Kpebe Mbuọtidem Mmọ
1 Apostle Paul ọkọdọhọ ke mbuọtidem ọwọrọ ‘editịm mbụre mfiọk ite iyebọ se idoride enyịn ke esịt, inyụn̄ itịm inịm ite se idịbede owo ke enyịn ododu.’ Enye ama adian do ete “ke mbuọtidem mîdụhe, owo ikemeke ndinem Abasi esịt.” (Heb. 11:1, 6) Paul ama esịn udọn̄ ọnọ nnyịn ndinyene mbuọtidem, iyọhọ ye enye, inyụn̄ ibịne enye.—2 Cor. 4:13; Col. 2:7; 2 Tim. 2:22.
2 Ediwak n̄wọrọnda uwụtn̄kpọ mbuọtidem ẹdu oro ẹbụkde ke Bible. Ke Mme Hebrew ibuot 11, Paul ọnọ anyan udịm enyịn̄ mme ntiense ẹmi ẹkewụtde ọkpọsọn̄ mbuọtidem. Abel, emi ekedide akpa owo ndikpa n̄kpa usụn̄ Abasi ke ntak mbuọtidem esie, esịne ke udịm enyịn̄ emi. Ẹsiak Noah koro ke ntak mbuọtidem enye ama owụt uten̄e Abasi oro ẹkeyomde man ẹnyan̄a ikọtufọk esie. Ẹtoro Abraham ke ntak mbuọtidem ye nsụkibuot esie. Ẹtoro Moses koro ke ntak mbuọtidem esie enye ama aka iso ọsọn̄ọ ada nte n̄kpọ eke okụtde Enyeemi enyịn owo mîkwe. Udịm enyịn̄ uwụtn̄kpọ ama enen̄ede ọniọn̄ tutu Paul ọkọdọhọ ke ini eyekpu imọ edieke ikade iso ndisiak kpukpru mmọ. Nnyịn ikop inemesịt didie ntem nte ke imekeme ndisọn̄ọ mbuọtidem nnyịn ebe ke ndidụn̄ọde ‘edisana ido ye uten̄e Abasi’ mmọ!—2 Pet. 3:11.
3 Ke akpa isua ikie, Jesus ama obụp mbụme emi ete: “Ke adan̄aemi Eyen Owo edidide, nte Enye eyekụt mbuọtidem ke isọn̄?” (Luke 18:8) Ọfọn, ndien, nte nnyịn imenyene mme oduuwem uwụtn̄kpọ mbuọtidem ke otu nnyịn mfịn? Nte nnyịn imokụt iren ye iban, n̄kpri ye ikpọ, ẹwụtde n̄kpọsọn̄ mbuọtidem ke Jehovah nte ekedide ye ikọt Abasi ke ini Bible?
4 Mme Uwụtn̄kpọ Mbuọtidem Eyomfịn: Ẹkeme ndikụt n̄wọrọnda uwụtn̄kpọ mbuọtidem ẹkande nnyịn ẹkụk! Mbuọtidem mme esenyịn oro ẹdade nnyịn usụn̄ ẹdot se ikpebede. (Heb. 13:7) Edi idịghe mmọemi kpọt ẹnịm uwụtn̄kpọ mbuọtidem. Mbon nsọn̄ọnda oro ẹma ẹkenam utom ẹnọ Jehovah ke anyanini, ediwak ini ẹnamde ke idak n̄kpọsọn̄ idaha, ẹdu ke kpukpru esop.
5 Ana nnyịn iwụt ukpono inọ mme anam-akpanikọ nditọete iban nnyịn ẹmi, ke ediwak isua, ẹyọde ubiọn̄ọ ke ubọk mme ebe oro ẹkesịnde ubiọn̄ọ. Mme ete m̀mê eka oro ẹbọkde nditọ ikpọn̄ ẹmesobo n̄kpọ-ata eke edibọk nditọ ikpọn̄. Mme ebeakpa ẹsọn̄de ke isua emana ẹdu ke otu nnyịn ẹmi akananam mîtabake mme edinam esop idem okposụkedi ẹkemede ndidi mmọ inyeneke mbonubon ndin̄wam mmọ. (Men Luke 2:37 domo.) Akpa nnyịn idem ndikụt mbuọtidem mbon oro ẹyọde udọn̄ọ ọfiọn̄. Ediwak owo ẹka iso ndinam utom ke edinam akpanikọ idem okposụkedi ẹnyenede mme unana ukeme oro mîyakke ẹnọ mme ifetutom efen efen. N̄kparawa Ntiense ẹdu ẹmi ẹwụtde mbuọtidem ye uko kpa ye ubiọn̄ọ ke ufọkn̄wed. Utuakibuot oro ituakde inọ Abasi aka iso ndikọri nte nnyịn ikụtde mme anam-akpanikọ asiakusụn̄ ẹmi ke isua ke isua ẹsobode mme mfịna ẹmi inua mîkemeke nditịn̄. Ukem nte Paul, ini eyekpu nnyịn edieke nnyịn idomode ndibụk kpukpru ifiọkutom ke utom Obio Ubọn̄ ye mme edinam mbuọtidem oro nditọete iren ye iban ẹmi ẹnamde!
6 Uwụtn̄kpọ mme anam-akpanikọ ẹmi ẹnọ nnyịn ndọn̄esịt ye nsịnudọn̄. (1 Thess. 3:7, 8) Nnyịn iyenam ọfọn ndikpebe mbuọtidem mmọ koro “mme anam akpanikọ ẹnem [Jehovah] esịt.”—N̄ke 12:22.