Ntak Emi Mmọ Ẹnamde?
1 Ẹma ẹbem iso ẹtịn̄ ẹban̄a Christ ẹte ke ‘ufụp ufọk Jehovah ayadia enye.’ (Ps. 69:9) Ifịk oro Jesus ekenyenede ke utuakibuot akpanikọ Jehovah ama onụk enye ndinịm utom ukwọrọikọ akpa. (Luke 4:43; John 18:37) Ẹwụt ukem ifịk editie ntiense nnọ akpanikọ mfịn ke utom ukwọrọikọ Mme Ntiense Jehovah. Isua utom oko, owo 645,509 ke ofụri ererimbot ke ẹbaharede ukem ukem ẹma ẹbuana ke ndusụk utom usiakusụn̄ ke ọfiọn̄ kiet kiet. Ke ikerede iban̄a uyakidem nnyịn nnọ Abasi, nnyịn owo kiet kiet ikpenyene ndikere mban̄a m̀mê nnyịn imekeme ndidiomi mme idaha nnyịn man inam utom nte asiakusụn̄ unọ un̄wam m̀mê asiakusụn̄ ofụri ini.—Ps. 110:3; Eccl. 12:1; Rome 12:1.
2 Sia idude uwem ke editịm n̄kpọ emi amade inyene obụkidem ke ibụk ibụk usụn̄, ọsọn̄ ediwak owo ke ererimbot ndifiọk ntak emi owo ekededi akpanamde utom ọkpọsọn̄ ntre ke n̄kpọ emi mîdaha udori okụk ye ubọn̄ ndomokiet idi. Ntak emi mme asiakusụn̄ ẹnamde? Mmọ ẹdiọn̄ọ ẹte ke mmimọ ibuana ke utom unyan̄a uwem. Ke ntotụn̄ọ ima oro ẹnyenede ẹnọ Jehovah ye ekemmọ owo ẹnụkde, mmọ ẹnyene ọkpọsọn̄ ọkpọkpọ mbiomo ndin̄wam nnyan̄a uwem. (Rome 1:14-16; 1 Tim. 2:4; 4:16) Asiakusụn̄ ebe ye n̄wan ẹketịn̄ ibio ibio nte ọfọnde ke ndidọhọ ete: “Ntak emi nnyịn isiakde usụn̄? Nte nnyịn ikpekeme ndinam an̄wan̄a Jehovah ntak nnyịn mîsiakke usụn̄?”
3 Eyenete an̄wan en̄wen ekewet ntem aban̄a ubiere esie ndinam utom usiakusụn̄: “Ami ye ebe mi ima inam ndutịm ndidu uwem ke okụkọfiọn̄ owo kiet, emi ọwọrọde ndikpọn̄ kpukpru n̄kpọ oro mînyeneke ufọn. Edi, Jehovah ama ọdiọn̄ nnyịn uwak uwak, iyakke nnyịn ibuene m̀mê inana n̄kpọ. . . . Ami mmokụt ata ntak ndidu uwem—eke edin̄wam mbon unana ẹdi ẹdidiọn̄ọ nte ke Jehovah, kpa Abasi akpanikọ, iyomke usụn̄ ikpọn̄ mbon oro ẹyomde enye.” Ke ẹkụtde nte ini ẹdide usọp usọp, mme asiakusụn̄ ẹkop uyụhọ ke mme akpan n̄kpọ ke uwem ke adan̄aemi ẹyomde ke esịt akpanikọ ndinyene mme n̄kpọuto eke spirit oro ẹdibịghide ke nsinsi.—1 Tim. 6:8, 18, 19.
4 Edieke mme ọkpọkpọ idaha fo ẹyakde, ntak mûdianake ye ediwak tọsịn nditọete fo iren ye iban ke mme itie ikie ke ofụri ererimbot ẹmi ẹsiakde usụn̄? Ke usụn̄ oro afo emekeme ndinyene ukem idatesịt mmọ.