enye eyetịn̄ ekpri ikọ adian do. Edieke owo oro ọbọrọde ọfọn, emi esisọn̄ọ enye idem ndika iso ke nneme. Eyenete an̄wan oro esitịm akpan̄ utọn̄ onyụn̄ odomo ndifiọk m̀mê ewe ikpehe eti mbụk ke owo oro edima. Enye esida utọ usụn̄ emi enịm ediwak n̄wed onyụn̄ ọtọn̄ọ ukpepn̄kpọ Bible.
6. Didie ke ikeme nditọn̄ọ nneme ke ido nneme?
6 Nditọn̄ọ Nneme: Nso ke ikpetịn̄ ndida ntọn̄ọ nneme? Ke ini Jesus ekenemede nneme ye n̄wan oro ke mben obube mmọn̄, enye ọkọtọn̄ọ ke ndidọhọ enye ọnọ imọ mmọn̄ in̄wọn̄. (John 4:7) Ntre imekeme nditọn̄ọ nneme ke ndikọm owo ufan ufan m̀mê ndibụp mbụme. Nte afo enemede nneme, ifet ekeme ndiberede ndisịn ekikere N̄wed Abasi kiet mîdịghe ọtọ n̄kpasịp akpanikọ. (Eccl. 11:6) Ndusụk owo ẹmekụt unen ke nditịn̄ ikọ oro edemerede udọn̄ onyụn̄ ekemede ndinam ẹbụp mbụme. Ke uwụtn̄kpọ, ke adan̄aemi ebetde ndikụt abiausọbọ, afo emekeme nditọn̄ọ nneme ke ndidọhọ ete, “Nyenem esịt ke ini emi mmendidọn̄ọke aba.”
7. Didie ke nditịn̄ enyịn edin̄wam nnyịn ndinọ ikọ ntiense ido nneme?
7 Nditịn̄ enyịn ayan̄wam nnyịn ikeme nditọn̄ọ nneme. Edieke ikụtde eyen emi enyenede ido nte asan̄ade ye ete m̀mê eka, imekeme ndikọm ete m̀mê eka inyụn̄ ibụp ite, “Nso in̄wam fi okụt unen ke ndinọ eyen fo ukpep?” Eyenete an̄wan kiet esitịm ọnọ n̄kpan̄utọn̄ ke se mbon en̄wen ẹnemede ke itieutom ndien ekem enye abuana ye mmọ mme akpan n̄kpọ emi ẹkọn̄ọde ke se mmọ ẹnyenede udọn̄. Ke ini enye okokopde ke eyenan̄wan kiet ke itieutom mmọ ọmọn̄ ọdọ ndọ, enye ama ọnọ eyenan̄wan oro Awake! emi enemede nte ẹkpediomide ndọ. Emi ama ada esịm nneme Bible efen efen.
8. Didie ke ikeme ndida mme n̄wed nnyịn ntọn̄ọ nneme?
8 Usụn̄ efen nditọn̄ọ nneme edi ndikot n̄wed nnyịn ke ebiet oro mbon en̄wen ẹkemede ndikụt nnyịn. Eyenete eren kiet esikụbọde ibuotikọ Enyọn̄-Ukpeme m̀mê Awake! oro edemerede udọn̄ onyụn̄ ọtọn̄ọ ndikot sụn̄sụn̄. Edieke enye okụtde ke owo oro etiede ekpere ke ese magazine oro enye okotde, enye esibụp mbụme mîdịghe etịn̄ n̄kpọ ibio ibio aban̄a ibuotikọ oro. Emi esiwak ndisụn̄ọ ke nneme ye edinọ ikọ ntiense. Ndikam nnịm n̄wed nnyịn ke ebiet oro mme owo ẹkemede ndikụt ekeme ndidemede udọn̄ nsan̄autom m̀mê nsan̄a ufọkn̄wed onyụn̄ anam mmọ ẹbụp mbụme ẹban̄a enye.
9, 10. (a) Didie ke ikeme ndiyom mme ifet ndinọ ikọ ntiense ido nneme? (b) Didie ke afo ekekeme ndinam emi?
