‘Ẹsịn Esịt Ẹnam Nti Utom’ ke April!
1 Isua oko ẹma ẹnọ anana-mbiet ikọ ntiense ke ini ẹkesuande ediwak miliọn Mbụk Obio Ubọn̄ Nọ. 34 ke ofụri ererimbot. Mme asuanetop esop ye mme asiakusụn̄ ukem ukem ẹma ẹsịn ifịk ndibuana ke aduai-owo-idem utom emi. Nte afo ama esịne ke otu mmọ? Edieke edide ama esịne, eyịghe idụhe nte ke afo ama enen̄ede okop idatesịt ndinyene udeme ke n̄wọrọnda ubịnikọt oro. Kemi eyedi afo emeyịk ete, Ewe ‘eti utom’ ana ebet nnyịn ke isua emi?—Titus 2:14.
2 Ke April ye ntọn̄ọ ntọn̄ọ May, nnyịn iyekop inemesịt ndisuan akpan nsiondi magazine Awake! eke April 22, 1996, emi ọdọhọde “When Wars Will Be No More” (Ke Ini Ekọn̄ Mîdidụhe Aba). Sia ibuotikọ emi edidemede udọn̄ ediwak mme enyeneufọk, nnyịn iyedomo ukeme ndisuan magazine emi ata ntatara ntatara nte ikekeme. Ke ikerede iban̄a akpan ntọt emi enye akamade, ẹkpenyene ndinọ nsiondi Awake! emi ke April onyụn̄ ebede odụk May, tutu ibat ẹkenọde okụre.
3 Utịtmbuba Nnyịn—Kpukpru Asuanetop Ndibuana: Ke akpanikọ edidi n̄kpọ emi akamade nsịnudọn̄ etieti edieke kpukpru asuanetop ke idụt emi ẹdikemede ndibuana ke utom ukwọrọikọ ke April. Ke ẹsụk ẹkụrede Editi n̄kpa Christ, nnyịn ke akpanikọ iyeyom ndiwụt esịtekọm kaban̄a mfọn Abasi ebe ke ndinọ nnennen “uwa ekọm” ke an̄wautom.—Heb. 13:15.
4 Ẹkpenyene ndisịn ifịk ifịk ukeme man ẹfiọk udọn̄ kpukpru mme andibuana ke esop man otodo kpukpru owo ẹkeme ndinyene ifịk ifịk ebuana ke utom ukwọrọikọ ke April. (Rome 15:1) Mme ada ukpepn̄kpọ n̄wedesop ẹkpenyene nditịm mfiọk mme idaha mbon oro ẹdude ke otu mmọ ẹnyụn̄ ẹnọ nti un̄wam ke ini oyomde. Nte odu owo ekededi oro oyomde n̄kpọisan̄? Anie ekeme ndinọ? Nte ndusụk owo ẹsikop bụt m̀mê ndịk? Nte mme asuanetop oro ẹtịmde ẹnyene ifiọk ẹkeme ndisan̄a ye mmọ? Nso kaban̄a mbon n̄kpọnnam m̀mê mbon oro ẹdọn̄ọde? Nte mmọ ẹkeme ndibuana ke edinọ ikọ ntiense ebe ke ediwet leta m̀mê ke ndusụk utom en̄wen oro enyenede uforo?
5 Ndusụk mbon oro mînamke utom aba ke ẹbọ nsịnudọn̄ eke spirit ofụri ini, ndien mmọ ẹkeme ndikop nsịnudọn̄ nditiene mbuana ini kiet en̄wen ke utom ukwọrọikọ. Edida san̄asan̄a Awake! nnam ubịnikọt eyenọ mmọ mfọnn̄kan ifet ndifiak nnam utom.
