Mbono District “Mme Isụn̄utom Emem Abasi” eke Mme Ntiense Jehovah eke 1996
1 Ẹma ẹkop mme ata ikọ esịtekọm kaban̄a akama-nsịnudọn̄ ndutịm eke n̄kan̄ eke spirit ẹto ediwak ke otu owo 462,540 ẹmi ẹkedụkde Mbono District “Idara Idara Mme Anditoro” eke 1995 ke Nigeria. Esịt nnyịn ẹma ẹyọhọ ye idara ke ndikokụt mme anditoro Jehovah 7,603 ẹyararede uyakidem mmọ ke mmọn̄ baptism. Nnyịn ima ikop idatesịt ndibọ mbufa n̄wed iba oro, Jehovah’s Witnesses and Education ye Ifiọk Oro Adade Osịm Nsinsi Uwem. Nnyịn ndikadara utọ akama-nduaidem ndutịm oro isua oko, m̀mê ke ntọn̄ọ ntọn̄ọ isua emi, ke akpanikọ ekpenyene ndinụk nnyịn ndisịn ofụri ukeme man idu ke ndutịm oro ẹdiomide ẹnọ Mbono District “Mme Isụn̄utom Emem Abasi” eke 1996. Ke akpanikọ kpukpru nnyịn ikpenyene ndikot nditọ ukpepn̄kpọ Bible nnyịn inyụn̄ in̄wam mmọ ndidu do ye nnyịn. Mme mbono ẹmi ẹdidi ata n̄kpọ nsịnudọn̄ ye odudu nte nnyịn ikade iso ndinam n̄kpọ Jehovah idara idara ke ukperedem ini ẹmi.
2 Kụt ete ke imabak inam ndutịm mbono fo man okpodu do ndidara kpukpru inem inem ndutịm eke spirit usen ita oro, ọtọn̄ọde ke ikwọ ediberede tutu osịm akam ediberi. Ke ntak emi ekọmurua ukaisan̄ ọdọkde-dọk, ini edi emi nditọn̄ọ nnịm okụk man edikeme ndidụk ye ofụri ubon fo. Ke ima buan mbon oro ẹkemede ndiyom un̄wam ke ndutịm fo, akpan akpan mbufa mbon oro ẹnyenede udọn̄, man mmọ n̄ko ẹkeme ndidụk kpukpru ikpehe edinam. Eyenen̄ede an̄wam ndineme mme ntọt ẹdude ke esịne-esịt emi ye eyen ukpepn̄kpọ Bible ekededi oro edidiomide ndidụk. (Gal. 6:6, 10) Ndutịm editọn̄ọ ye ikwọukwak ke n̄kanika ebede 9 ke minit 20 usenubọk ke Friday onyụn̄ etre ke ikwọ ye akam ke n̄kpọ nte n̄kanika ebede 4 ke minit 30 mbubịteyo. Ndutịm Saturday editọn̄ọ ke n̄kanika usụkkiet usenubọk onyụn̄ etre ke ikwọ ye akam ke n̄kpọ nte n̄kanika inan̄ mbubịteyo. Ikpehe edinam usenubọk Sunday editọn̄ọ ke n̄kanika usụkkiet, ndien ndutịm usen oro edikụre ke n̄kpọ nte n̄kanika ebede 3 ke minit 30 uwemeyo. Mme ntọt ẹtienede mi eyen̄wam fi ke mme ntọn̄ọ ntọn̄ọ ntịmidem fo.
3 Mme Item ke Ndibọ Itieidụn̄: Nnyịn iyedomo ndinọ ibat babru Room Request oro ekemde ẹsọk esop kiet kiet. Ewetn̄wed esop ekpenyene ndikụt nte ke ẹwet n̄kpọ nnennen nnennen ẹyọhọ babru Room Request kiet kiet oro ẹnọde ẹdi. KÛWET sụk ibat mme asuanetop oro ẹyomde itieidụn̄, utọ nte “asuanetop 50,” ke mme ufan̄ oro ẹkpewetde enyịn̄ mbon ẹmi. Ẹnyene ndiwet kpukpru ntọt nte eyede ye nte ẹkemede ndikot. Mbọk kụt ete ke ọmọnọ ọyọhọ ntọt kaban̄a enyịn̄, isua emana, eren m̀mê n̄wan, ye m̀mê owo oro oyomde itieidụn̄ edi asiakusụn̄ m̀mê asuanetop esop. Sịn nditọwọn̄ ke udịm enyịn̄ emi. Ke ini edem ndusụk esop ẹkesiwet enyịn̄ ikpọ owo kpọt. Emi esinam ndutịm unọ itieidụn̄ enen̄ede ọsọn̄ utom. Edieke oyomde ufan̄ oro okponde akan se idude ke babru oro, da ikọn̄ babru efen wet. Edieke ewetde awak akan enyịn̄ owo kiet ke babru oro, mbọk wụt itie ebuana mbon oro ẹyomde itieidụn̄ ke nnennen ufan̄ oro ẹnịmde. Ewetn̄wed esop ekpenyene ndikụt nte ke ẹwet n̄kpọ ẹyọhọ babru Room Request nte enende mbemiso enye ọnọde aka Itieutom Unọ Ufọkidụn̄ mbono.
