Ndiyak Un̄wana Nnyịn Akaka Iso Ayama

¹ Nso idi un̄wana? N̄wed ukabadeikọ ọdọhọ ke enye edi “n̄kpọ oro anamde ẹkeme ndikụt usụn̄.” Edi ke akpanikọ, kpa ye n̄kọri ke ifiọk ubotn̄kpọ esie, owo isụk itịmke ifiọk ibọrọ mbụme oro Jehovah ekedemerede nte ẹwetde ke Job 38:24. Nte nnyịn imekeme ndinam n̄kpọ ke un̄wana mîdụhe? Nnyịn ikemeke ndidu uwem ke un̄wana mîdụhe. Un̄wana edi akpan n̄kpọ man ẹkụt n̄kpọ ke enyịn, Bible onyụn̄ asian nnyịn ete ke usụn̄ifiọk eke spirit, “Abasi edi un̄wana.” (1 John 1:5) Nnyịn iberi edem ofụri ofụri ke Enyeemi ‘ọnọde nnyịn un̄wana.’—Ps. 118:27.

² Emi edi ntre ke ataata usụn̄ edi akam enen̄ede edi ntre ke usụn̄ eke spirit. Nsunsu ido ukpono omotụn ediwak owo usụn̄, ayakde mmọ esịn ke ekịm eke spirit, ‘ẹfọfiọn̄ọ ubọk ẹyom ibibene nte nnan.’ (Isa. 59:9, 10) Ke edide se akakan ima ye mbọm esie onụkde, Jehovah ‘ọdọn̄ un̄wana ye akpanikọ esie utom.’ (Ps. 43:3) Ata ediwak miliọn mbon oro ẹwụtde esịtekọm ẹmeyere ikot, ẹwọrọde ‘ke ekịm ẹdụk utịbe un̄wana Esie.’—1 Pet. 2:9.

³ Jesus Christ enyene akpan udeme ke ndida un̄wana emi nsọk ererimbot. Enye ọkọdọhọ ete: “Mmedi nte un̄wana ke ererimbot, man owo ekededi eke ọbuọtde idem ye Ami okûsụk odu ke ekịm.” (John 12:46) Enye ekesịn ofụri ini, odudu, ye inyene esie ke ndinam ẹdiọn̄ọ un̄wana akpanikọ. Enye ama asan̄a akanade ofụri obio emana esie, ọkwọrọ onyụn̄ ekpep n̄kpọ ke ekperede ndidi kpukpru obio ye obio-in̄wan̄. Enye ama ọyọ uyịre uyịre ukọbọ oto kpukpru ebiet, edi enye ama ọsọn̄ọ ada ke utom esie ndisuan un̄wana akpanikọ.

⁴ Jesus okowụk ntịn̄enyịn ke ndimek, ndikpep, ye nditịm mme mbet idem, ye akpan utịtmbuba ke ekikere. Ke Matthew 5:14-16 nnyịn ikot item oro enye ọkọnọde mmọ ete: “Mbufo ẹdi un̄wana ererimbot. . . . Yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.” Ukem nte Jesus, mmọ ẹkenyene ndidi “se inọde un̄wana ke ererimbot,” ẹsuande un̄wana akpanikọ ke kpukpru ebiet. (Phil. 2:15, NW) Mmọ ẹma ẹnyịme mbiomo oro ye idatesịt, ẹdade enye nte akpan uduak mmọ ke uwem. Esisịt ini ke ukperedem, Paul ama ekeme ndidọhọ ete ke ‘ẹma ẹkwọrọ eti mbụk ẹnọ kpukpru owo ke idak ikpaenyọn̄.’ (Col. 1:23) Ofụri esop Christian akadiana kiet ke ndinam akwa utom oro.

