Mme Etịbe Ẹnọde Kaban̄a Utom Ofụri Ererimbot N̄ka Ẹn̄wam Editat Utom
Nte ẹkebemde iso ẹtịn̄ ke Isaiah 54:2, 3, edisana utuakibuot Jehovah aka iso nditara ke ofụri ererimbot. Emi esịne nsio nsio idụt ke akamba ubak isọn̄ Africa ye mme n̄kpet n̄kpet isuo. Ke isua duop ẹmi ẹkebede, ẹma ẹdorode mme ukpan ẹfep ke utom Obio Ubọn̄ ke mme utọ itie nte Angola, Cameroon, Equatorial Guinea, Ethiopia, Madagascar, Malawi, Mozambique, ye Togo. Ke mme idụt ẹmi ye mmọ eken ke ebiet emi in̄wan̄ ama akadat ekem idọk, ediwak isụn̄utom Gilead, mme andikụre ukpep ke Ufọkn̄wed Unọ Mme Asan̄autom Ukpep, mme andibuana ke ubon Bethel, ye mmọ eken ẹmebọ mme utom ẹnam.—Matt. 9:37, 38.
Nte an̄wan̄ade, n̄kọri eke mme ata andituak ibuot ke esop Jehovah oyom ẹbọp ediwak mbufa Ufọkmbono Obio Ubọn̄ ke mme itie ikie. Oyom n̄ko ẹnam ndutịm ẹban̄a Mme Ufọk Mbono ye mbufa m̀mê okụre ufọkutom n̄kọk itieutom oro ẹtatde. Ndisịn okụk ke mme utom ẹmi ọkọrọ ye edinam utom Obio Ubọn̄ aka iso idịghe ke Africa ikpọn̄ edi n̄ko ke mme ikpehe ererimbot eken amada ekese ke mme etịbe utom ofụri ererimbot N̄ka.
Mme ndise ye mbuwed ke page iba ẹdude ke esịne-esịt emi ẹnọ fi ndusụk ekikere ẹban̄a se N̄ka odomode ndinam ke an̄wautom Africa. Se ẹwụtde edi ndusụk ubọpn̄kpọ oro ẹkade iso idahaemi ye mme utom oro ẹditọn̄ọde ke mîbịghike.
Ebede ke ndise chart utom an̄wautom ke 1996 Yearbook, afo emekeme nditịm mfiọk se mme asuanetop ke mme idụt ẹmi ẹnamde ke utom ukwọrọikọ. N̄wọrọnda n̄kọri ẹmeda itie ke ediwak idụt, ndien ẹkụt idotenyịn kaban̄a n̄kọri ke n̄wọrọnda ibat mme andidụk Editi. Ke ini nnyịn itide se ẹnamde nte ubak utom ofụri ererimbot eke edikwọrọ Obio Ubọn̄ ye edinam mbet mi ke Africa ye ke ikpọ ubak isọn̄ eken, enye anam nnyịn ikụt ifetutom oro inyenede ndinọ utuakibuot akpanikọ ibetedem ke n̄kan̄ n̄kpọ obụkidem.—Luke 16:9; 1 Tim. 6:18.
[Ndise ke page 3]
Ufọkmbono Obio Ubọn̄ ke KwaZulu-Natal, South Africa, emi ẹkedade usen 9 ẹbọp
[Ndise ke page 3]
Ufọkmbono Obio Ubọn̄ oro ẹbọpde emi owo mîbiatke okụk ikaha ke Nigeria
[Ndise ke page 3]
Ufọk Mbono ke Mozambique enyenede n̄kpọitie ẹkemde owo 1,500, emi ẹdikụrede ke utịt utịt 1996
[Ndise ke page 3]
Mme ufọkutom n̄kọk itieutom ke Mozambique, eyedi se ẹdụn̄de ke utịt 1996
[Ndise ke page 3]
N̄kọk itieutom Sierra Leone, emi ẹdiomide ndikụre nte ini akade ke isua emi
[Ndise ke page 4]
Ufọk Mbono oro mînyeneke ibibene emi ẹma ẹkekụre ke Mauritius, ọkọrọ ye mme ufọkutom n̄kọk itieutom, emi ẹdikụrede ke ntọn̄ọ ntọn̄ọ 1997
[Ndise ke page 4]
N̄kọk itieutom Zimbabwe emi ẹsụk ẹbọpde ke ubọk
[Ndise ke page 4]
Ufọk Mbono oro mînyeneke ibibene ye obufa n̄kọk itieutom emi ẹsụk ẹbọpde ke ubọk ke Senegal
[Ndise ke page 4]
Obufa n̄kọk itieutom Kenya, ke ibuot obio, Nairobi
[Ndise ke page 4]
N̄kọk itieutom Madagascar, emi ẹdikụrede ke mîdibịghike
[Ndise ke page 4]
Mme ufọk n̄kọk itieutom oro ẹyomde ndibọp ke Malawi