4 San̄asan̄a Un̄wam: Ndutịm emi edi n̄kukụre kaban̄a mme asuanetop oro ẹnịmde nti uwụtn̄kpọ, esịnede nditọ mmọ oro ẹdude eti uwem, ẹmi Kọmiti Utom Esop ọnọde unyịme. Ẹkpenyene ndinam mme ndutịm ndise mban̄a mbon oro ẹyomde san̄asan̄a un̄wam ke esop emi mmọ ẹsidụkde mme mbonoesop, utu ke ndisịk mbiomo emi ndori mme anam ndutịm mbono ke idem. Mbiowo ye mbon en̄wen ẹmi ẹdiọn̄ọde ẹban̄a idaha owo oro ẹkeme ndinọ ima ima un̄wam. Emi esiwak ndiyom mme asuanetop ẹkere ẹban̄a udọn̄ mbon oro ẹdude ke utom uyọhọ ini, mbonusọn̄, mbon unana nsọn̄idem, ye ndusụk mbon eken. Mme asuanetop ẹkeme ndinọ un̄wam ebe ke ndisan̄a ye mme utọ owo oro m̀mê ndise mban̄a se mmọ ẹyomde ke nti usụn̄ efen.—Jas. 2:15-17; 1 John 3:17, 18.
5 Nte ededi, Itieutom Unọ Ufọkidụn̄ eyedomo ndinọ mme asuanetop ẹyomde san̄asan̄a un̄wam ufọkidụn̄ oro ẹdotde edieke mbon oro ẹdude ke esop mîkemeke ndin̄wam mmọ. Mme asuanetop ẹmi ẹkeme ndineme idaha mmọ ye ewetn̄wed esop. Ewetn̄wed ekpenyene ndineme ye Kọmiti Utom Esop man ese m̀mê esop eyekeme ndin̄wam mme owo ẹmi ke ndise mban̄a itieidụn̄ mmọ. Edieke esop mîkemeke ndinọ un̄wam oro ẹyomde, ewetn̄wed ekeme ndinọ utọ mbon oro babru Room Request emi enye emịn̄de in̄wan̄în̄wan̄ mme ikọ ẹmi “SAN̄ASAN̄A UN̄WAM” ke enyọn̄ akpa page oro. Mbon oro ẹyomde san̄asan̄a un̄wam kpọt ẹkpenyene ndiwet n̄kpọ nyọhọ babru emi ẹwetde n̄kpọ san̄asan̄a mi. Owo oro esịnde eben̄e emi enyene ndiwet n̄kpọ nyọhọ enye. Ẹkpenyene ndifiak nyak enye nnọ ewetn̄wed, emi edisede nte ẹwetde ofụri n̄kpọ, enende, onyụn̄ odụn̄ọde mme idaha oro ẹnamde owo oro odot ndidi se ẹnọde utọ un̄wam oro. Mme idaha oro ẹdi se ewetn̄wed enyenede NDINAM AN̄WAN̄A KE NDE KE NDE ke ufan̄ oro ẹnịmde ke edem babru emi. Ẹkpenyene ndibabak nnam kpukpru emi mbemiso mbono. Ewetn̄wed ndien eyenọ babru emi ẹsọk Itieutom Unọ Ufọkidụn̄. Ẹyesian owo oro esịnde eben̄e emi nnennen ẹban̄a mme itieidụn̄.
6 Mbon oro ẹyomde san̄asan̄a un̄wam IKPENYENEKE ndika itiembono nnyụn̄ n̄kesịn eben̄e ufọkidụn̄ ke ini mmọ ẹsịmde, koro Itieutom Unọ Ufọkidụn̄ ana enyene unyịme oto Kọmiti Utom Esop.