⁵ Nnyịn mfịn ikpenyene ndiwụt esịtekọm nte ke nnyịn imedidu ke otu mbon oro ẹma ‘ẹkefọrọde utom ekịm.’ (Rome 13:12, 13) Nnyịn imekeme ndiwụt esịtekọm nnyịn ebe ke ndikpebe uwụtn̄kpọ oro Jesus ye mme anam-akpanikọ Christian ke eset ẹkenịmde. Ediyom oro oyomde mbon en̄wen ẹkop akpanikọ edi ata usọp usọp ye akpan n̄kpọ idahaemi akan ini ekededi ke mbụk owo. Idụhe utom en̄wen ekededi emi ekemede ndikpere ndimen udomo ye utom emi ke nte enye edide usọp usọp ye mme ntatara ufọn esie.

⁶ Didie ke Nnyịn Ikeme Ndiyama nte Se Inọde Un̄wana? Akpan usụn̄ ndinam un̄wana nnyịn ayama edi ndibuana ke utom ukwọrọikọ Obio Ubọn̄. Esop kiet kiet enyene ndutịm ofụri ini oro ẹdiomide ẹnọ edikwọrọ ikọ ke efakutom oro ẹnọde enye anam utom. Ẹnam ediwak n̄wed ẹdu ke ediwak nsio nsio uduot ye ke ediwak usem. Ẹnọ ukpep ntatara ntatara ebe ke mme mbonoesop, ndien mbon oro ẹnyenede mbufiọk ẹsinọ mbon en̄wen ọkpọkpọ ukpep. Mme ifet ndibuana ebererede ẹnọ irenowo, iban, ikpọ owo, ye idem nditọwọn̄. Ẹnọ kpukpru owo ke esop ikot ndibuana ke se ededi udomo oro ukeme ye idaha mmọ ayakde. Kpukpru edinam ke esop ẹwụhọ ke ndikwọrọ ikọ, ye ndutịm ndin̄wam kpukpru mme andibuana ẹtiene ẹbuana ke ndusụk usụn̄. N̄kpet n̄kpet ebuana ofụri ini ye esop edi mfọnn̄kan usụn̄ ndikụt nte ke un̄wana nnyịn ke aka iso ayama.

⁷ Nnyịn imekeme ndiyama ke mme usụn̄ oro ẹkemede nditre ndibuana edinọ ikọ ntiense. Nnyịn imekeme ndidụri ntịn̄enyịn mbon en̄wen ebe ke eduuwem nnyịn kpọt. Oro edi se Peter ekenyenede ke ekikere ke ini enye eketemede ete: “Ẹkama idem nte odotde ke iso mme Gentile, man . . . mmọ ẹkpeda nti ido mbufo, ẹmi ẹdikụtde ke ini ẹdide ndidomo mbufo nse, ẹnọ Abasi ubọn̄.” (1 Pet. 2:12) Ediwak owo ẹsibiere n̄kpọ ẹban̄a utom m̀mê esop oto eduuwem mbon oro ẹnyenede ebuana ye enye. Ke ini mme ndanse ẹkụtde mbon oro ẹsanade ke ido uwem, ẹnamde akpanikọ, ẹtiede emem emem, ẹnyụn̄ ẹnịmde ibet, mmọ ẹsibat utọ mbon ẹmi nte ẹdide isio ẹnyụn̄ ẹbiere ke mmọ ẹda mme edumbet oro ẹtịmde ẹkon̄ ẹkan enyeoro ediwak owo ẹtienede ẹdu uwem. Ntre ebe ayak un̄wana esie ayama ke ini enye okponode onyụn̄ amade n̄wan esie ke ima ima usụn̄; n̄wan anam ukem oro ke ndiwụt ukpono nnọ itieibuot ebe esie. Nditọ ẹdi isio ke ini mmọ ẹkopde uyo ete ye eka mmọ ẹnyụn̄ ẹfepde oburobụt ido idan̄ ye edida n̄kpọsọn̄ ibọk. Ẹsinen̄ede ẹbat eyenutom emi etịn̄de enyịn ke utom esie, anamde akpanikọ, onyụn̄ ekerede aban̄a mbon en̄wen ke ọsọn̄urua. Ebede ke ndiwụt mme edu Christian ẹmi, nnyịn iyak un̄wana nnyịn ayama, itorode usụn̄uwem nnyịn inọ mbon en̄wen.

