Yom Mbon Oro Ẹnyenede Esịt Akpanikọ
1 Kiet ke otu uduak utom ukwọrọikọ edi ndiyom mbon oro “ẹnyenede esịt akpanikọ kaban̄a nsinsi uwem.” (Utom 13:48, NW) Edisuan Enyọn̄-Ukpeme ye Awake! edi mfọnn̄kan usụn̄ ndinam emi, sia mme magazine nnyịn ẹsinamde mme owo ẹdiọn̄ọ idotenyịn Obio Ubọn̄. Nnyịn idinọ editobo Enyọn̄-Ukpeme ke April. Ke ebiet owo mîbọhọ editobo, ẹkeme ndinọ mme idem magazine kiet kiet. Ye idotenyịn, ke ebiet emi ẹkụtde udọn̄, nnyịn imekeme nditọn̄ọ mbufa ukpepn̄kpọ Bible ke n̄wed oro Ifiọk Oro Adade Osịm Nsinsi Uwem. Ndusụk ekikere ẹmi ẹkemede ndinyene ufọn nnọ fi ẹdi ẹmi:
2 Ke akamade “Enyọn̄-Ukpeme” eke April 1, afo emekeme ndiwụt “Ẹtoro Nsinsi Edidem!,” emi owụkde ntịn̄enyịn ke utịn̄ikọ an̄wa mbono district nnyịn isua oko, onyụn̄ ọdọhọ:
◼ “Ediwak mbon oro itịn̄de ikọ inọ ẹnyene mbuọtidem ke Abasi. Ọsọn̄ mbon eken ndinịm enye ke akpanikọ. Afo ekere didie? [Bet ibọrọ.] Ataata uyarade ẹmi ẹwụtde nte ke anaedi Abasi odu ẹkan nnyịn ẹkụk. [Kot Psalm 104:24.] Ke ini nnyịn ikụtde kamara m̀mê kọmputa, nnyịn imesisọp inyịme ke anaedi ọdiọn̄-ndudiọn̄ emi enyenede ifiọk akanam enye. Nte okpowụt ifiọk ndidọhọ ke mme n̄kpọ oro ẹwakde n̄kukọhọ ẹkan, utọ nte isọn̄ ye nnyịn mme owo ikọtọn̄ọ ke mbuari?” Da ikpehe ekikere kiet ke ibuotikọ oro wụt eti ntak kaban̄a edinịm Abasi ke akpanikọ. Ekem nọ editobo.
3 “Enyọn̄-Ukpeme” eke April 15 akama ibuotikọ oro “Ntak Ido Ukpono Akpanikọ Ọbọde Edidiọn̄ Abasi.” Afo emekeme ndibụp:
◼ “Ye ediwak ido ukpono ke mme itie ikie ẹmi ẹdude ke ererimbot, nte afo emekere ke Abasi ekeme ndinyịme kpukpru mmọ? [Bet ibọrọ.] Jesus ama ebem iso etịn̄ ete ke kpa ye se ediwak mbon ido ukpono ẹdọhọde, ẹyesịn mbon oro mînamke uduak Abasi. [Kot Matthew 7:21-23.] Edi akpan n̄kpọ nte nnyịn idiọn̄ọ ido ukpono akpanikọ oro Jesus ekekpepde.” Kụbọde ka ibuotikọ oro “Nso Mfri ke Ana Ido Ukpono Akpanikọ Osion̄o?,” emi ọtọn̄ọde ke page 16, nyụn̄ neme uwụtn̄kpọ kiet man anam akpan n̄kpọ emi an̄wan̄a. Ekem nọ editobo.
4 Ke ini owụtde akpan ibuotikọ ke “Awake!” eke April 22, “When Wars Will Be No More” (Ke Ini Ekọn̄ Mîdidụhe Aba), afo emekeme ndikere mban̄a edidọhọ:
◼ “Ke isua ikie emi ediwak ekọn̄ ke mme itie ikie ẹdu, esịnede ekọn̄ ererimbot iba. Kpa ye oro ekpere ndidi kpukpru mme adaiso ererimbot ẹdọhọ ke mmimọ imeyom emem. Kpukpru owo oro ndiọn̄ọde ẹtịn̄ ukem n̄kpọ kiet. Edieke kpukpru owo ẹyomde emem, ntak emi mmọ mîkemeke ndinyene enye? [Bet ibọrọ.] Afo ekere ke nnyịn iyom nso man ikụt ata emem ke isọn̄?” Ke enyeneufọk ama ọkọnọ ibọrọ, kụbọde ka page 8 ye 9 nyụn̄ kot mme utọ itien̄wed nte Psalm 46:8, 9. Ke adade mme ndise ye mme itien̄wed Abasi ẹkotde ẹsịn, wụt nte Obio Ubọn̄ Abasi edidade emem ofụri ererimbot oro edibịghide ke nsinsi edi. Ke itie emi dọhọ ẹbọ editobo Enyọn̄-Ukpeme. Edi edieke owo mîbọhọ editobo, emekeme ndinọ idem magazine kiet kiet ndien afo emekeme ndidiomi ndifiak n̄waha.
5 Edieke afo okụtde ediwak owo ẹmi ẹdọhọde ke mmimọ inyeneke ini, afo emekeme ndidomo emi nse:
◼ “Nnyịn inyene udọn̄ ke ndin̄wam mbon oro mînyeneke ini ẹmi ẹnyụn̄ ẹnyenede esisịt ini ndikere mban̄a n̄kpọ eke spirit ke uwem. Ẹtịm mme magazine nnyịn, Enyọn̄-Ukpeme ye Awake!, ndinọ ibio ibio ntọt ẹban̄ade mme akpan mfịna ẹtụkde fi ye ubon fo. N̄kpama ndikpọn̄ mmọemi nnọ fi okot.”
6 Tịn̄ enyịn ke ndiyom mbon ẹnyenede esịt akpanikọ. Mmọ ke akpanikọ ẹyebọ ufọn ẹto edikot Enyọn̄-Ukpeme ye Awake!, ẹmi ẹdade ‘eti mbụk eti n̄kpọ’ ẹdi.—Isa. 52:7.