9 Ndiyom Mme Ifet Nditọn̄ọ Nneme: Ke ntak emi oyomde inam utom ukwọrọikọ nnyịn usọp usọp, nnyịn ikpadaha unọ ikọ ntiense ido nneme didie didie. Utu ke oro, akpana iyom mme ifet ndinọ ikọ ntiense nte nnyịn isede iban̄a mme mbubehe nnyịn eke usen ke usen. Bem iso kere ban̄a mme owo oro afo edisobode, nyụn̄ kere nte ọkpọtọn̄ọde nneme ufan ufan. Nam Bible odu ekpere fi ọkọrọ ye n̄wed oro afo edinọde mbon oro ẹnyenede udọn̄.—1 Pet. 3:15.
10 Ke ndinen̄ede nsịn ukeme, ediwak mme asuanetop ẹmekụt nsio nsio usụn̄ nditọn̄ọ ikọ ntiense ido nneme. Eyenete an̄wan kiet emi odụn̄de ke akamba ufọkidụn̄ oro ẹkpemede esidu ke itie nduọkodudu ufọkidụn̄ oro etịm ndiye ndise obot. Ke ini mme owo ẹtuakde ẹda ẹnyụn̄ ẹtịn̄de nte ndise oro eyede, enye esida ifet oro ọtọn̄ọ nneme onyụn̄ asian mmọ un̄wọn̄ọ Bible oro aban̄ade “obufa enyọn̄ ye obufa isọn̄.” (Edi. 21:1-4) Ndi emekeme ndikere mban̄a mme usụn̄ oro afo ekemede ndida ntọn̄ọ ikọ ntiense ido nneme?
11. Didie ke ikpanam n̄kpọ iban̄a udọn̄ oro ikụtde ke ini inọde ikọ ntiense ido nneme?
11 Nam N̄kpọ Ban̄a Udọn̄ Oro Ẹwụtde: Edieke owo akpan̄de utọn̄ ọnọ fi, domo ndinam n̄kpọ mban̄a udọn̄ oro enye okowụtde. Edieke odotde, afo emekeme ndidọhọ owo oro ete: “Enen̄ede enem mi ndineme nneme ye afo. M̀mọ̀n̄ ke n̄keme ndikụt fi man ikeme ndifiak nnyene nneme?” Ndusụk mme asuanetop ẹsikam ẹnọ owo oro adres ye nọmba urụk ukopikọ mmọ ẹnyụn̄ ẹdọhọ ẹte: “Mmama nneme nnyịn oro. Edieke edimade ndifiọk n̄kpọ efen efen mban̄a se isụk inemede oro, nte edisan̄ade enyene mi edi emi.” Edieke afo ke idemfo mûkemeke ndifiak n̄ka mbịne owo oro okowụtde udọn̄ do, nam ndutịm man esop oro odotde anam ntre usọp usọp ke afo ndinọ ewetn̄wed esop mbufo babru Please Follow Up (S-43).
12. (a) Ntak emi ẹkpesiwetde ẹnịm ẹnyụn̄ ẹtọtde ini oro ẹdade ẹnọ ikọ ntiense ido nneme? (b) Nso utịp ke ẹkenyene ke ndinọ ikọ ntiense ido nneme? (Se ekebe oro “Edinọ Ikọ Ntiense Ido Nneme Enyene Mme Utịp!”)
12 Ẹkpenyene nditọt ini oro ẹdade ẹnọ ikọ ntiense ido nneme. Ntre, kụt ete ke emewet ibat ini oro enịm, ọkpọkọm edi minit ifan̄ ke usen. Kere ban̄a emi: Edieke kpukpru mme asuanetop ẹkpenọde ikọ ntiense ido nneme ke minit ition kpukpru usen, oro ọkpọwọrọ hour million 17 kpukpru ọfiọn̄!
13. Nso ikponụk nnyịn ndinọ ikọ ntiense ido nneme?
13 Imenyene ata eti ntak ndinọ ikọ ntiense ido nneme—ima oro imade Abasi ye mbọhọidụn̄. (Matt. 22:37-39) Esịtekọm oro inyenede iban̄a mme edu ye mme uduak Jehovah ẹnụk nnyịn nditịn̄ mban̄a “ubom uyai ubọk esie.” (Ps. 145:7, 10-12) Ata udọn̄ oro inyenede inọ mme mbọhọidụn̄ nnyịn oyonụk nnyịn ndida kpukpru nti ifet oro inyenede ndibuana eti mbụk ke adan̄aemi ini osụk odude. (Rome 10:13, 14) Ke ndibem iso n̄kere mban̄a se idinamde nnyụn̄ ntịm idem, kpukpru nnyịn imekeme ndinọ ikọ ntiense ido nneme, imonyụn̄ ikeme ndinyene idatesịt oro odude ke ndimen akpanikọ n̄wụt mbon oro ẹnyenede esịt akpanikọ.
