Ka Iso Nditịn̄ Akpanikọ
1 Mme apostle ẹkedọhọ ẹte: “Nnyịn [ikemeke] nditre nditịn̄ se nnyịn ikokụtde inyụn̄ ikopde.” (Utom 4:20) Mfịn ana nnyịn ika iso nditịn̄ akpanikọ. Okposụkedi edisuan Enyọn̄-Ukpeme ye Awake! edide usụn̄ ndiyom mbon oro ẹdinọde n̄kpan̄utọn̄, ana nnyịn ifiak ika edieke nnyịn iyomde ndikpep mbon oro ẹnyenede udọn̄ akpanikọ efen efen.
2 Ke ini afiakde aka ebiet emi okonịmde san̄asan̄a “Awake!” eke April emi ibuotikọ esie ọdọhọde “When Wars Will Be No More” (Ke Ini Ekọn̄ Mîdidụhe Aba), afo emekeme nditọn̄ọ ukpepn̄kpọ Bible ke ndibụp ete:
◼ “Isan̄ oko, nnyịn ima itịn̄ iban̄a mme ekọn̄ eke mme idụt ye udeme oro ido ukpono enyenede ke mmọ. Ndi afo ama ọdiọn̄ọ ke mme utọ n̄kpọntịbe oro ẹwụt in̄wan̄în̄wan̄ nte ke nnyịn idu uwem ke ini emi Bible okotde ukperedem ini? [Wụt n̄wed Ifiọk. Kot akpa ikpehe ekikere ke ibuot 11, nyụn̄ wụt ekebe oro odude ke page 102.] N̄wed emi anam ibuot nneme emi ọkọrọ ye 18 eken ẹdude ke se isịnede ẹn̄wan̄a. [Wụt page 3.] Edieke onyịmede, n̄kpama ndiwụt nte n̄wed emi ekemede ndin̄wam fi ọfiọk mme akpan n̄kpọ Bible ẹmi.” Ke onyịmede, tọn̄ọ ukpepn̄kpọ ke page 6.
3 Edieke afo ọkọn̄wọn̄ọde ndifiak n̄ka nnyụn̄ n̄kanam an̄wan̄a nte ẹkemede ndidara ifụre uwem idahaemi, afo emekeme ndidọhọ n̄kpọ etiede ntem:
◼ “Ke ini ikosobode ke akpa ini, mma mbuana ikpehe Bible oro ọnọde nnyịn ntak ndinyene idotenyịn kaban̄a ini iso owo ye afo. Mfịn nyama ndidụri ntịn̄enyịn fo n̄wụt n̄kpọ oro owụtde enyeemi ekemede ndinam nnyịn inyene ekikere ifụre idem idahaemi.” Kot Psalm 4:8. Kụbọde ka page 168 ke n̄wed Ifiọk nyụn̄ kot ikpehe ekikere 19. Ekem bụp ete: “Nte afo akpama ndinyene ukpepn̄kpọ Bible mfọn oro owụtde in̄wan̄în̄wan̄ nte afo n̄ko ekemede ndikụt orụk ifụre emi ke uwem fo?” Edieke ibọrọ edide ih, kụbọde ka ibuot 1.
4 Edieke ekenemede aban̄a unana udọn̄ ke ido ukpono ke akpatre ini oro akawahade, ke mfiakn̄ka afo emekeme ndidomo usụn̄ enyeemi:
◼ “Ekeme ndidi afo emeti nte ke nnyịn ima ineme iban̄a unana udọn̄ ke ido ukpono ke akpatre ini oro n̄kawahade, ndien mma ndọhọ ke isan̄ enyeemi nnyịn iyeneme iban̄a nte ẹkemede ndikụt ido ukpono oro Abasi onyịmede. Ikọ Jesus oro ẹwetde ke Matthew 7:21-23 ekeme nditụk ekikere owo kaban̄a ido ukpono. [Kot nyụn̄ tịn̄ ban̄a itien̄wed Abasi oro.] Isan̄ oko nnyịn ima ikot Isaiah 11:9 kaban̄a nte ifiọk Abasi ọtọtde ke ererimbot. [Nam an̄wan̄a ibio ibio.] Man ẹnyene utọ ifiọk oro oyom ẹkpep Bible kpukpru ini. Bible ọdọn̄ọ mme ndausụn̄ oro ẹdin̄wamde nnyịn ndikụt ido ukpono oro Abasi onyịmede.” Kụbọde ka ibuot 5 ke n̄wed Ifiọk, “Utuakibuot Anie ke Abasi Onyịme?,” nyụn̄ kot akpa ikpehe ekikere iba. Ekem nọ n̄wed ke etịbe oro ẹsinọde nyụn̄ diomi ndifiak ndi man aka iso ke ukpepn̄kpọ.
5 Afo emekeme ndidọhọ nnennen ke imọn̄ itọn̄ọ ukpepn̄kpọ ke mfiakn̄ka ke ndidọhọ:
◼ “Nnyịn isuan mme magazine nnyịn ke ofụri ererimbot nditọt mme owo ke kpukpru ebiet mban̄a se Bible ekpepde. Edieke mme owo ẹwụtde esịtekọm ke se mmọ ẹkpepde, nnyịn iyetọn̄ọ ukpepn̄kpọ Bible mfọn. [Tịn̄ tụk ekebe oro ‘Nte Afo Eyedara Ẹdise Fi?’ ke ikpaedem Enyọn̄-Ukpeme.] Nnyịn ida n̄wed emi, Ifiọk Oro Adade Osịm Nsinsi Uwem, nte ndausụn̄. Yak n̄wụt fi ibio ibio nte ẹnịmde ukpepn̄kpọ.”
6 Edieke nnyịn ikade iso nditịn̄ akpanikọ, nnyịn imekeme ndinịm ke akpanikọ nte ke oyodu ndusụk owo oro ẹdinọde n̄kpan̄utọn̄ ndien ẹnam n̄kpọ ke eti usụn̄.—Mark 4:20.