Ndi Mbufo Ẹma Ẹnam Enye ke April?
Ini ewe ke nnyịn ikeme ndidọhọ ke esop ama anam enye? Ẹma ẹsịn udọn̄ ẹnọ kpukpru nnyịn ndibuana ke san̄asan̄a ubịnikọt magazine ke mme ọfiọn̄ April ye May, ke adianade ye usen oro ẹsiode ẹnịm ke April nte san̄asan̄a Usen Magazine. Edieke kpukpru mme asuanetop ke esop ẹkebuanade ke san̄asan̄a ubịnikọt emi, edide ke san̄asan̄a usen oro ẹkesiode ẹnịm ẹnọ edisuan magazine m̀mê ke mme usen efen ke ọfiọn̄ oro, ẹnyụn̄ ẹtọt utom an̄wautom mmọ, nnyịn imekeme ndidọhọ ite, “Nnyịn ima inam enye!” Kemi April ama ekebe, oyom idụn̄ọrede adan̄a nte nnyịn ikanamde enye. Utom Obio Ubọn̄ Nnyịn eke March 1996, page 5, ke idak ibuotikọ oro “Da Mme Magazine Nnyịn Nam N̄kpọ ke Mfọnn̄kan Usụn̄,” ama ọnọ mme ekikere 17 ke nte ẹkemede ndinam enye ke April ye May.
Nte magazine ẹma ẹkụre ẹkpọn̄ esop mbufo ke April? Asuanetop ifan̄ ẹkebuana ke san̄asan̄a ubịnikọt magazine ke ọfiọn̄ oko? Nte mbufo ẹyenyene ọyọhọ ebuana ke ubịnikọt oro ke ọfiọn̄ emi? Nnyịn imenyene ediwak ifet ndisuan mme magazine—to ke ufọk sịm ufọk, ke efak, to ke ufọkurua sịm ufọkurua, ke mme afan̄ magazine, ke unọ ikọ ntiense mbubịteyo, ke ini inamde mme mfiakn̄ka, ikade ikese n̄kani nditọ ukpepn̄kpọ Bible, ke ini ikade ndidep n̄kpọ, ikade isan̄, inyenede nneme ye mme iman, mme nsan̄autom, mme mbọhọidụn̄, mme nsan̄a ufọkn̄wed, mme andikpep, ke n̄kpọisan̄ ofụri owo, ye mme ubet oro ẹsitiede ẹbet owo. Nnyịn ke akpanikọ imekeme ndidọhọ ke mme ifet ndinọ mme magazine ẹkakan nnyịn ẹkụk.
Ẹtoro kpukpru esop oro ẹkenamde enye ke April, ẹnyụn̄ ẹsịn udọn̄ ẹnọ mbufo ndikụt nte ke mbufo ẹmenam enye n̄ko ke May. Nso kaban̄a mme esop oro mîkanamke enye ke April? Ntak emi mûdụn̄ọkede nti ekikere oro ẹdude ke Utom Obio Ubọn̄ Nnyịn eke March 1996? Kpukpru asiakusụn̄ ye mme asuanetop ẹkpenyene ndikụt ke imenyene mme magazine oro ẹwakde ẹkem ndisuan. Ẹkam ẹkeme ndinam mbufa mme asuanetop ẹtọn̄ọ utom an̄wautom ke ọfiọn̄ emi man otodo mmọ ẹkeme ndibuana ke san̄asan̄a ubịnikọt magazine emi.—Se Utom Nnyịn, page 97-100.
Mbufo ndinyene ifịk ifịk udeme ke san̄asan̄a ubịnikọt emi eyenam mbufo ẹnyene uyụhọ esịtidem emi otode editịm nyọhọ utom mbufo.—Ezek. 9:11; Luke 17:10.