⁸ Edikwọrọ ikọ edi nditịn̄ nnọ mbon en̄wen mban̄a se nnyịn ikpepde ito Ikọ Abasi. Ẹsinam oro ke mbot utịn̄ikọ m̀mê ke enyịnusụn̄, edi enye ke usụn̄ ekededi itreke ke mme utọ idaha oro. Mme edinam nnyịn eke usen ke usen ẹnam nnyịn isobo ye ediwak owo. Ikafan̄ ke usen ke afo esinyene nneme ye mbon oro ẹdụn̄de ẹdiana fi? Ikafan̄ ke owo esikọn̄ usụn̄ fo? Nsio nsio owo ifan̄ ke afo esisobo ke ini akade ndidep n̄kpọ, odụkde bọs, m̀mê ke itieutom idịbi udia fo? Edieke afo edide uyen emi odude ke ufọkn̄wed, nte afo emekeme ndibat owo ifan̄ ẹmi afo esitịn̄de ikọ ọnọ ke usen kiet kiet? Ekpere ndidi mme ifet nditịn̄ ikọ nnọ mbon en̄wen inyeneke adan̄a. Ofụri se oyomde afo anam edi ndinyene mme ekikere N̄wed Abasi ifan̄ ke esịt, anam Bible ye ndusụk tract ẹdu ẹkpere, onyụn̄ anam usio-ukot editịn̄ ikọ ke ini enyenede ifet.

⁹ Idem okposụkedi unọ ikọ ntiense ido nneme edide ata mmemmem n̄kpọ, ndusụk owo ẹsimen̄e ndidomo enye nse. Mmọ ẹkeme nditre ndisioro uyo, ẹdọhọde ke imokop bụt ikaha mîdịghe ke imokop ndịk ndisan̄a n̄kpere isenowo. Mmọ ẹkeme ndikop ndịk mban̄a edidụri ntịn̄enyịn nnọ idemmọ m̀mê ndidi se ẹnọde uyat uyat ibọrọ. Mbon oro ẹnyenede mbufiọk ke unọ ikọ ntiense ido nneme ẹkeme ndidọhọ fi nte ke ntak editịmede esịt ndomokiet idụhe. Mbon en̄wen ke nditịm ntịn̄ ẹsụk ẹtie nte nnyịn; mmọ ẹnyene ukem udọn̄, ẹkere ẹban̄a mme ukem n̄kpọ, ẹnyụn̄ ẹyom mme ukem n̄kpọ ẹnọ idemmọ ye ubon mmọ. Ediwak owo ẹyenam n̄kpọ ke mfọnido ẹban̄a idara idara inua imam m̀mê ufan ufan ekọm. Man ọtọn̄ọ, ekeme ndiyom afo ‘enyene uko.’ (1 Thess. 2:2) Nte ededi, ke ndondo oro afo ọtọn̄ọde, ekeme ndidi afo eyedu ke n̄kpaidem onyụn̄ okop inemesịt aban̄a mme utịp.

¹⁰ Nnyịn Imesibọ Edidiọn̄ ke Ini Nnyịn Iyakde Un̄wana Nnyịn Ayama: Ndusụk uwụtn̄kpọ inem inem ifiọkutom oro ẹtode unọ ikọ ntiense ido nneme ẹdi ẹmi: N̄wan kiet edide isua 55 okodomo ndifehe mbe efak. Ke ndondo oro moto okoyomde nditọ enye, eyenete an̄wan kiet ama omụm enye onyụn̄ anyan̄a enye osio, ọdọhọde: “Mbọk kpeme idem. Nnyịn idu uwem ke enyene-ndịk ini!” Ekem enye ama anam an̄wan̄a ntak emi eyo ọdiọkde ntem. N̄wan oro ama obụp ete, “Ndi afo edi kiet ke otu Mme Ntiense Jehovah?” Sia ama ọkọbọ kiet ke otu n̄wed nnyịn oto eyeneka esie an̄wan, n̄wan oro ama oyom ndisobo ye kiet ke otu Mme Ntiense Jehovah, ndien n̄kpọntịbe emi ama anam enye ekeme ndisobo.