7 Itieidụn̄ ke Mme Ufọk Owo: Edieke ẹnọde fi ufọk owo odụn̄, edide eke eyenete m̀mê eke owo an̄wa, mbọk nyene ke ekikere nte ke idotke ndida mfọnido esie nnam n̄kpọ nte mîfọnke nnyụn̄ ndori enyịn enye ndiyak fi aka iso odụn̄ do ke usen efen efen mbemiso m̀mê ke mbono ama okokụre. Ẹnọ itieidụn̄ emi ke ini mbono oro IKPỌN̄ÎKPỌN̄. Mbon oro ẹbọde mme utọ itieidụn̄ oro ẹkpenyene ndikụt nte ke mmimọ ye nditọ mmimọ imanam n̄kpọ ukpono ukpono ke itieidụn̄ mme enyeneufọk mmimọ inyụn̄ isuanke n̄kpọ m̀mê ndibiat mme inyene enyeneufọk m̀mê ndidụk mme itie oro mînaha inọ isenowo ke ufọk oro. Edieke mme enyeneufọk ẹsobode mfịna ekededi ke afan̄ emi, ẹkpenyene ndinam esenyịn unọ ufọkidụn̄ ke mbono oro ọdiọn̄ọ aban̄a ẹmi usọp usọp ndien enye eyekop inemesịt ndin̄wam.
8 Ndimek Mbono Fo: Ẹwet obio mbono kiet kiet ye mme circuit (m̀mê mme ikpehe ẹdemede ẹsịn) ke page etienede nte ekemde ye ndutịm usenọfiọn̄ emi ẹnọde ndidụk mbono kiet kiet. Afo ekpenyene ndidụk mbono oro ẹdemede circuit m̀mê esop mbufo ẹsịn, ibọhọke mme idaha oro ntak ẹdotde ẹdu. Ke ebiet oro ẹnịmde mbono iba m̀mê awakde ebe oro ke ukem itie, afo ekpenyene ndidụk ke mme usenọfiọn̄ oro ẹwụtde eke circuit mbufo m̀mê ikpehe oro ẹdemede mbufo ẹsịn. Nte afo anamde mme ndutịm fo ndidụk, buan mbon oro ẹyomde un̄wam ke ima ima usụn̄, akpan akpan mbufa mbon oro ẹnyenede udọn̄, man mmọ n̄ko ẹkpekeme ndidụk kpukpru ikpehe edinam.—Gal. 6:10.
9 Usem Idiọn̄ọ Enyenede Mbon Inan: Ke mbono OTA 7, emi ẹdinịmde ke December 13-15, 1996, ye ke mbono ULI 7 emi ẹdinịmde ke January 10-12, 1997, ẹyenam ndutịm ẹnọ nditọete iren ye iban oro ẹdotde ndikabade ofụri edinam nsịn ke Usem Idiọn̄ọ Mbon America. Ẹsịn udọn̄ ẹnọ mme inan ke kpukpru esop ke Nigeria nditọn̄ọ ndinam ndutịm nnọ edidụk ke nsụhọde n̄kaha kiet ke otu mbono ẹmi. Mbiowo ẹkpenyene nditịn̄ enyịn nnam ndụn̄ọde ye inan kiet kiet ke esop mmọ oro ẹdiọn̄ọde Usem Idiọn̄ọ Mbon America man ẹkụt ẹte ke mmọ ẹfiọk ẹban̄a ndutịm emi man ẹnyụn̄ ẹbiere m̀mê ẹyom un̄wam ekededi man mmọ ẹkpekeme ndidụk.
10 Mme Andidụk Mbono Ọwọrọde Ọkpọn̄ Ebiet Ẹkenọde Mmọ: Ke ekperede ndidi ke kpukpru idaha, itie emi ẹdemede mbufo ẹsịn edi kiet oro ekperede esop mbufo akan. Ndinyene n̄kpọitie, n̄wed, udia, itieidụn̄ oro ekemde, ye ntre ntre, ọkọn̄ọ ke ekikere nte ke ediwak mme asuanetop ẹdidụk mbono oro ẹdemede esop mmọ ẹsịn. Nte ededi, edieke eti ntak odude afo ndidụk mbono ke ebiet efen utu ke enyeoro ẹkedemede fi ẹsịn onyụn̄ oyom ufọkidụn̄, ewetn̄wed esop ekeme ndinọ fi babru Room Request. Afo emekeme ndiwet n̄kpọ nyọhọ onyụn̄ anam ewetn̄wed esịn ubọk mbemiso afo ọnọde enye aka itiembono oro afo oyomde ndidụk.
