Bọ Ufọn To Ufọkn̄wed Utom Ukara Abasi eke 1996—Ikpehe 3
1 Apostle Paul okoyom nditọete esie ẹbọn̄ akam ke ibuot imọ man imọ ikeme ndinyene ukeme nditịn̄ eti mbụk ye uko. (Eph. 6:18-20) Nnyịn imoyom ndikọri ukem ukeme oro. Ke ntak oro, nnyịn imadara un̄wam oro Ufọkn̄wed Utom Ukara Abasi ọnọde, emi ẹsisịnde udọn̄ ẹnọ mme andidụk mbonoesop oro ẹdotde ẹte ẹsịn enyịn̄.
2 Nte nditọ ufọkn̄wed, nnyịn imesibọ ọkpọkpọ item ndin̄wam nnyịn ifori mme ukeme utịn̄ikọ ye eke unọ ukpep nnyịn. (N̄ke 9:9) Nnyịn imekeme n̄ko ndibọ ufọn nto ndikpan̄ utọn̄ nnọ item oro nditọ ufọkn̄wed eken ẹbọde, idade se nnyịn ikpepde isịn ke edinam ke idem nnyịn. Ke ini itịmde se ẹnọde ẹnam, nnyịn ikpenyene ndikpep ebiet emi ẹdade n̄kpọ ẹto ye ntịn̄enyịn man ikụt ite ke edinam an̄wan̄a oro nnyịn inamde ke n̄kpọ oro enen. Mme akpan n̄kpọ ye itien̄wed Abasi oro idade ẹkpenyene ndikem ye nte ẹtatde ofụri ibuotikọ oro. Edieke se ẹnọde ẹnam abuanade owo efen, ẹkpenyene ndinam ndomonse anyanini mbemiso ẹnamde ke ufọkn̄wed. Nte nnyịn inamde n̄kọri, ikpenyene ndisịn ukeme nditịn̄ ikọ ye unana edimomụm nsịn ke ibuot, ikamade mbio mbio uwetn̄kpọ utu ke n̄wed utịn̄ikọ oro ẹkotde-kot.
3 Kpukpru mbon oro ẹnyenede n̄kpọ ndinam ke ufọkn̄wed ẹkpenyene ndibabak ndisịm, ẹkpọn̄ babru Item Utịn̄ikọ mmọ ẹnọ esenyịn ufọkn̄wed, ẹnyụn̄ ẹtie ẹkpere iso ufọkmbono. Nditọete iban ẹkpenyene ndinam esenyịn ufọkn̄wed ọfiọk ke mbemiso nte mmọ ẹtịmde ndien m̀mê mmọ ẹdidada m̀mê ẹditetie ke ikpehe edinam mmọ. Ndidiana kiet ke mme usụn̄ ẹmi otịp n̄kpọ esịn ke ndutịm oro ọfọnde onyụn̄ an̄wam mbon oro ẹsede ẹban̄a mbot utịn̄ikọ ndibon kpukpru n̄kpọ ke nde mbemiso ini ekemde.
4 Nditịm Utịn̄ikọ Nọ 2: Uduak kiet odude ke edikot Bible edi ndin̄wam eyen ufọkn̄wed ofori ukeme ukot n̄wed esie. Didie ke ẹkeme ndisịm emi ke mfọnn̄kan usụn̄? Edikot se ẹnọde ẹnam uyo ọwọrọ ediwak ini edi mfọnn̄kan usụn̄ ndimehe ye enye. Eti ntịn̄enyịn ke nnennen edikot ikọ. Edieke ikọ iba ẹmi ẹnyenede ukem usụn̄ oro ẹbọpde ẹwọrọde nsio nsio n̄kpọ, ndimehe ye udọn̄ikọ oro eyen̄wam andikot ndikot nnennen.
5 Usụn̄ efen emi ẹkemede ndifori edikot ikọ edi ke ndikot nnọ owo en̄wen, owo emi esikotde ikọ ọfọn, onyụn̄ ọdọhọ enye esidọhọ fi atuak ada onyụn̄ enen̄ede fi kpukpru ini oro anamde ndudue. N̄ko, tịm kpan̄ utọn̄ nọ nti mme okot n̄wed nyụn̄ wụk ekikere ke adan̄aemi akpan̄de utọn̄ okop nte mmọ ẹkotde; tịm fiọk mme ikọ oro mmọ ẹkotde okpụhọde ye usụn̄ emi afo esikotde. Wet mmọ nịm nyụn̄ kpep mmọ. Idibịghike afo n̄ko eyesikot ikọ nnennen.
6 Mme ete ye eka ẹkeme ndin̄wam n̄kpri nditọ mmọ nditịm edikot n̄wed oro ẹnọde mmọ. Emi ekeme ndisịne edikpan̄ utọn̄ ke ini eyen anamde ndomonse ndien ekem ẹnọ enye nti ekikere kaban̄a edinam n̄kọri. Ini ẹnọde ekem ibio ibio ntọn̄ọikọ ye utịtikọ oro odotde emi owụtde nte ẹkemede ndida mme akpan n̄kpọ nsịn ke edinam. Ntem ke eyen ufọkn̄wed ofori ukeme esie nditịn̄ ikọ ye unana edimomụm nsịn ke ibuot.
7 Andiwet psalm ama eben̄e ke akam ete: “O [Jehovah] tat mi n̄kpọk-inua; ndien inua mi eyetịn̄ itoro fo.” (Ps. 51:15) Nnyịn ndibuana ke Ufọkn̄wed Utom Ukara Abasi akpakam an̄wam nnyịn ndiyụhọ ukem udọn̄ emi.