¹¹ Eyenete an̄wan kiet ama ọtọn̄ọ nneme ye n̄wan kiet ke itie ubet owo ke ọfis dọkta. N̄wan oro ama otịm ọnọ n̄kpan̄utọn̄ ndien ekem ọdọhọ ete: “Ke ndusụk ini, Mme Ntiense Jehovah ẹsisobo ye ami; edi edieke ndusụk ke ini iso ami n̄kabade ndi kiet ke otu Mme Ntiense Jehovah, edito ke se afo osụk etịn̄de ọnọ mi emi. Ndikpan̄ utọn̄ nnọ fi etie nte owo nditọn̄ọ ndikụt un̄wana ke n̄kịmn̄kịm ebiet.”

¹² Edinam mfọnido ekeme ndidi usio-ukot ọnọ edin̄wam mbon en̄wen ẹkpep akpanikọ. Ke adan̄aemi ẹketode an̄wautom ẹnyọn̄ ufọk, nditọete iban iba ẹma ẹkụt akanian̄wan kiet oro eketiede nte ọdọdọn̄ọ ọwọrọde ke bọs. Mmọ ẹma ẹtuak ẹda ẹnyụn̄ ẹbụp n̄wan oro m̀mê enye oyom un̄wam. Idem ama akpa enye nte owo iba oro ẹkedide ata isenowo ẹkekemede ndinyene udọn̄ ke idemesie tutu enye eyịre ndidiọn̄ọ se ikonụkde mmọ ndiwụt utọ mfọnido oro. Emi ama eberede usụn̄ ọnọ edinọ ikọ ntiense. Iwiwa n̄wan oro ama ọnọ adres esie onyụn̄ ọnọ mmọ ufiop ufiop ikot ete ẹdi ẹdise imọ. Ẹma ẹtọn̄ọ ukpepn̄kpọ. Ikebịghike n̄wan oro ama ọtọn̄ọ ndidụk mme mbonoesop ndien ke abuana akpanikọ idahaemi ye mbon en̄wen.

¹³ Eyenete an̄wan kiet emi ọsọn̄de ada ifet unọ ikọ ntiense ke usenubọk ke esụk n̄kann̄kụk anam n̄kpọ. Enye osobo ye nditọufọk, mme edepeyen, mme ewetn̄wed ke ban̄k, ye mbon eken oro ẹnamde isan̄ ke esụk. Enye esitie ke nnyan n̄kpọitie onịm mme ukpepn̄kpọ Bible. Ediwak owo ẹmekpep akpanikọ ẹto enye ẹnyụn̄ ẹdi Mme Ntiense Jehovah idahaemi.

¹⁴ Ke itieutom idịbi udia esie, eyenete an̄wan kiet ama okop ekemmọ anamutom etịn̄de aban̄a n̄ka mbre ukara oro enye okonịmde ke ekeme ndikọk mme mfịna ererimbot. Eyenete an̄wan emi ama osioro uyo, obụkde mme un̄wọn̄ọ ẹban̄ade se Obio Ubọn̄ Abasi edinamde. Nneme emi ẹkenemede ke itieutom mi ama ada okosịm ukpepn̄kpọ Bible ofụri ini ke ufọk, ndien nte ini akade n̄wan oro ye ebe esie ẹma ẹkabade ẹdi Mme Ntiense.

¹⁵ Kûdede Ufre Ute ke Imọ Idi Ntiense! Ke ini Jesus ọkọdọhọde ke mbet imọ ẹdi “un̄wana ererimbot,” enye ama ọnọ ekikere ete ke mmọ ẹkpenyene ndin̄wam mbon en̄wen ndibọ ufọn nto ifiọk eke spirit eke Ikọ Abasi. Edieke nnyịn idade item Jesus isịn ke edinam, didie ke nnyịn idise utom ukwọrọikọ nnyịn?

