Ekebe Mbụme

◼ Mme ukpeme ewe ke ẹyom ke ini idude ye owo isio uduot ke ebuana ye utom ukwọrọikọ nnyịn?

Nnyịn imenyene ntak ndidori enyịn nte ke uduak nditọete iren ye iban nnyịn edi ndisọn̄ọ nyịre ye n̄kon̄n̄kan idaha ido uwem ke ọkpọkpọ eduuwem mmọ. Nte ededi, nnyịn idu uwem ke ndedehe ye anana-ukpan ererimbot emi enyenede ibat ibat ukpan ke ido uwem. Ke adan̄aemi nnyịn ikemede ndinyene ata nti uduak, ana idu ke ukpeme kpukpru ini man ifep edida esuene ndi m̀mê ndibuana ke n̄kpọ emi mîdotke. Emi esịne edidu ke ukpeme ke adan̄aemi idude ke utom ukwọrọikọ.

Ke utom an̄wautom nnyịn imesiwak ndisobo mbon isio uduot ẹmi ẹsitiede nte ẹnyene ata udọn̄ ke akpanikọ. Edieke nnyịn isan̄ade ikpọn̄ ke ini iwahade ndien owo efen mîdụhe ke ufọk, nte ido edide ọkpọfọn ndinọ ikọ ntiense ke enyịnusụn̄ utu ke ndidụk esịtufọk. Edieke udọn̄ odude, imekeme ndinam ndutịm ndifiak n̄ka ke ini nnyịn idisan̄ade ye asuanetop efen m̀mê ke ini mbon en̄wen ke ufọk oro ẹdidude n̄ko. Edieke owo mîkemeke ndinam emi, oyowụt ifiọk ndikpọn̄ owo oro nnọ asuanetop emi edide ukem uduot ye enyeneufọk oro. Emi n̄ko abuana edinịm mme ukpepn̄kpọ Bible ye owo isio uduot.—Matt. 10:16.

Oyom nnyịn iwụt ukpeme ke ini imekde owo oro ididade isan̄a ke utom ukwọrọikọ. Okposụkedi mme asuanetop ẹdide isio uduot ẹkemede ndisan̄a kiet ndusụk ini, etịm ọfọn ndinam emi ke ini ẹnamde utom ke otu. Nte ido edide, idem ke adan̄aemi idude ke utom ukwọrọikọ, iwụtke ọniọn̄ ndibiat ini ikpọn̄ ye owo isio uduot emi mîdịghe nsan̄andọ nnyịn. Ntem, eyenete emi esede aban̄a otu an̄wautom ekpenyene ndida eti ubiere ke ini adiande mme asuanetop, esịnede nditọwọn̄, ndisan̄a kiet.

Ebede ke ndida eti ubiere kpukpru ini, nnyịn iyefep ‘ndinịm ubiọn̄ọ ekededi ke afan̄’ nnọ idem nnyịn m̀mê mbon en̄wen.—2 Cor. 6:3.