[Se ẹwetde ke ikpọ abisi ke page 2]
Afo oyokụt ke ọfọn ndinyene utịtmbuba edisobo ye mme owo nnyụn̄ ntọn̄ọ nneme
[Se ẹwetde ke ikpọ abisi ke page 3]
Ke ndinen̄ede nsịn ukeme, ediwak mme asuanetop ẹmekụt nsio nsio usụn̄ nditọn̄ọ ikọ ntiense ido nneme
[Ekebe ke page 3]
Mme Ekikere Oro Ẹnọde Ke Nte Ẹkpetọn̄ọde Nneme
◼ Bọn̄ akam ben̄e un̄wam man ekeme nditọn̄ọ nneme
◼ Mek mbon oro ẹtiede ufan ufan mînyụn̄ inamke n̄kpọ itọk itọk
◼ Se owo iso, tuak inua imam, nyụn̄ tịn̄ ban̄a n̄kpọ oro mbufo ẹmade
◼ Nen̄ede kpan̄ utọn̄
[Ekebe ke page 3]
Edinọ Ikọ Ntiense Ido Nneme Enyene Mme Utịp!
• Ke adan̄aemi okosụk ebetde ke efe udiọn̄ moto man ẹdiọn̄ moto esie, eyenete kiet ama ọnọ mbon oro ẹkedude ẹkpere enye ikọ ntiense onyụn̄ ọnọ mmọ n̄wedikot ndidụk utịn̄ikọ an̄wa. Ke mbono oro ẹkenịmde ke isua kiet ama ekebe, eyenete oro enye mîkọfiọkke ama ọkọm enye ufiop ufiop. Enye ekedi kiet ke otu mbon oro enye ọkọnọde n̄wedikot ke efe udiọn̄ moto ke isua kiet emi ekebede! Eren oro ama aka okokop utịn̄ikọ an̄wa oro, ama onyụn̄ ayak enyịn̄ esie ọnọ kaban̄a ukpepn̄kpọ Bible. Enye ye n̄wan esie ẹma ẹna baptism.
• Ke ini owo insurance kiet ekedide ufọk eyenete an̄wan kiet, eyenete emi ama ada ifet oro ọnọ ikọ ntiense. Enye ama obụp m̀mê eren oro akpama ndinam insurance oro edin̄wamde enye okop nsọn̄idem, enyene inemesịt onyụn̄ odu uwem nsinsi. Enye ama ọdọhọ ih onyụn̄ obụp m̀mê ewe ndutịm insurance ke enye eketịn̄ aban̄a. Eyenete oro ama owụt enye mme un̄wọn̄ọ Bible onyụn̄ ọnọ enye n̄wed nnyịn, emi enye akadade okoneyo kiet okot ama. Ẹma ẹdiomi ukpepn̄kpọ Bible, ndien enye ama ọtọn̄ọ ndidụk mme mbono esop onyụn̄ ana baptism ke ukperedem.
• Eyenete eren kiet emi edide isua 100, mînyụn̄ ikwe usụn̄, emi odụn̄de ke ufọk ukpeme oro ẹsede ẹban̄a mbon usọn̄ ye mbon n̄kpọnnam esiwak ndidọhọ ete, “Imoyom Obio Ubọn̄.” Emi esinam mme nurse ye mbon udọn̄ọ ẹbụp mme mbụme oro anamde enye etịn̄ se Obio Ubọn̄ edide. Kiet ke otu iban oro ẹnamde utom do ama obụp enye se enye edinamde ke Paradise. Enye ama ọbọrọ ete, “Nyafiak n̄kụt usụn̄ nnyụn̄ mfiak nsan̄a isan̄ nnyụn̄ mfọp n̄kpọitie mbon n̄kpọnnam mi emi.” Sia enye edide nnan, enye esidọhọ n̄wan emi okot mme magazine ọnọ imọ. Ke ini eyen esie an̄wan ekedide ndise enye, n̄wan oro ama obụp eyen esie oro m̀mê imọ imekeme ndida mme magazine oro nnyọn̄ ufọk. Nurse kiet ama ọdọhọ eyen esie oro ete, “Obufa ibuotikọ nnyịn ke ufọkidụn̄ emi edi: ‘Imoyom Obio Ubọn̄.’”