6 Nọ N̄kpri Owo Ukpep Nditiene Mbuana: Ediwak nditọ Mme Ntiense Jehovah ẹmetiene mme ete ye eka mmọ ẹsan̄a ke ufọk ke ufọk ke ediwak isua, okposụkedi mmọ mînamke utom kan̄a nte mme asuanetop oro mînaha baptism. Nte ini edi emi ọnọ mmọ nditọn̄ọ? Nte onụk mmọ oto esịt ẹnyụn̄ ẹben̄e idem ndinyene ebuana oro enyenede se ọwọrọde ke utom eke ufọk ke ufọk? Mme ibuotufọk ẹkpenyene ndida ifet odude ke ini ukpepn̄kpọ Bible ubon ndin̄wam nditọ mmọ oro ẹdotde nditịm nneme ekekem ye isua emana ye ukeme owo kiet kiet. Mbon oro ẹkponide ẹkeme ndimek mbụme oro anamde ẹkere n̄kpọ emi ẹdidade ẹdemerede udọn̄ enyeneufọk ndien ekem ẹnyan ubọk ẹwụt ibọrọ ke magazine oro. N̄kpri nditọ ẹkeme ndinọ ikọ ntiense oro enyenede uforo ke ikọ ifan̄ kpọt. Ke uwụtn̄kpọ, mmọ ẹkeme ndisịn udọn̄ nnọ enyeneufọk ẹte “okot akpan magazine oro ẹnọde ke ofụri ererimbot ọfiọn̄ emi.” Nte ubak ntịmidem oro ubon fo anamde, kụt ete imesịn mme ekikere ndida n̄kan mme ọsọ ubiọn̄ọ. Afo eyekụt ediwak nti ekikere ke n̄wed Reasoning. Ke mme ini udia ye mme idaha eken oro ẹdotde, sịn udọn̄ nọ mme andibuana ke ubon ndibụk mme ifiọkutom oro mmọ ẹkenyenede ke an̄wautom.
7 Nditọ Ukpepn̄kpọ Bible Ẹmi Ẹdotde Ẹnam Utom Oro Jesus Akanamde: Jesus ikanamke unọ ukpep esie etre ye edinọ ukpep ke mme ukpepn̄kpọ ido ukpono. Enye ama esisan̄a ye nditọ ukpepn̄kpọ esie ke utom ukwọrọikọ onyụn̄ ekpep mmọ nte ẹkwọrọde ikọ. (Luke 8:1; 10:1-11) Idaha etie didie mfịn? Ẹnịm ukpepn̄kpọ Bible ẹwakde ẹbe mbahade miliọn kiet ke itie inan̄ ke Nigeria. Eyịghe idụhe, ye eti nsịnudọn̄ ediwak ke otu nditọ ukpepn̄kpọ ẹmi ẹkeme ndinam udiana usio-ukot ke ukpep mmọ ẹnyụn̄ ẹdot ndinam utom nte mme asuanetop oro mînaha baptism ke April.
8 Edieke afo onịmde ukpepn̄kpọ Bible, kere ban̄a mme mbụme ẹmi: Nte eyen ukpepn̄kpọ ke anam n̄kọri, asan̄ade ekekem ye isua emana ye ukeme esie? Nte enye ọtọn̄ọ ndibuana mbuọtidem esie ke ido nneme ye mmọ en̄wen? Nte enye ke emen “obufa owo” esịne? (Col. 3:10) Nte enye osịm se inamde owo odot nte mme asuanetop oro mînaha baptism, oro ẹwụtde ke page 97 osịm 99 ke n̄wed Utom Nnyịn? Edieke afo onịmde ke akpanikọ ke enye odot, ntak mûnemeke n̄kpọ emi ye enye? N̄kukụre se ndusụk nditọ ukpepn̄kpọ ẹyomde edi edinọ nnennen ikot ndibuana ke utom emi. Nte ededi, edieke eyen ukpepn̄kpọ onyịmede, eyebem iso oyom esenyịn oro etiede ibuot odiomi mbiowo iba ndinyene nneme nte ido edide. Ke n̄kan̄ eken, n̄kpọ ekeme ndimụm eyen ukpepn̄kpọ oro nnịm. Ndusụk ebiowo kiet ekeme ndisan̄a ye afo n̄ka ukpepn̄kpọ Bible onyụn̄ anam eyen ukpepn̄kpọ oro etịn̄ mme ekikere esie kaban̄a akpanikọ. Ke ama akakpan̄ utọn̄ ke se eyen ukpepn̄kpọ enyenede nditịn̄, ebiowo ekeme ndinọ nti ekikere, ọkọrọ ye un̄wam N̄wed Abasi.
