Mbono District “Mbuọtidem ke Ikọ Abasi” eke Mme Ntiense Jehovah eke 1997

¹ “Usen kiet ke okụre fo ọmọfọn akan tọsịn.” (Ps. 84:10) Ke ini andiwet psalm ekesituakde ibuot ke temple Jehovah, ama esitie enye ke idem nte ke ata ọkpọsọn̄ Abasi odu do. Ke ini idụt oro ẹkesisopde idem ndinịm mme usọrọ eke isua ke isua mme ata andituak ibuot ẹnyụn̄ ẹyọhọde Jerusalem, nditọ Israel ẹma ẹsinyene inem inem ebuana nte mmọ ẹsopde idem ke okụre temple. Ẹma ẹsiti mmọ ẹban̄a edidianakiet idụt mmọ nte n̄kukụre mme owo ke isọn̄ ẹmi Jehovah ọkọnọde edidiọn̄ ye mfọn esie. Kpukpru isua, nnyịn imesinyene ifet ndibuana ke ukem ekikere edidianakiet ye idara emi ye ediwak tọsịn nditọete nnyịn iren ye iban. Ke eyo nnyịn mme mbono district eke isua ke isua ẹdi kiet ke otu mme usụn̄ Jehovah nditan̄ ikọt esie mbok ọtọkiet kaban̄a item ye edinyene ebuana.

² Ndise mban̄a ata ediwak ikọt Jehovah ẹmi ẹkedụn̄de ke esịt ye n̄kanade Jerusalem ke mme ini usọrọ oro ama oyom ndutịm. Eyedi ndimụm edinam n̄kpọ ke nde ke nde ye emem n̄kama ama oyom edinọ ntọt kaban̄a mme itieidụn̄, mme ini usop idem, ye mme ndutịm eken. Sia mme n̄kpọ ẹmi ẹkeban̄ade utuakibuot akpanikọ mmọ, nditọ Israel ẹma ẹnam mme item ẹmi idara idara.—Ps. 42:4; 122:1.

³ Ediwak nditọete ke mme itie ikie ẹbabiat ediwak tọsịn hour ke mme itie duop ke nditịm mme itieutom mbono ye ndidiomi mme itieidụn̄ ke mme obio mbono 23. Nditọete ẹmi ẹnam utom ikpat kiet ye Itieutom Utịm Mbono N̄ka man ẹse ẹban̄a ediwak n̄kpọ ẹmi ẹnyenede ebuana ye edinịm mbono. Ekeme ndidi nnyịn ke idem nnyịn idikwe akpakịp ini, ukeme, ye ubiatokụk oro asan̄ade ye mbono district nnyịn eke isua ke isua, edi kpukpru nnyịn ke akpanikọ imowụt esịtekọm iban̄a edu n̄waidem mme anam-akpanikọ nditọete ẹmi, nte nnyịn iwụtke?

⁴ Nte ntịmidem akade iso kaban̄a Mbono District “Mbuọtidem ke Ikọ Abasi” eke 1997, nnyịn imenyene ndusụk akpan n̄kpọ oro oyomde akpan ntịn̄enyịn ye ata edikere mban̄a mbufo. Edidianakiet mbufo oyowụt ọkpọkpọ esịtekọm mbufo ke kpukpru ndutịm oro ẹnamde ke ibuot mbufo. Okposụkedi ẹma ẹkeneme ndusụk n̄kpọ ẹmi ke mbemiso, edi akpan n̄kpọ ọnọ nnyịn owo kiet kiet ndikụt mbiomo nnyịn in̄wan̄în̄wan̄ ke iso Jehovah ke ndinọ mme ndutịm mbono nnyịn ibetedem.

