Ke Ẹda Ata Ediwak Owo Ẹdidian
1 Nte ekedide ke akpa isua ikie, n̄kọri oro esop Christian enyenede mfịn edi n̄wọrọnda. (Utom 2:41; 4:4) Isua oko, mbufa mbet 366,579 ẹkena baptism, se ibede owo 1,000 ke usen kiet kiet ke ẹbaharede ukem ukem! Se iwakde ikan miliọn owo kiet ẹkena baptism ke isua ita ẹmi ẹkebede. Ke akpanikọ, Jehovah amaka iso ada ata ediwak mme andinịm ke akpanikọ edidian.—Utom 5:14.
2 Ediwak mbufa owo ẹmi ẹnanade ifiọk ke uwem Christian ẹyom un̄wam ye ukpep ẹto mbon oro ẹsọn̄de idem ke mbuọtidem. (Rome 15:1) Ke otu mme akpa Christian ndusụk owo ẹma ẹdu ẹmi, idem ke ediwak isua ẹma ẹkebe nte mmọ ẹkena baptism, ẹkekpude ‘ndisịn idem mbịne ifiọk eke ọfọnde ama.’ (Heb. 5:12; 6:1) Ntak edi oro, ke leta oro enye ọkọnọde ẹsọk mme Hebrew, Paul ama owụt mme ikpehe ẹmi oyomde mme Christian ẹkọri ke n̄kan̄ eke spirit. Nso ẹdi mmọemi, ndien didie ke ẹkeme ndinọ un̄wam oro ẹyomde?
3 Ndinyene Nti Ido Ukpep N̄kpọ: Ke n̄kemuyo ye item Paul, ndidi eti eyen ukpepn̄kpọ abuana edikpep n̄kpọ ifịk ifịk, edinam ndụn̄ọde, ye edida “ọkpọsọn̄ udia” oro esop Jehovah ọnọde nnam n̄kpọ. (Heb. 5:13, 14; se Enyọn̄-Ukpeme, August 15, 1993, page 12-17.) Ebede ke ndibuan mbufa mme andinịm ke akpanikọ ke mme nneme eke spirit nnyụn̄ mbuana mme ọsọn̄urua n̄kpọuto akpanikọ oro afo ekpepde oto ọkpọkpọ ndụn̄ọde ye mmọ, afo emekeme ndisọn̄ọ mmọ idem ndinyene nti ido ukpep n̄kpọ. Ke ini ke ini eyedi afo emekeme ndikot obufa owo ete abuana ye afo ke ọkpọkpọ ukpepn̄kpọ fo m̀mê ke ukpepn̄kpọ ubon fo.
4 Ndidụk Mme Mbonoesop Kpukpru Ini: Uwụtn̄kpọ edinam akpanikọ fo ye mme ima ima ikọ nsịnudọn̄ ẹyen̄wam mbufa mme andibuana ke esop ndifep ikpehe efen edide n̄kpọ udọn̄ oro Paul eketịn̄de aban̄a—“edu” oro ndusụk owo ẹnyenede nditre ndidụk mme mbonoesop Christian. (Heb. 10:24, 25) N̄wam mmọ ẹfiọk ẹte ke mme mbonoesop ẹdi n̄kpọ oro anamde esop enyene uwem ke n̄kan̄ eke spirit. Nam usio-ukot ndinam mmọ ẹkụt ẹte ke ẹdara mmimọ nte ubak itie nditọete nnyịn.
5 Ndika Mbịne Jehovah ye Mbuọtidem: Man ikan mme mmeme ikpọkidem ye mme ndudue ke eduuwem, ana nnyịn ibịne Jehovah ke akam, itịn̄de ata ntotụn̄ọ ekikere ye ata ọkpọkpọ editịmede esịt nnyịn inọ enye. Ana mbufa owo ẹfiọk ẹte ke ebede ke ndikpe Jehovah ubọk nyom un̄wam, nte Paul eketemede, idiyomke mmọ ẹkop mmemidem. (Heb. 4:15, 16; 10:22) Ndibụk mme ọkpọkpọ ifiọkutom fo ke afan̄ emi ọyọsọn̄ọ mbuọtidem obufa owo nte ke Jehovah esikop mme akam ofụri esịt.
6 Ndidiomi Ini nnọ Utom Ukwọrọikọ: Paul n̄ko ama owụt ete ke ini nnyịn iwade “uwa ekọm inọ Abasi kpukpru ini,” emi esisọn̄ọ owo idem ke n̄kan̄ eke spirit. (Heb. 13:15) Nte afo emekeme ndikot obufa asuanetop ete edisan̄a ye afo ke ndutịm utom an̄wautom fo eke urua ke urua? Ndusụk mbufo mbiba ẹmekeme nditịm nneme mbufo mîdịghe ẹkere ẹban̄a ikpehe utom ukwọrọikọ oro obufa owo emi mîkodomoke kan̄a ise.
7 Ata ediwak owo oro ẹdade ẹdidian ẹdi ntak akwa idara. Nnyịn ndisịn idem nnyịn ke ndikpep nnyụn̄ nteme mbufa mme andibuana ke esop ayan̄wam mmọ ndikọri ọkpọsọn̄ mbuọtidem oro ẹyomde man ẹsịm “edinyan̄a ukpọn̄.”—Heb. 3:12, 13; 10:39.