Tịn̄ Akpanikọ nọ Mbọhọidụn̄ Fo
1 Kiet ke otu n̄kponn̄kan ibet iba edi: “Ma mbọhọidụn̄ fo nte idem fo.” (Matt. 22:39) Utọ ima oro eyenụk nnyịn ndibuana mfọnn̄kan n̄kpọ oro inyenede ye mbọhọidụn̄ nnyịn—kpa akpanikọ oro nnyịn ikụtde ke Ikọ Abasi. Sia magazine Enyọn̄-Ukpeme ye Awake, ẹnamde etop akpanikọ Bible atara, ndisuan mme magazine ẹmi ke ọfiọn̄ May edi usụn̄ kiet nnyịn ‘nditịn̄ akpanikọ nnọ mbọhọidụn̄ nnyịn.’—Eph. 4:25.
2 Ẹkpenyene ndinọ “Awake!” eke April 22 tutu se ẹkebọde okụre. Afo emekeme nditọn̄ọ nneme fo ebe ke ndibụp ete:
◼ “Afo ekere didie aban̄a ererimbot oro ekọn̄ mîdidụhe aba? [Bet ibọrọ.] Ndi afo ama ọfiọk ete ke mme ido ukpono ererimbot ẹnen̄ede ẹsịn udọn̄ ẹnọ mme ekọn̄ ye uwotowo? [Bet ibọrọ.] Ke edide ata isio, tịm fiọk se Bible ọdọhọde nte ata mme andituak nnọ Abasi ẹdinamde.” Kot Isaiah 2:2-4 ke enyọn̄ page 4 eke magazine emi, ndien ekem ke page 10 kot akpa ikpehe ekikere ke idak ekpri ibuotikọ oro “Calling to Lovers of Peace” (Ikot Ẹnọde Mme Ama Emem). Ekem, bụp: “Nte afo ọmọfiọk nte Abasi edinamde oro? Ibọrọ odu ke magazine emi, ndien okwo edikotde edi emi. Enye edi ke etịbe ₦20 kpọt.”
3 Ke ini ọnọde “Enyọn̄-Ukpeme” eke May 15, domo nditịn̄ ntụk mbụk n̄kpọntịbe ndondo emi oro esịnde mme owo ẹkop ndịk, ndien ekem bụp ete:
◼ “Afo ekere ke nso ke edikpa man ẹnam nnyịn inen̄ede ikop ifụre ke uwem emi? [Bet ibọrọ.] Ke nditịn̄ ofụri akpanikọ, nte owụt ifiọk ndiberi edem ke mme owo ndikọk mme mfịna oro ubonowo osobode? [Bet ibọrọ; ekem kot Psalm 146:3.] Ekem andiwet psalm ọnọ nnyịn ntak ndinyene idotenyịn kaban̄a ini iso. [Kot Psalm 146:5, 6.] Ibuotikọ emi, ‘Ata Ifụre—Idahaemi ye ke Nsinsi,’ anam an̄wan̄a ntak emi nnyịn ikemede ndiberi edem ke Jehovah Abasi ndida mme idaha oro ẹfọnde ndi ke isọn̄.” Nọ mme magazine nyụn̄ diomi ndifiak ndi ndineme mban̄a nte ẹkemede ndidara ifụre uwem idem idahaemi.
4 Ke ikerede iban̄a ntatara unana udọn̄ ke ido ukpono ke ofụri ererimbot, ekeme ndidi ẹyetịm ẹma mme ibuotikọ ẹdude ke “Awake!” eke April 8, 1996. Afo emekeme ndiwụt magazine oro ke ndidọhọ ete:
◼ “Ediwak owo mfịn ẹmesion̄o idem ẹkpọn̄ ido ukpono mmọ mîdịghe iwụtke ifịk ido ukpono aba. Afo ekere ke nso idi ntak?” [Bet ibọrọ nyụn̄ toro enyeneufọk.] Afo emekeme ndika iso ke ndidọhọ ete: “Ke ntak mbubịk ke otu mme adaiso ido ukpono, ediwak owo inyeneke aba udọn̄ ke esop ido ukpono ekededi. Edi nte afo emekere ke ido ukpono enen̄ede anam n̄kpọ?” [Bet ibọrọ.] Wụt enyeneufọk page iso magazine oro nyụn̄ kot ibuotikọ oro, “Nte Ido Ukpono Enyene N̄kpọ Ndinam Aba?” Dụri ntịn̄enyịn ka akpa ibuotikọ iba ke magazine oro, nyụn̄ kot ikọ oro ẹkotde ẹsịn ke page 9 ke idak ibuotikọ oro “Nte Mme Usen Ido Ukpono Ẹmọn̄ Ẹsịm Utịt?” Kụbọde ka Isaiah 11:9, itien̄wed Abasi oro ẹkotde ikọ oro ẹto. Ekem nọ mme magazine, ọdọhọde ete: “Mma mfiak ndi nyama ndineme ye afo mban̄a nte ẹkemede ndikụt ido ukpono oro Abasi onyịmede.”
5 Edieke emekde ibio ibio nneme, afo emekeme ndidomo emi:
◼ “Ediwak owo ẹkere ke ekese ke otu mme ọwọrọetop magazine ẹdude mfịn ẹtịn̄ n̄kpọ ẹkaha ẹban̄a unyamurua, idan̄, m̀mê afai. [Wụt Enyọn̄-Ukpeme ye Awake!] Nnyịn isuan nti magazine ẹmi ẹkọn̄ọde ke Bible. Mmọ ẹnen̄ede ẹnọ ukpep ẹnyụn̄ ẹkpep nnyịn ndituak ibuot nnọ Abasi, ndima mbọhọidụn̄ nnyịn, nnyụn̄ mmụm eti eduuwem n̄kama. Edieke afo amade utọ n̄wed emi, mmọfiọk nte ke afo eyedara se afo edikụtde ke mme nsiondi ẹmi.”
6 Edieke nnyịn isịnde ifịk ke nditịn̄ akpanikọ nnọ mme mbọhọidụn̄ nnyịn, nnyịn imekeme ndida akamba udomo idatesịt nsọk ediwak owo.—Utom 8:4, 8.