Ekebe Mbụme
◼ Nso idi nnennen usụn̄ edida mme ikọ oro “brọda” ye “sista” nnam n̄kpọ?
Ke ini ẹdade ke ataata usụn̄ ifiọk ẹnam n̄kpọ, mme ikọ oro “brọda” ye “sista” ẹda ẹban̄a mme owo ẹmi ẹnyenede ukem ete ye eka. Ndammana itie ebuana emi esinam ufiop ufiop mbọbọ odu, ndien mbọbọ n̄kaowo, eke n̄kann̄kụk, ye eke ntụk ototịm anam n̄kpet n̄kpet ebuana emi mme owo ẹmi ẹnyenede aka iso ọsọn̄.
Jesus ama ekpep mme mbet esie ndikot Jehovah ke akam nte “Ete nnyịn.” Edida ikọ oro owụt ke nte mme Christian, kpukpru nnyịn idi ubak ekpụk ubon adianade kiet emi nnyịn idarade eti itie ebuana eke spirit. Jesus ama aka iso ọsọn̄ọ etịn̄ emi ke ini enye ọkọdọhọde mme anditiene enye ete ke “kpukpru mbufo ẹnyụn̄ ẹdi nditọ-ete.”—Matt. 6:9; 23:8.
Ke ntak n̄kpet n̄kpet mbọbọ eke spirit nnyịn ke otu ikọtufọk Abasi, nnyịn isikot kiet eken “Brọda” ye “Sista,” akpan akpan ke mme mbonoesop. Ke mme edinam eke spirit ẹmi, owo emi esede aban̄a mbonoesop oro ọdiọn̄ọ mme owo ẹmi ẹma ẹkana baptism ke ndida ikọ oro “brọda” m̀mê “sista” mbemiso akpatre enyịn̄ owo oro enye okotde.
Nso edieke owo oro mînaha baptism oyomde nditiene mbuana ke mbonoesop? Ke owo ama akabuana ye ikọt Jehovah ke ndusụk ini onyụn̄ anam n̄kpọ ebịne uyakidem, adade idemesie nte kiet ke otu Mme Ntiense Jehovah, ubiọn̄ọ ndomokiet idụhe ndida “Brọda” m̀mê “Sista” mbemiso akpatre enyịn̄. Emi ekpedi ntre akpan akpan edieke edide owo emi ama akabade edi asuanetop oro mînaha baptism.
Ke n̄kan̄ eken, mbon ẹmi ẹnyenede udọn̄ ẹmi ẹsụk ẹtọn̄ọde ndidụk mme mbonoesop nnyịn ke ndondo emi inamke kan̄a mme usio-ukot oro ẹnamde ẹdiọn̄ọ mmọ nte ubak ikọtufọk Abasi. Owo idikotke mme owo ẹmi “Brọda” m̀mê “Sista,” sia mmọ mîdụhe ke itie ebuana eke spirit ke ubon Abasi. Ntre ke mme mbonoesop, nnyịn iyekot mmọ ke ataata usụn̄, idade udorienyịn̄ oro odotde utọ nte “Ete” ye akpatre enyịn̄ mmọ.
Ndida mme ikọ oro “brọda” ye “sista” ke mme mbonoesop nnyịn owụt mbọbọ oro ekperede akan onyụn̄ ọsọn̄de urua akan ekededi oro ẹwụtde ke edida mme akpa enyịn̄. Enye eti nnyịn aban̄a eti itie ebuana oro nnyịn idarade nte ubon eke spirit ke idak Ete kiet, kpa Jehovah Abasi. Ẹti nnyịn n̄ko ẹban̄a ntotụn̄ọ ima oro inyenede inọ kiet eken.—Eph. 2:19; 1 Pet. 3:8.