Kpep Mmọ En̄wen Se Abasi Oyomde
1 Ẹkeme ndisụk n̄kụt ediwak owo oro ẹkpande mmọ ke n̄kan̄ eke spirit ‘ndikop ikọ Jehovah.’ (Amos 8:11) Ke adan̄aemi ndusụk owo ẹnịmde ke akpanikọ ẹte ke Abasi odu, mmọ inyeneke ifiọk iban̄a uduak esie ye mme n̄kpọ oro enye oyomde. Ntem, ufọn odu nnyịn ndikpep mmọ anyan̄a-uwem akpanikọ Obio Ubọn̄. Ke itịmde idem inyụn̄ idude ke mben̄eidem mfọn mfọn ndinọ ikọ ntiense ke kpukpru ifet, nnyịn imekeme ndikụt mbon oro ẹyomde ndikpep mban̄a se Jehovah oyomde.
2 Ke April ye May, nnyịn iyenyene mme ata ekemini nsiondi Enyọn̄-Ukpeme ye Awake! ndisuan. Adianade do, ke akpa ini, nnyịn iyọnọ ediye uduot ekpri n̄wed oro Nso ke Abasi Oyom Oto Nnyịn? Ndiye ndise esie ye mme mbụme oro ẹnamde owo ekere n̄kpọ ẹnam ediwak owo ẹma ediye uduot ekpri n̄wed emi. Ẹnọ mme ekikere ẹtienede mi man ẹn̄wam nnyịn ida nti n̄wed nnyịn inam n̄kpọ nte ọfọnde.
3 Ndiyom Mme Owo: Ke ebiet ẹmi ediwak owo mîsidụhe ke ufọk ke ini nnyịn isan̄ade ke ufọk ke ufọk, ẹkụt nte ọfọnde ndiyom mme owo nnyụn̄ nnyene nneme ye mmọ ke ebiet ekededi emi mmọ ẹdude—ke efak, ke n̄kpọisan̄ ofụri owo, itie ubon moto ye mme itie mbubehe. Oyom nnyịn ifak ifet ikwọrọ ikọ ke ido nneme. Ke uwụtn̄kpọ, eyenete an̄wan kiet edide asiakusụn̄ ama akama ediwak nsiondi Awake! eke August 8, 1996, emi ekenyenede udịm udịm ibuotikọ oro “Endangered Species—Why Be Concerned?” aka itie emi ẹsibonde nsio nsio unam. Ke ufan̄ hour kiet, enye ama enịm 40 ye ndusụk owo oro ẹnen̄erede ẹma unam! Kan̄a kemi afo okụt unen adan̄a didie ke ndikwọrọ eti mbụk ke kpukpru ebiet? Enyọn̄-Ukpeme ye Awake! ọkọrọ ye ediye uduot ekpri n̄wed Oyom ẹdot akpan akpan ke kpukpru usụn̄ unọ ikọ ntiense, koro mmọ ẹnọde ntọt oro ẹtụkde uwem mme owo ẹnyụn̄ ẹdemerede ukeme ukere n̄kpọ owo.
4 Nditọn̄ọ Mme Nneme: Page edem Utom Obio Ubọn̄ Nnyịn eke October 1996 ọnọ ọyọhọ ntọt ke nte ekpetịmde mme nneme idemfo ọnọ mme magazine Enyọn̄-Ukpeme ye Awake! Mme ukem ekikere oro ẹyenyene uforo ke ini etịmde se afo editịn̄de ke ndinọ ediye uduot ekpri n̄wed Oyom. Se nnyịn itịn̄de ekeme ndidi udịmikọ ifan̄ mîdịghe ọniọn̄ ekem ndisịne ekikere N̄wed Abasi kiet. Edi akpan n̄kpọ ndimek mme ntọn̄ọikọ ye ntịn̄enyịn, sia mmọ ẹkemede ndibiere m̀mê owo oro afo osobode ayaka iso ndinọ n̄kpan̄utọn̄. Ndusụk owo ẹma ẹnyene uforo ke ndikama ntọn̄ọikọ emi: “Mma n̄kot ibuotikọ oro ọkọnọde mi nsịnudọn̄, ndien nyom ndibuana enye ye afo.” Mîdịghe ẹkeme ndibụp inem inem mbụme ndidụri owo en̄wen nsịn ke nneme.