9 “Ẹdedep Ifet” Ndinam Usiakusụn̄ Unọ Un̄wam: Kpukpru isua ke ini Editi, esịtekọm oro ẹnyenede ẹnọ ufak oro esinụk ediwak tọsịn owo ‘ndidedep’ ifet man ẹdi mme asiakusụn̄ unọ un̄wam. (Eph. 5:15-17) Okposụkedi oyomde ndusụk n̄waidem, mme utịp ẹkponi. Eti ibat mme uyen ẹsida ini nduọkodudu ufọkn̄wed ẹnam usiakusụn̄ unọ un̄wam. Ikpọ owo ẹmi ẹnamde utom idibi udia uyọhọ ini ẹsida mbubịteyo ye mme utịturua ẹnam n̄kpọ ọyọhọ ọyọhọ ke ukem edinam emi. Ntem, ofụri ubon esida ifet ndinam utom usiakusụn̄ ọtọkiet! Ke ndusụk esop ekese mbiowo ye mme asan̄autom unamutom ye iban mmọ ẹma ẹsịn enyịn̄ nte mme asiakusụn̄ unọ un̄wam. Ke ẹbọde nsịnudọn̄ ẹto ifịk ifịk uwụtn̄kpọ mmọ, mbon eken ẹma ẹtiene ẹnam kpa ntre, tutu ediwak owo ke esop ẹnam utom nte mme asiakusụn̄ unọ un̄wam ke April.
10 Edide afo emekeme ndinam usiakusụn̄ unọ un̄wam m̀mê ukemeke, yom mme usụn̄ ndinam utom fo ọkọri ke an̄wautom ke April. Nịm ọkpọkpọ utịtmbuba nọ idemfo, enyeoro ediyomde ndusụk ukeme ndisịm edi oro ẹkemede ndisịm. Udọn̄ fo ke ‘ndida se enyenede nnam n̄kpọ’ ke utom Jehovah, nte ekemde ye mme ọkpọkpọ idaha fo, eyenyene edidiọn̄ esie.—2 Cor. 12:15.
11 Mme Mbono An̄wautom: Ẹkpenyene ndidiomi mme mbono an̄wautom ke kpukpru usen ubịnikọt Awake! oro, ke ini oro ediyakde ẹtọn̄ọ utom ukwọrọikọ ke eti ini. Ẹkpenyene ndinam ndutịm n̄ko nnọ unọ ikọ ntiense mbubịteyo. Ekese mme asuanetop ẹdibuana ke an̄wautom ke mme utịturua, ke ntre mme esop ẹkpenyene ndidiomi mme mbono an̄wautom ke mme Saturday, ke usenubọk ye uwemeyo, ke ini ẹdisuande san̄asan̄a Awake! emi.
12 Mbon oro ẹnịmde mme mbono an̄wautom ẹkpenyene ndikụt nte ke efakutom odu ekem. Ẹkpenyene ndibem iso n̄kụre efakutom oro owo mînamke utom ke ndondo emi. Nte ededi, owo ikpenyeneke ndinam utom ke efakutom oro owo mîbahakede inọ owo emi N̄ka esede aban̄a ye unana edibọ unyịme nto N̄ka. Nte afo emenyene ọkpọkpọ efakutom kiet m̀mê akande oro, emi owo mîkụreke ke ndondo emi? Edieke afo ediyomde un̄wam ke ndinam utom ke mmọ ke ini ubịnikọt emi, sian esenyịn utom m̀mê eyenete oro esede aban̄a efakutom ndien mmọ ẹyekop inemesịt ndinam ndutịm nnọ fi man enyene ndusụk un̄wam.
