Mme Mbono An̄wautom

¹ Utom Obio Ubọn̄ Nnyịn eke August 1995 ama ọnọ ndusụk ndausụn̄ kaban̄a mme mbono an̄wautom. Ẹnam ndusụk ukpụhọde idahaemi ke se ẹkewetde ke ibuotikọ oro. Enye ọkọdọhọ ete ke ini ekededi oro ẹnịmde mbono an̄wautom ke Ufọkmbono Obio Ubọn̄ ke mbonoesop usenubọk Sunday asuanade, owo kiet ekpenyene ndinịm mmọ kpukpru ini, ye otu ukpepn̄kpọ n̄wedesop kiet kiet ẹsopde idem ọtọkiet ke nsio nsio itie ke Ufọkmbono Obio Ubọn̄ oro; mme ada ukpepn̄kpọ ẹkenyene ndinọ efakutom ẹnyụn̄ ẹdian owo ke otu mmọ kiet kiet, ndien ekem ẹbọn̄ akam ediberi kiet ẹnọ kpukpru owo.

² Ẹnam edinen̄ede idahaemi ọnọde mme esop ifet ndidiomi se ifọnde ikan ke mme idaha n̄kann̄kụk mmọ. Ke ndusụk idaha ekeme ndiyom ẹnịm mbono an̄wautom kiet. Ke mme idaha eken ekeme nditịm mfọn otu ukpepn̄kpọ n̄wedesop kiet kiet ndinyene mbono an̄wautom mmọ ke nsio nsio itie ke Ufọkmbono Obio Ubọn̄ nte ekemde ye otu ukpepn̄kpọ n̄wedesop. Oro enen̄ede edi ntre akpan akpan ke ebiet emi ẹnyenede nsio nsio itie, utọ nte udiana ufọkn̄wed, itie ubonn̄wed, m̀mê mme itie en̄wen ke okụre mbufo ẹmi ẹdiyakde mme otu ẹsop idem san̄asan̄a ye unana edifịna kiet eken. Nnyịn iyak emi inọ mbiowo ndida mbufiọk mbiere nte ekemde ye mme idaha mmọ.

³ Ukem oro ke edi ye akam. Ẹkeme ndibọn̄ akam mbemiso mîdịghe ke ẹma ẹkenọ efakutom ẹnyụn̄ ẹdian owo. Mme idaha n̄kann̄kụk ẹdibiere se idifọnde ikan. Akpan n̄kpọ edi nte ẹbem iso ẹnam ndutịm ke Ufọkmbono Obio Ubọn̄, mbemiso otu ọwọrọde aka efakutom, man otodo ikpọ otu nditọete oro ẹbetde-bet ke efakutom okûdu. Nte ededi, edieke owo edide edisịm otu ke ukperedem, ẹkeme ndinọ mmọ efakutom ye owo.

⁴ Ke ntre, mme ibet oro ẹbọpde-bọp ẹnịm idụhe kaban̄a nte ẹkpenịmde mbono an̄wautom. Edi kpukpru owo ẹkpenyene ndidomo ndinam n̄kpọ mbịne edidianakiet ye emem ke otu nditọete, man mmọ ẹkeme ndinyene ọyọhọ ebuana ke utom an̄wautom. Mme idaha n̄kann̄kụk ẹkpenyene ndibiere se ifọnde ikan nnọ esop, ẹnyenede item N̄wed Abasi ke 1 Corinth 14:40 ke ekikere: “Ẹnam kpukpru n̄kpọ ke nde ye ke ido nte eyede.”