¹⁶ Ke ini ẹyomde utom, ndusụk owo ẹsimek utom ibio ini. Mmọ ẹsinịm adan̄a ke udomo ini ye ukeme oro mmọ ẹdisịnde ndinam enye koro mmọ ẹmekde ndida ekese ini mmọ mbịne mme edinam oro mmọ ẹkụtde nte akamade utịp akan. Nte nnyịn ise utom ukwọrọikọ nnyịn ke ukem usụn̄ oro? Idem okposụkedi nnyịn ikemede ndikere ke obiomo nnyịn inyụn̄ ikam inyịmede ndisio ndusụk ini nnịm nnọ utom ukwọrọikọ, nte mme akpan udọn̄ nnyịn ẹkpedu ke ebiet en̄wen?

¹⁷ Ke ifiọkde ite ke utọ n̄kpọ nte Christian ibio ini idụhe, nnyịn ikanam uyakidem nnyịn, ‘itụkde idem nnyịn’ inyụn̄ inyịmede ‘ndika iso’ ntiene Jesus. (Matt. 16:24, NW) Udọn̄ nnyịn edi ndika iso nnam utom “ofụri esịt,” idade kpukpru ifet oro ẹberede ndinam un̄wana nnyịn ayama man osịm mme owo ke ebiet ekededi oro mmọ ẹdude. (Col. 3:23, 24) Ana nnyịn ibiọn̄ọ mme edu ererimbot, ika iso inyene ifịk nnyịn nte ekedide ke akpa, inyụn̄ ikụt ite ke un̄wana nnyịn aka iso ndiyama ata mfọn mfọn. Ekeme ndidi ndusụk owo ẹma ẹyak ifịk mmọ ebịt ẹnyụn̄ ẹyak un̄wana mmọ akabade etie nnan nnan, imemke utom ndida n̄kụt ke oyomde usụn̄ esisịt. Utọ owo oro ekeme ndiyom un̄wam man afiak enyene ifịk utom ukwọrọikọ oro enye ọkọduọkde.

¹⁸ Ndusụk owo ẹkeme ndimen̄e sia ediwak owo mîmaha etop nnyịn. Paul ọkọdọhọ ke etop aban̄ade Christ ekedi “ndisịme ikọ ke enyịn mbon nsobo.” (1 Cor. 1:18) Inamke n̄kpọ m̀mê nso ke mbon en̄wen ẹtịn̄, nte ededi, enye ama etịn̄ ye odudu ete: “Bụt inamke mi ye gospel.” (Rome 1:16) Owo emi okopde bụt esikere ke idi usụhọde m̀mê ke imọ iwọrọke n̄kpọ. Nnyịn ikpasasan̄a didie ikop bụt ke ini itịn̄de iban̄a Akakan Andikara ekondo ye utịbe utịbe ndutịm oro enye anamde kaban̄a nsinsi inemesịt nnyịn? Idịghe n̄kpọ emi ikpekerede-kere ke nnyịn idi usụhọde m̀mê ke nnyịn iwọrọke n̄kpọ ke ini itịn̄de akpanikọ inọ mbon en̄wen. Utu ke oro, okponụk nnyịn ndinam ofụri ukeme nnyịn, iwụtde ke imonịm ke akpanikọ nte ke nnyịn inyeneke “ntak ndikop bụt.”—2 Tim. 2:15.

¹⁹ Un̄wana akpanikọ emi ayamade idahaemi ke mme idụt ke ofụri isọn̄ ọnọ idotenyịn nsinsi uwem ke paradise obufa ererimbot. Ẹyak nnyịn iwụt ke nnyịn imada item eke edinam un̄wana nnyịn akaka iso ayama isịn ke edinam! Edieke inamde, nnyịn iyenyene ntak ndidat esịt kpa nte mme mbet ẹmi kpukpru usen ‘mîkodopke uyo ndikpep nnyụn̄ n̄kwọrọ, nte Jesus edi Christ.’—Utom 5:42.