Kọm Jehovah “Kpukpru Usen”
1 Psalm 145:2 esịne un̄wọn̄ọ oro Edidem David ọkọn̄wọn̄ọde ọnọ Jehovah ete: “Nyekọm fi ke kpukpru usen; nnyụn̄ ntoro enyịn̄ fo ke nsinsi-nsinsi.” Nnyịn n̄ko imenyene ntak ndikọm nnyụn̄ ntoro Ete nnyịn eke heaven! Edi didie ke nnyịn ikeme ndikpebe uwụtn̄kpọ David ke ndimenede itie edikara Jehovah ke enyọn̄ “kpukpru usen”?
2 Iyọhọ Esịt Nnyịn ye Esịtekọm Inyenede inọ Jehovah: Edikpep Ikọ Abasi ofụri ini eyenam esịtekọm oro inyenede inọ se Jehovah ama akanam, anamde, ye se edinamde ọnọ nnyịn otụn̄ọ. Nte nnyịn ikọride ke esịtekọm oro inyenede iban̄a mme utịbe utịbe edinam esie, nnyịn iyekụt nte ikwọde eti ido esie. (Ps. 145:7) Nnyịn iyetoro Jehovah ifịk ifịk ke kpukpru idaha oro ẹdotde.
3 Toro Jehovah ke Nneme eke Usen ke Usen: Ke ini inemede nneme ye mme mbọhọidụn̄, mme nsan̄a ufọkn̄wed, mme nsan̄a utom, ye mmọ en̄wen oro isobode ke usen ke usen, nnyịn imekeme ndikụt mme ifet ndibuana idotenyịn nnyịn ye mmọ. Mbọhọidụn̄ ekeme nditịn̄ nte okopde editịmede esịt aban̄a ubiatibet ke n̄kann̄kụk; nsan̄a ufọkn̄wed ekeme nditịmede esịt mban̄a edida n̄kpọsọn̄ ibọk ke idiọk usụn̄ m̀mê oburobụt ido; nsan̄a utom ekeme ndinọ ekikere mban̄a ndusụk n̄kpọ aban̄ade ukaraidem. Nnyịn imekeme ndinyan ubọk n̄wụt mme edumbet ye mme un̄wọn̄ọ ẹdude ke Ikọ Abasi oro ẹwụtde nnennen usụn̄ nditiene idahaemi ye usọbọ odude ọnọ mme mfịna ẹmi ke akpatre. Mme utọ ikọ oro ẹtịn̄de ke “ekem ini” ẹkeme ndidi edidiọn̄!—N̄ke 15:23.
4 Tịn̄ Ban̄a Jehovah Ofụri Ini: Owo emi enyenede ntotụn̄ọ esịtekọm ọnọ Jehovah oyom ndibuana eti mbụk ye adan̄a ediwak owo nte ekekeme. (Ps. 40:8-10) Ke afan̄ emi nnyịn ikpenyene ndibụp idem nnyịn ite, ‘Ndi ami ke nnam ofụri se idaha mi ediyakde?’ Ye edinam ndusụk ukpụhọde oro owụtde eti ibuot, ediwak owo ẹmekụt nte ke mmimọ ima ikeme ndikabade ndi mme asiakusụn̄ ofụri ini. Edieke mme idaha ẹdude idahaemi mîyakke inam oro, nte nnyịn imekeme ndisịn enyịn̄ nte mme asiakusụn̄ unọ un̄wam? Sia ini Editi oro asan̄ade ekpere edide ini editat utom, ọfiọn̄ March ye April edidi ediye ini ndinam n̄kọri ke utom nnyịn ebe ke ndinam usiakusụn̄ unọ un̄wam.
5 Ẹn̄wam Mbufa Owo Ẹdiana ye Nnyịn ke Ndikọm Jehovah: Usọrọ Editi n̄kpa Jesus esiti nnyịn kpukpru ini aban̄a mme ntak ndikọm Jehovah nnyụn̄ ntoro enyịn̄ Esie. Emi enen̄ede edi eti ini ndisịn udọn̄ nnọ nditọ ukpepn̄kpọ Bible nnyịn ndidiana ye nnyịn ke nditịn̄ n̄kpọ an̄wan̄wa mban̄a itie edidem Jehovah. Sịn udọn̄ nọ mmọ nditie n̄kere ye akam mban̄a se ẹwetde ke ikpehe ekikere 7-9 ke page 173-175 ke n̄wed Ifiọk Oro Adade Osịm Nsinsi Uwem. Edieke mmọ ẹdotde, mmọ inyeneke ntak ndibet n̄kukụre koro mînyeneke ifiọk. Mme asuanetop ẹmi ẹsọn̄de idem ẹdu ndiwụt mmọ nte ẹnamde utom ukwọrọikọ Obio Ubọn̄. Edieke mbufa owo ẹkemede ndinyene uko nditịn̄ eti mbụk, mmọ ẹkeme ndinyene mbuọtidem nte ke Jehovah eyen̄wam mmimọ.—Utom 4:31; 1 Thess. 2:2.
6 Nnyịn ida nsinsi ufọn isọk idem nnyịn ọkọrọ ye mmọ en̄wen ke ini nnyịn iyomde ndikọm Jehovah kpukpru usen.