⁵ Mme Item ke Ndibọ Itieidụn̄: Nnyịn iyodomo ndinọ esop kiet kiet ibat babru Room Request oro ekemde. Ewetn̄wed esop ekpenyene ndikụt nte ke ẹwet n̄kpọ nnennen nnennen ẹyọhọ babru Room Request kiet kiet oro ẹnọde ẹdi. KÛWET sụk ibat mme asuanetop oro ẹyomde itieidụn̄, utọ nte “asuanetop 50,” ke ufan̄ oro ẹkpewetde enyịn̄ mbon ẹmi. Ẹnyene ndiwet kpukpru ntọt nte eyede ye nte ẹkemede ndikot. Mbọk kụt ete ke ọmọnọ ọyọhọ ntọt kaban̄a enyịn̄, isua emana, eren m̀mê n̄wan, ye m̀mê owo oro oyomde itieidụn̄ edi asiakusụn̄ m̀mê asuanetop esop. Sịn nditọwọn̄ ke udịm enyịn̄ emi. Ke ini edem ndusụk esop ẹkesiwet enyịn̄ ikpọ owo kpọt. Emi esinam ndutịm unọ itieidụn̄ enen̄ede ọsọn̄ utom. Edieke oyomde ufan̄ oro okponde akan se idude ke babru oro, da ikọn̄ babru efen wet. Edieke ewetde awak akan enyịn̄ owo kiet ke babru oro, mbọk wụt itie ebuana mbon oro ẹyomde itieidụn̄ ke nnennen ufan̄ oro ẹnịmde. Ewetn̄wed esop ekpenyene ndikụt nte ke ẹwet n̄kpọ ẹyọhọ babru Room Request nte enende mbemiso enye ọnọde aka Itieutom Unọ Ufọkidụn̄ Mbono.

⁶ Isua kiet kiet, nnyịn imesiben̄e nditọete ndidiana kiet ye Itieutom Unọ Ufọkidụn̄ Mbono. Ke nsụhọde n̄kaha ẹyọhọ n̄kpọ iba ke nditiene ndausụn̄ emi:

⁷ Afam okụk nditọete nnyịn iren ye iban, ẹmi n̄wakn̄kan ke otu mmọ ẹnyenede esisịt: Ke ini nnyịn idianade kiet ye ndutịm N̄ka, okụk ubet osụhọde ọnọ nditọete nnyịn. Utu ke ndikpe okụk efen efen nnọ mme ufọkisen ye mme enyene-ebiet, ẹkeme ndida enye nnam n̄kpọ nte ọfọnde akan ke ndin̄wam mme ubon nnyịn ye utom ofụri ererimbot. Idem edieke nnyịn ke idem nnyịn ikemede ndibọ mme itieidụn̄ oro ẹsọn̄de urua, nnyịn ikpenyene ndinọ mme ukeme Itieutom Unọ Ufọkidụn̄ ibetedem. Emi edi edu edikere mban̄a mbon efen oro ẹtịn̄de ẹban̄a ke 1 John 3:17 ye edumbet oro odude ke 1 Corinth 10:24.

⁸ Owụt edisụk ibuot nnọ ndausụn̄ N̄ka: N̄kpọ emi ekpenyene ndidi kiet ke otu n̄kpọ ẹmi ẹtịmde ẹbehe nnyịn. Mme Hebrew 13:17 ọdọhọ ete: “Ẹkop uyo mme andida mbufo usụn̄, ẹnyụn̄ ẹsụk ibuot ẹnọ mmọ; koro mmọ ẹkpemede ẹyom ufọn ukpọn̄ mbufo, nte mmọemi ẹnyenede ndinọ Abasi ibat; man mmọ ẹnam utom ke idara, ẹkûnam ke mfụhọ; koro emi mîdorike udori inọ mbufo.” Nte nditọete nnyịn ẹnamde ekese ndutịm kaban̄a mbono district nnyịn, nnyịn iyom ndinam mmọ ẹkere ke mmimọ imenyene ọyọhọ ibetedem nnyịn. Sia ẹyomde edidianakiet nnyịn ke n̄kpọ emi ke usen iba m̀mê ita kpọt ke isua, emi edi eti usụn̄ ndinọ mme ukeme mmọ ibetedem. Idem edieke se nnyịn imekde ọkpọkpọ edide isio, eti uwụtn̄kpọ nnyịn, nte nditọete nnyịn ye ererimbot ẹkụtde, eyesịn udọn̄ ọnọ edu ima, edidianakiet, ye ibetedem.—Phil. 2:1-4.

