Magazine Usem Hausa
1 Nte mbufo ẹmenyene mbon ẹsemde Hausa ke efakutom mbufo? Nte eyịghe mîdụhe kpukpru esop ke Edem Edere ẹyebọrọ ih. Edi nso kaban̄a Edem Usụk? Ediwak mbon ẹmi ẹsemde Hausa ẹdu ke ediwak ikpọ obio ke Edem Usụk n̄ko. Ẹkam ẹsikụt mmọ ke n̄kpri obio ye mme obio-in̄wan̄ idụt emi. Nte esop mbufo enyene akpan ibat magazine usem Hausa oro ẹsibọde?
2 Nnyịn isịn udọn̄ inọ mme esop oro ẹnyenede ndusụk mbon oro ẹsemde Hausa ke efakutom mmọ nditobo akpan ibat oro ẹyomde ke nsụhọde n̄kaha ibat magazine usem Hausa ifan̄ kpukpru ọfiọn̄. Ẹnọ ekikere ẹte ikpọ esop ẹtobo ke nsụhọde n̄kaha idem Enyọn̄-Ukpeme usem Hausa ition ke ọfiọn̄ kiet kiet. Ẹti ẹte ke ẹmịn̄ enye kpọt inikiet ke ọfiọn̄. N̄kpri esop ẹkeme nditobo magazine iba m̀mê ita. Akpana kpukpru asiakusụn̄ ẹnyene editobo kiet kpukpru ọfiọn̄ ke nsụhọde n̄kaha edieke mmọ ẹnyenede owo ekededi emi esemde Hausa ke efakutom mmọ. Nte ededi, mbon ẹmi ẹdude ke ikpehe oro ẹsemde Hausa ẹyeyom nditobo se ikam iwakde ikan oro. Nte ededi, ẹkụt ẹte ke mme editobo ẹkọn̄ọ ke se nditọete ẹdibọde kpukpru ini.
3 Mme asuanetop ye mme asiakusụn̄ ẹkpenyene ndidu ke edidemede ndinyene ndusụk magazine usem Hausa ye mmọ ke ini ẹkade utom ukwọrọikọ, m̀mê ke ini ẹkade urua. Dụn̄ọde yom mme andikot Hausa nyụn̄ nọ mmọ magazine. Edieke ndusụk owo ẹmade ndikot mme magazine oro, sịn mmọ ke afan̄ magazine fo man otodo afo esinọ mbufa nsiondi Enyọn̄-Ukpeme usem Hausa kpukpru ọfiọn̄ ke ini ẹwọrọde ẹdi.
4 Ẹti se Jesus eketịn̄de aban̄a usen nnyịn ke Mark 13:10 ete: “Ndien ẹnyene ndibem iso n̄kwọrọ gospel nnọ kpukpru mme idụt.” Oro esịne akwa ibatowo oro nnyịn inyenede ẹmi ẹsemde Hausa—n̄kpọ nte owo miliọn 40. Ẹmịn̄ nsiondi Enyọn̄-Ukpeme eke Hausa idahaemi ke ọyọhọ uduot, ukem nte mme usem eken. Ẹyak kpukpru nnyịn ida ediye n̄kpọutom emi inam n̄kpọ nte ọfọnde man an̄wam nnyịn ke ndikwọrọ eti mbụk nnọ kpukpru owo ke efakutom oro ẹnọde nnyịn.