Ka Iso Tiene Jesus
1 Ke idaha kiet Jesus ama ọdọhọ ete: “Edieke owo ekededi oyomde nditiene Mi, yak enye otụk idemesie onyụn̄ emen [eto ndutụhọ esie onyụn̄ aka iso, NW] etiene Mi.” (Matt. 16:24) Nnyịn ke akpanikọ iyom ndinam n̄kpọ ifịk ifịk mban̄a mme ikọ Jesus. Ẹyak nnyịn ise se ubak udịmikọ kiet kiet ke ikot esie abuanade.
2 “Yak Enye Otụk Idemesie”: Ke ini iyakde uwem nnyịn inọ Jehovah, nnyịn imotụk idem nnyịn. Akpan ukabade oro ẹnọde ikọ Greek oro ẹkabarede “otụk” edi “ndidọhọ baba.” Oro ọwọrọ nnyịn ndikpọnọde mme udọn̄ ikpọ n̄kpọ, mme udọn̄, mme n̄kpọ inem uwem, ye ibụk ibụk inemesịt nnyịn nnịm unyịme unyịme—ibierede ndinem Jehovah esịt ke nsinsi nsinsi.—Rome 14:8; 15:3.
3 “Emen Eto Ndutụhọ Esie”: Uwem Christian edi uwem edimen eto ndutụhọ eke utom n̄waidem oro ẹnamde ẹnọ Jehovah. Usụn̄ kiet emi ẹkemede ndiwụt edu n̄waidem edi owo ndisịn̄ede idem ke utom ukwọrọikọ. Tọn̄ọ isua emi akabahade, ediwak asuanetop ẹmenam usiakusụn̄ unọ un̄wam. Ekeme ndidi afo edi kiet ke otu mmọ omonyụn̄ ekeme ndisọn̄ọ nte ke mme edidiọn̄ oro ọbọde ẹkpon ẹkan mme n̄waidem oro afo anamde. Mbon oro mîkemeke ndinam utom nte mme asiakusụn̄ unọ un̄wam ẹsidiomi kpukpru ini ndibiat ekese ini ke utom ukwọrọikọ nte mme asuanetop esop. Ye oro ke ekikere, ndusụk esop ẹdiomi mme mbono an̄wautom mmọ ndibak esisịt n̄kan nte mmọ ẹkesinamde ke akpa. Ediwak asuanetop ẹma ndinyene anyanini emi ke utom ukwọrọikọ. Ndusụk ẹmenyene ata nti utịp n̄ko ke ini mmọ ẹkebierede ndiwaha ‘ufọk kiet efen kpọt’ m̀mê ndinam utom ke ‘minit ifan̄ kpọt ọniọn̄ akan.’
4 Usụn̄ efen emi ẹwụtde edu n̄waidem edi ke ndinịm mme ọkpọkpọ utịtmbuba. Ebede ke eti ndutịm ye edinam ukpụhọde ke ndutịm mmọ, ndusụk owo ẹmekabade ẹdi mme asiakusụn̄ ofụri ini. Mbon efen ẹma ẹkeme ndidiomi mbubehe mmọ man ẹnọ idemmọ ke utom Bethel m̀mê Ufọkn̄wed Unọ Mme Asan̄autom Ukpep. Ndusụk ẹwọrọ ẹka ebiet emi udọn̄ kaban̄a mme asuanetop Obio Ubọn̄ okponde akan.
5 “Aka Iso Etiene Mi”: Okposụkedi mme mbet Jesus ẹkesobode ediwak idomo, mmọ ẹma ẹbọ nsịnudọn̄ ẹto ifịk ye ime esie ke utom ukwọrọikọ. (John 4:34) Edidu esie ye etop esie ama anam mmọ ẹfiak ẹkop odudu ke spirit mmọ. Ntak edi oro mbon ẹmi ẹketienede enye ẹkekopde ata idatesịt. (Matt. 11:29) Ẹyak nnyịn isịn udọn̄ kpasụk ntre inọ kiet eken ndinyene ime ke akakan utom edikwọrọ Obio Ubọn̄ ye edinam mbet emi.
6 Kpukpru nnyịn ikpakam inam n̄kpọ ifịk ifịk iban̄a ikot Jesus ndika iso ntiene enye ebe ke ndikọri edu n̄waidem. Nte nnyịn inamde, nnyịn iyenyene akwa idatesịt idahaemi imonyụn̄ ikeme ndidori enyịn mban̄a mme edidiọn̄ oro ẹkam ẹkponide ẹkan ke ini iso.