⁹ San̄asan̄a Un̄wam: Ndutịm emi edi n̄kukụre kaban̄a mbon oro ẹyomde san̄asan̄a un̄wam ẹto mbon en̄wen ke ndinam ndutịm mmọ ẹmi ẹnyenede ebuana ye mbono, akpan akpan mme ndutịm itieidụn̄, ke ini mbono. Mmọ ẹkeme n̄ko ndiyom un̄wam ke mme usụn̄ eken, ọkọn̄ọde ke san̄asan̄a idaha mmọ. Edi mme asuanetop ye mme asiakusụn̄ ẹmi ẹnịmde eti uwụtn̄kpọ kpọt, esịnede nditọ mmọ oro ẹdude eti uwem, ẹmi Kọmiti Utom Esop ọnọde unyịme ẹdot ndibọ un̄wam ke idak ndutịm San̄asan̄a Un̄wam emi. Ẹkpenyene ndinam mme ndutịm eken ndise mban̄a mbon oro ẹyomde san̄asan̄a un̄wam ke esop emi mmọ ẹsidụkde mme mbonoesop, utu ke ndiyak mbiomo emi ndori ndutịm mbono ke idem. Mbiowo ye mbon en̄wen ẹmi ẹdiọn̄ọde ẹban̄a idaha owo oro ẹkeme ndinọ ima ima un̄wam. Emi esiwak ndiyom mme asuanetop ẹkere ẹban̄a udọn̄ mbon oro ẹdude ke utom uyọhọ ini, mbonusọn̄, mbon n̄kpọnnam, ye ndusụk mbon eken. Mme asuanetop ẹkeme ndinọ un̄wam ebe ke ndisan̄a ye mme utọ owo oro m̀mê ndise mban̄a se mmọ ẹyomde ke mme usụn̄ efen.—Jas. 2:15-17; 1 John 3:17, 18.

¹⁰ Nte ededi, Itieutom Unọ Ufọkidụn̄ oyodomo ndinọ mme asuanetop ẹyomde san̄asan̄a un̄wam ufọkidụn̄ oro ẹdotde edieke mbon oro ẹdude ke esop mîkemeke ndin̄wam mmọ. Mme asuanetop ẹmi ẹkeme ndineme idaha mmọ ye ewetn̄wed esop. Ewetn̄wed ekpenyene ndineme ye Kọmiti Utom Esop man ese m̀mê esop eyekeme ndin̄wam mme owo ẹmi ke ndise mban̄a itieidụn̄ mmọ. Edieke esop mîkemeke ndinọ un̄wam oro ẹyomde, ewetn̄wed ekeme ndinọ utọ mbon oro babru Room Request kiet emi enye emịn̄de in̄wan̄în̄wan̄ mme ikọ ẹmi, “SAN̄ASAN̄A UN̄WAM” ke enyọn̄ akpa page oro. Mbon oro ẹyomde san̄asan̄a un̄wam kpọt ẹkpenyene ndiwet n̄kpọ nyọhọ babru emi. Owo oro esịnde eben̄e emi enyene ndiwet n̄kpọ nyọhọ enye. Ẹkpenyene ndifiak nyak enye nnọ ewetn̄wed, emi edisede m̀mê ẹwet n̄kpọ ẹyọhọ, enen, onyụn̄ odụn̄ọde mme idaha oro ẹnamde owo oro odot ndidi se ẹnọde utọ un̄wam oro. Mme idaha oro ẹdi se ewetn̄wed enyenede NDINAM AN̄WAN̄A KE NDE KE NDE ke ufan̄ oro ẹnịmde ke edem babru emi. Ẹkpenyene ndibabak nnam kpukpru emi mbemiso mbono. Ewetn̄wed ndien ọyọnọ babru emi ẹsọk Itieutom Unọ Ufọkidụn̄. Ẹyesian owo oro esịnde eben̄e emi nnennen ẹban̄a mme itieidụn̄.

¹¹ Mbon oro ẹyomde san̄asan̄a un̄wam IKPENYENEKE ndika itiembono nnyụn̄ n̄kesịn eben̄e ufọkidụn̄ ke ini mmọ ẹsịmde, koro Itieutom Unọ Ufọkidụn̄ ana enyene unyịme oto Kọmiti Utom Esop.

