Didie ke N̄keme Ndinam Owo Ọnọ N̄kpan̄utọn̄?
1 Ke obio Philippi, “n̄wan kiet ekere Lydia . . . anyam ididuot ọfọn̄, . . . okop se itịn̄de: Ọbọn̄ onyụn̄ eberede enye esịt, anam enye ọbiọn̄ utọn̄ ọnọ ikọ oro Paul etịn̄de.” (Utom 16:14, sịghisịghi ubọkn̄wed edi eke nnyịn.) Nso ke mbụk emi ekpep nnyịn? Ndinọ n̄kpan̄utọn̄ esiberede usụn̄ ọnọ owo ndikpep akpanikọ. Nnyịn ndikụt unen ke ndibuana etop Obio Ubọn̄ ọkọn̄ọ akpan akpan ke enyeneufọk ndinyịme ndinọ n̄kpan̄utọn̄. Ke ndondo oro nnyịn inyenede owo emi ọnọde n̄kpan̄utọn̄, ke ndusụk udomo edi mmemmem nditịn̄ etop nnyịn. Edi ndinam owo ọnọ n̄kpan̄utọn̄ ekeme ndidi n̄kpọ-ata. Nso ke nnyịn ikeme ndinam?
2 Mbemiso iwọrọde an̄wautom, nnyịn ikpenyene ndinọ ntịn̄enyịn ke ukamaidem nnyịn ye n̄kpọutom oro ididade inam n̄kpọ. Ntak-a? Mme owo ẹsinyene ntụhọ edikpan̄ utọn̄ nnọ owo emi akamade idem uku uku. Nte nnyịn imesisịne ọfọn̄ nte eyede edi ke usụn̄ owụtde iso o-bụt? Okposụkedi nsuahade nsuahade usịnen̄kpọ ekemede ndidi ọsọ n̄kpọ ke ererimbot, nnyịn ifefep utọ unana ntịn̄enyịn oro koro nnyịn idide mme asan̄autom emi idade inọ Obio Ubọn̄ Abasi. Ukamaidem nnyịn oro asanade onyụn̄ eyede adian ikọ ntiense nte ọfọnde ke etop Obio Ubọn̄ oro nnyịn ikwọrọde.
3 Tie Ufan Ufan ye Ukpono Ukpono: Kpa ye mme edu ẹkpụhọde-kpụhọ mfịn, ediwak owo ẹsụk ẹnyenyene ukpono ẹnọ Bible ndien ẹyenam n̄kpọ nte ọfọnde ẹban̄a ukpono ukpono ye ufan ufan nneme aban̄ade se isịnede ke Bible. Edituak ufiop ufiop, ataata inua imam ekeme ndinam enyeneufọk enyene ifụre onyụn̄ eberede usụn̄ ọnọ inem inem nneme. Esịt akpanikọ ye nti edu nnyịn ẹkpenyene ndiwụt idem n̄ko ke utịn̄ikọ ye eduuwem nnyịn, emi esịnede edinọ n̄kpan̄utọn̄ ukpono ukpono ke se enyeneufọk etịn̄de.
4 Uduak nnyịn edi ndibuana idotenyịn Bible ye mbon en̄wen. Ye emi ke ekikere, nnyịn ikpenyene ndikụt nte ke nneme nnyịn etie inem inem, idịghe utọk utọk m̀mê en̄wan en̄wan. Ufọn idụhe ndibiat ini ke ndifan̄a n̄kpọ ye owo emi ọbiọn̄ọde-biọn̄ọ in̄wan̄în̄wan̄. (2 Tim. 2:23-25) Nnyịn imekeme ndisat ediwak nsio nsio akama-nsịnudọn̄ ye ekemini nneme oro ẹnọde nnyịn ke Utom Obio Ubọn̄ Nnyịn ye n̄wed Reasoning. Nte ededi, oyom nnyịn itịm mmọemi mfọn mfọn man otodo nnyịn ikeme nditịn̄ ikọ ke usụn̄ oro esịnede ufiop onyụn̄ anamde ẹnịm.—1 Pet. 3:15.
5 Ke ima ikọnyọn̄, ibat ibat enyeneufọk ẹsikeme nditi nnennen se nnyịn ikenemede. Nte ededi, ekpere ndidi kpukpru mmọ ẹkeme nditi edu emi iketịn̄de enye. Nnyịn ikpedehede ida odudu emi eti ido ye mfọnido enyenede ke usụhọde. Ke akpanikọ ediwak mbon mbieterọn̄ ẹdu ke efakutom nnyịn ẹmi ẹdinọde n̄kpan̄utọn̄ ke akpanikọ kpa nte Lydia akanamde ke akpa isua ikie. Nditịm nnọ ntịn̄enyịn ke ukamaidem ye edu utịn̄ikọ nnyịn ekeme ndisịn udọn̄ nnọ mbon oro ẹnyenede esịt akpanikọ ndikpan̄ utọn̄ nnọ Ikọ Abasi nnyụn̄ nnyịme enye nte ọfọnde.—Mark 4:20.