13 Magazine Ifan̄ ke Afo Edinịm? Mbụme oro enyene owo kiet kiet ndibọrọ. Ke ndibiere m̀mê magazine ifan̄ ke afo edikeme ndinịm ke ini ubịnikọt oro, kere ban̄a utọ efakutom oro afo edinamde utom, isua emana fo, nsọn̄idem fo, ini emi afo edikemede ndisịn ke utom oro, ye mme n̄kpọ eken. Tịm fiọk, nte ededi, n̄kpọ editi oro ẹkenọde ke nsiondi Enyọn̄-Ukpeme eke January 1, 1994: “Nte ekikere ẹnọde, mme asuanetop ẹkeme ndinyene utịtmbuba edinịm, yak idọhọ, mme magazine 10 kwa ọfiọn̄, ọkọn̄ọde ke mme idaha mmo; mme asiakusụn̄ ẹkeme ndidomo ndinịm 90.” Nte ukem utịtmbuba oro ekeme ndidi ata idem n̄kpọ nnọ fi?
14 Mbiowo—Ẹyom Ndutịm Oro Ẹtịn̄de Enyịn: Edieke ẹkemede, ẹkụt ẹte ẹda san̄asan̄a nsiondi Awake! emi ẹnam utom ke kpukpru efakutom esop. Ẹkpenyene ndinọ eti ntịn̄enyịn ke ndinam utom ke efakutom mbubehe oro ẹbahade ẹnọ esop. Mbon oro ẹnamde utom do ẹkpenyene nditịm idem mfọn mfọn ẹnyụn̄ ẹsịne n̄kpọ nte eyede. Owo iyomke anyan nneme. Ke ini akade ebịne owo mbubehe, afo emekeme ndidọhọ ke imọ isiwakke ndisobo mbon mbubehe ke ufọk, ntre ke imọ iwaha itie mbubehe esie man iwụt ibuotikọ oro edinen̄ede edi n̄kpọ udọn̄ ọnọ enye. Ekem afo emekeme ndibuana akpan n̄kpọ kiet ibio ibio ke magazine oro. Ẹkpenyene n̄ko ndidiomi nte odotde ndida mme magazine nnọ ikọ ntiense efak ke efakutom esop. Usụn̄ oro otịmde enyene uforo akan ke ndibuana ke utom efak edi ndinam usio-ukot nnyụn̄ nsan̄a mbịne mbon ẹmi ẹsan̄ade ẹbe, utu ke ndibebet mmọ ẹsan̄a ẹbịne fi. Sia afo edidide se kpukpru owo ẹsede, afo ekpenyene ndikama idem ke usụn̄ oro owụtde uku. Mme ebiet en̄wen ẹkeme ndidu ke efakutom mbufo ẹmi ẹkemede ndinam utom ke ini ubịnikọt emi, utọ nte an̄wambehe ubomofụm, ufọkibọk, itie ubon moto, ye urua. Otu mbiowo ẹkpenyene ndibiere ndutịm oro odotde emi ẹkemede ndinam nnọ edinọ ikọ ntiense ke mme ikpehe ẹmi ke efakutom esop mbufo.
15 Jehovah edi anamutom emi mîkpaha mba. (John 5:17) Enye okobot enyọn̄ ye isọn̄ ọkọrọ ye mme eto ye mme unam; edi enye ama aka iso anam utom tutu enye obot akakan ke utom esie ke isọn̄—kpa owo. Akpanikọ oro nte ke nnyịn imenyene uwem edi nnennen utịp otode unyịme oro Abasi onyịmede ndinam utom. Nte “mme andikpebe Abasi,” ima oro inyenede inọ enye ekpenyene ndinụk nnyịn ‘ndisịn esịt nnam nti utom.’ (Eph. 5:1; Titus 2:14) Sia Jehovah odotde ndibọ mfọnn̄kan ukeme oro nnyịn isịnde ndien sia udọn̄ ndikụt mme utịp edide edu owo emi esịnde ifịk, akpana nnyịn inyene udọn̄ ke ndinam eti uduot utom ke utom ukwọrọikọ. Nte ededi, Jehovah esidara n̄waidem ekededi oro inamde inọ enye, ndien utom nnyịn idehede idi ke ikpîkpu. (1 Cor. 15:58) Ntre, ye esịtekọm, ẹyak nnyịn inam ifịk ifịk utom ke April, inyenede mbuọtidem ke unyịme ye edidiọn̄ Jehovah ye ekese unen!