¹² Ndidụk Mbono Efen: Ẹdeme esop kiet kiet ẹsịn ke mbono oro ekperede akan. Ọkọn̄ọde ke ibat asuanetop oro ẹdemede ẹdọn̄ ke mbono kiet kiet, N̄ka esikere ibat mme andidụk ese man ẹnam ndutịm ẹnọ n̄kpọitie, ufọkidụn̄, mme n̄wed oro ẹkemde, ye ntre ntre eken. Nte ededi, edieke edide eti ntak anam afo oyom ndidụk mbono efen ọwọrọde ọkpọn̄ enyeoro ẹdemede fi ẹsịn onyụn̄ oyomde itieidụn̄, ewetn̄wed esop ekeme ndinọ fi idem babru Room Request kiet. Afo emekeme ndiwet n̄kpọ nyọhọ onyụn̄ ọnọ ewetn̄wed esịn ubọk mbemiso ọnọde enye ẹsọk mbono oro amade ndidụk.

¹³ Utịt: An̄wan̄a kpukpru nnyịn nte ke Jehovah ke ọnọ ibetedem ke mme ndutịm mbono eke isua ke isua. Sia ediwak nditọete ẹmi ẹnamde isan̄ ẹka mme mbono district ẹyomde mme ufọkidụn̄, nnyịn imekeme ndinịm ke akpanikọ nte ke Jehovah ọyọnọ se ẹyomde ẹmi nte ekemde. Sia mme n̄kpọ ẹmi ẹbehede utuakibuot akpanikọ nnyịn, nnyịn ikpenyene nditiene mme item oro ẹnọde idara idara. Ndiwụt ke nnyịn ‘imanam akpanikọ ke ata ekpri n̄kpọ’ esịn nnyịn ke udịm ndibọ mme akwa edidiọn̄ oro ẹnade ẹbet mbon oro Jehovah amade.—Luke 16:10.

¹⁴ Isaiah 33:20 ọdọhọ ete: “Se Zion, obio [usọrọ, NW] nnyịn.” Nnyịn n̄kukụre ikeme ndikekere mban̄a mme okop-inemesịt akwa otuowo oro ẹkeyọhọde Jerusalem ẹnyụn̄ ẹnyịmede ewụhọ Jehovah “ndidat esịt.” (Deut. 16:15) Mme mbono district nnyịn eke isua ke isua ẹsinọ nnyịn ifet ndibọ item Abasi nnyụn̄ ndara ufiop ufiop ebuana nditọete iren ye iban nnyịn. Jehovah akpakam ọdiọn̄ mme ukeme mbufo nte mbufo ẹnamde ndutịm ndidụk udịm udịm mbono district “Mbuọtidem ke Ikọ Abasi” eke 1997!

[Ntọt Ẹnọde Otu Mbiowo: Ke ẹbọde esịne-esịt emi, mbọk ẹtọt ke Esoputom efen ye ke Ukpepn̄kpọ Enyọn̄-Ukpeme oro editienede ebiet ye mme usenọfiọn̄ ẹmi N̄ka edemede esop mbufo esịn. Ọkpọfọn ndidụri udịm ke obio mbono ye mme usenọfiọn̄ oro ẹdemede esop mbufo ẹsịn ke udịm enyịn̄ circuit oro ẹnọde, nnyụn̄ ndian ikpehe esịne-esịt emi ke obukpọk ntọt.

Ewetn̄wed esop ekpenyene ndise mban̄a n̄kpọ ẹban̄ade mme mbono ye mme ntọt mbono ke mme mbonoesop ini iso. Kpukpru mbiowo ẹnyene ndidiana kiet ọyọhọ ọyọhọ man ẹkụt ẹte ke ẹse ẹban̄a mme n̄kpọ ẹban̄ade mbono usọp usọp, ke usụn̄ emi esịnede ufiop, ifịk ifịk, ye nte ọfọnde.]

[Ekebe ke page 4]

Mme Ini Ndutịm

Friday

9:20 a.m. -4:40 p.m.

Saturday

9:00 a.m. -4:20 p.m.

Sunday

9:00 a.m. -3:20 p.m.