11 Ẹyom Edidianakiet Fo: Ndutịm unọ ufọkidụn̄ emi ndikụt unen ọkọn̄ọ ke edidianakiet eke kpukpru mbon oro ẹbuanade. (Heb. 13:17) Ntre, nnyịn imeben̄e kpukpru owo ndidiana ọyọhọ ọyọhọ ye ndutịm unọ ufọkidụn̄ N̄ka. Mbọk nyịme ndibọ itieidụn̄ oro ẹnọde fi m̀mê otu m̀mê esop oro abuanade. Edieke anade anam ọkpọkpọ ndutịm fo, ndusụk ke ntak mûmaha itieidụn̄ oro ẹnọde fi, afo emekeme ndinam ntre. Edi kûdomo ndibọ itieidụn̄ oro Itieutom Unọ Ufọkidụn̄ mbono ama ọkọbọbọ ebe ke ndiyom ndikpe okụk awak akan se ẹma ẹkenyenyịme. Emi ikpedịghe ediwụt mfọnido ye ima nnọ nditọete fo, n̄ko enye edi edinam unana edisọn̄ọ nda ye esop Jehovah. Nnyịn imọfiọk ite ke nditọete ke ofụri ofụri ẹsima ndinyene itieidụn̄ oro ẹkperede itiembono, edi idịghe kpukpru owo ke ẹkeme ndinọ itieidụn̄ ntre. Ndusụk owo ẹnyene ndidụn̄ ke ebiet oyomde usụn̄ esisịt ọkpọn̄ itiembono. Edieke otịbede nte afo odụn̄ ke ebiet oyomde usụn̄ esisịt ọkpọn̄ itiembono isan̄ emi, bat emi nte uwa oro afo enyenede ndinam nyụn̄ wụt esịtekọm ke ọkpọsọn̄ utom oro Itieutom Unọ Ufọkidụn̄ mbono akanamde ke ndidiomi itieidụn̄ nnọ fi. Enye edi ke usen ifan̄ kpọt, ndien ekem afo eyefiak ọnyọn̄ esop obio fo. Edi edieke afo oyomde ndinam ndutịm idemfo, mbọk bem iso bụp Itieutom Unọ Ufọkidụn̄ fiọk m̀mê ẹma ẹbebem iso ẹbọ ebiet oro afo oyomde ndinam ndutịm mban̄a. Edidi uduak Itieutom Unọ Ufọkidụn̄ mbono ndikụt nte ke nditọete nnyịn ye mme andidụk mbono eken ẹnyene mme itieidụn̄ ẹfọnde ẹnyụn̄ ẹsụhọrede ubiatokụk nte ekekeme, nte ekemde ye mme idaha mmọ, man ẹkop inemesịt ẹnyụn̄ ẹkeme ndidara nti ufọn n̄kpọ spirit eke ndutịm mbono ọyọhọ ọyọhọ.
12 Ndisịn ndinam se ẹtịn̄de ke kpukpru ikpehe oro ẹsiakde ke enyọn̄ emi eyenam edi ọkpọsọn̄ n̄kpọ ndidiomi ndibọ mme itieidụn̄, ndien mmọ ẹyeda esuene ẹsọk enyịn̄ ye esop Jehovah. (Ps. 119:168) Ke ntre, N̄ka ọyọdọhọ Itieutom Unọ Ufọkidụn̄ anam ndụn̄ọde ye mme enyeneufọk man ẹfiọk m̀mê owo ekededi enyene mfịna n̄ko m̀mê anie abuana. Mme anam ndutịm mbono ke ẹnam utom ọkpọsọn̄ ndin̄wam nditọete nnyịn ẹtre ọkpọsọn̄ ubiatokụk nte ekekeme. Ke ntre, edi ke ufọn kpukpru nnyịn ndidiana ọyọhọ ọyọhọ ye ndutịm unọ ufọkidụn̄ N̄ka man ndutịm emi ekpekeme ndisụk n̄ka iso. Ẹnen̄ede ẹdara ibetedem nsọn̄ọnda oro afo ọnọde ndutịm emi otode Jehovah mi ebe ke asan̄autom emi anamde akpanikọ onyụn̄ enyenede ọniọn̄.
[Ntọt Ẹnọde Otu Mbiowo: Ke ẹbọde esịne-esịt emi, mbọk ẹtọt ke Esoputom efen ye ke Ukpepn̄kpọ Enyọn̄-Ukpeme oro editienede, ebiet ye mme usenọfiọn̄ emi N̄ka edemede esop mbufo esịn. Ọkpọfọn ndidụri udịm ke obio mbono ye mme usenọfiọn̄ oro ẹdemede esop mbufo ẹsịn ke udịm enyịn̄ circuit oro ẹnọde, ẹnyụn̄ ẹdian ikpehe esịne-esịt emi ke obukpọk ntọt.
Ewetn̄wed esop ekpenyene ndise mban̄a n̄kpọ ẹban̄ade mme mbono ye mme ntọt mbono ke mme mbonoesop ini iso. Kpukpru mbiowo ẹnyene ndidiana kiet ọyọhọ ọyọhọ man ẹkụt ẹte ke ẹse ẹban̄a mme n̄kpọ ẹban̄ade mbono usọp usọp, ifịk ifịk, ye nte ọfọnde.]