5 Edieke odotde ke n̄kann̄kụk mbufo, afo emekeme ndidomo ndibụp mme mbụme nte mmọ oro ẹtienede mi ke mme nneme fo ọfiọn̄ emi:
◼ “Mfịn nnyịn imokụt ata ekese mbio ye usabaden̄kpọ. Nso ke ediyom man ẹnam isọn̄ asana ẹnyụn̄ ẹnam enye edi eti itie ndidụn̄?” Bet ibọrọ, ndien ekem nam an̄wan̄a nte ke imọ imenyene ntọt oro ọsọn̄ọde ọnọ nnyịn usụn̄ ye ini oro isọn̄ edikabarede edi ediye in̄wan̄ ofụri ererimbot. Buana akpan utịn̄ikọ, ibio ibio itien̄wed, ye ediye ndise ẹtode magazine eke ndondo emi, ndien ekem nọ owo oro editobo ke nnennen ekọmurua. Mbemiso etrede nneme, n̄wana diomi ndinam mfiakn̄ka.
◼ “Nte afo ekere ke Abasi okoyom nnyịn idu uwem ye mme utọ mfịna nte mmọ oro nnyịn isobode mfịn?” Ke owo oro ama ọkọbọrọ, afo emekeme ndidọhọ: “Eyedi afo ememehe ye akam oro Jesus ekekpepde mme anditiene enye ete ẹbọn̄, ẹben̄e Obio Ubọn̄ Abasi edi. Nte afo amakam ekere aban̄a se Obio Ubọn̄ Abasi enen̄erede edi?” Kụbọde ka ukpepn̄kpọ 6 ke ediye uduot ekpri n̄wed Oyom, nyụn̄ kot mme mbụme oro ẹbụpde ke ntọn̄ọ ukpepn̄kpọ oro. Ekem, nte afo okotde ikpehe ekikere 1, wụt ibọrọ akpa mbụme. Nam an̄wan̄a ete ke ẹbọrọ mme mbụme eken nnennen nnennen ntre. Nọ ediye uduot ekpri n̄wed ke etịbe edide ₦25, nyụn̄ diomi ndifiak n̄ka n̄kabuana ntọt efen efen aban̄ade Obio Ubọn̄.
◼ “Ediwak mbon oro ẹkerede n̄kpọ ke ẹtọn̄ọ ndise mme ido ukpono ererimbot nte ntak mfịna mme owo utu ke ndidi usọbọ. Afo ekere nso aban̄a oro?” Ke ama okokop se owo oro ekerede, wụt n̄kpọ oro odude ke magazine kiet eke ndondo emi oro ekemede ndinam enye enyene udọn̄ aban̄a edikpu oro nsunsu ido ukpono okpude m̀mê nsobo esie oro asan̄ade ekpere nyụn̄ nọ editobo. Nọ enyịn̄ fo nyụn̄ bọ eke esie, ndien diomi ndifiak n̄ka man ekeme ndinam an̄wan̄a ntak oro ata ido ukpono mîkpụhe ubonowo.
◼ “Ye ata ediwak mfịna ẹdude ke uwem ubon mfịn, nte akanam emekere se idide ukpọhọde inemesịt ubon?” Bet ibọrọ, ndien nam an̄wan̄a nte ke Bible, Abasi ayarade se idide ata ukpọhọde inemesịt ubon. Ndusụk afo emekeme ndikot Isaiah 48:17. Ekem kụbọde ka ukpepn̄kpọ 8 ke ediye uduot ekpri n̄wed Oyom, nyụn̄ wụt ndusụk ufan̄ikọ Bible oro ẹsiakde ẹsịn oro ẹnọde andibuana kiet kiet ke ubon ndausụn̄ oro ẹkemede ndiberi edem. Kot mme mbụme oro ẹwetde ke ntọn̄ọ ukpepn̄kpọ oro. Bụp m̀mê owo oro akpama ndikot mme ibọrọ. Ke edide ntre, nọ enye ediye uduot ekpri n̄wed emi ke nnennen ekọmurua. Diomi ndifiak n̄ka ini efen n̄kabuana nti ndausụn̄ efen efen oro ẹsịnede ke Bible kaban̄a uwem ubon oro enyenede inemesịt.
6 Esịne-esịt Utom Obio Ubọn̄ Nnyịn eke March 1997 ama esịn udọn̄ ọnọ nnyịn ndinyene uko ndinam mme mfiakn̄ka. Enye ama ọnọ ekikere ete ẹkama ediye uduot ekpri n̄wed Oyom ke nditọn̄ọ mme ukpepn̄kpọ Bible, edieke mîdịghe ke akpa ediwaha, edi ke mfiakn̄ka. Akakan n̄kpọ oro ubonowo oyomde edi ndikpep se Abasi oyomde ndien ekem ẹnam enye. (Col. 1:9, 10) Nnyịn iyanam mbon efen ẹbọ ufọn akamba akamba ke April ye May edieke nnyịn ikemede nditọn̄ọ n̄kpep mmọ se nnyịn ifiọkde iban̄a mme n̄kpọ oro Jehovah oyomde kaban̄a uwem.—1 Cor. 9:23.