Ndimen Nditọ Ukpepn̄kpọ N̄wụt Ndutịm Emi Odude ke Edem Enyịn̄ Nnyịn
1 “Enye edi etop oro ẹtịn̄de ke se iwakde ikan usem 200. Enye edi etop emi ẹkopde ke se iwakde ikan idụt 210. Enye edi etop emi ẹnọde ọkpọkpọ ke ebiet ekededi emi ẹkemede ndikụt mme owo. Kpukpru emi edi ubak n̄kponn̄kan ubịnikọt ukwọrọikọ oro ererimbot akanam ọdiọn̄ọde, etop emi adiande ediwak miliọn owo ke ofụri isọn̄ ọtọkiet. Ẹmetịm Mme Ntiense Jehovah ndinam utom emi mma ke se iwakde ikan isua ikie!”
2 Ntre ke mbụk vidio oro Jehovah’s Witnesses—The Organization Behind the Name ọtọn̄ọ. Enye aka iso ndibọrọ mme mbụme oro: Mme Ntiense Jehovah ẹnen̄erede ẹdi mmanie? Didie ke ẹtịm utom mmọ? Ẹnọ ndausụn̄? Ẹse ẹban̄a ke okụk? Enye anam mme andise ẹfiọk akpanikọ oro nte ke “ẹnọ Mme Ntiense Jehovah ukpep ke ofụri ererimbot nte esop ndin̄wam mme mbọhọidụn̄ mmọ ndibọp mbuọtidem ke Bible,” enye onyụn̄ esịn udọn̄ ọnọ mmọ ndikụt ke idemmọ ndutịm emi odude ke edem enyịn̄ nnyịn. Ke ama ekese vidio emi, mmọn̄eyet idatesịt ye esịtekọm ama asiaha n̄wan kiet emi ekekpepde n̄kpọ ndien enye ama ọdọhọ ete: “Didie ke owo ekededi mîkpekwe nte ke emi edi esop ata Abasi, Jehovah?”—Men 1 Corinth 14:24, 25 domo.
3 N̄wan en̄wen ama esidi ekpep Bible etre ke anyanini, edi enye ikekemeke ndinyịme akpanikọ oro nte ke Abasi-Ita-ke-Kiet edi nsunsu ukpepn̄kpọ. Ekem ẹma ẹwụt enye ye ebe esie vidio nnyịn. Ndise oro ama enen̄ede otụk mmọ ndien mmọ ẹkese enye ikaba okoneyo oro. Ke ukpepn̄kpọ mmọ en̄wen, n̄wan ama etịn̄ udọn̄ esie ndidi Ntiense. Enye ọkọdọhọ ke imọ ikowụk ntịn̄enyịn ke Abasi-Ita-ke-Kiet oro imọ inịmde ke akpanikọ inyụn̄ ikpu ndise esop nnyịn ye mme owo oro ẹdude ke esịt. Otode ke vidio oro enye ama ọfiọk ete ke imọ ima ikụt ata esop Abasi. Enye ama oyom nditọn̄ọ ndikwọrọ ikọ ke ufọk ke ufọk ke ebe oro. Ke ẹma ẹkenam an̄wan̄a enye mme usio-ukot oro ẹyomde man ẹkabade ẹdi asuanetop oro mînaha baptism, enye ọkọdọhọ ete: “Mmọn̄ nnam oro iwiwa.” Enye ama osio enyịn̄ ke ufọkabasi esie, ọtọn̄ọ utom an̄wautom, onyụn̄ enyene usọ ke ndiwụt nte Abasi-Ita-ke-Kiet edide nsu.
4 Ẹdiọn̄ọ mfọn mfọn nte ke nditọ ukpepn̄kpọ Bible ẹsinam eti n̄kọri eke spirit ẹnyụn̄ ẹkọri usọp usọp ẹsịm ọyọhọ idaha ẹkan ke ini mmọ ẹdiọn̄ọde esop Jehovah ẹnyụn̄ ẹbuanade ke enye. Ke edide akpan n̄kpọ, ke owo 3,000 ẹma ẹkena baptism ke Pentecost, “mmọ ẹma ẹka iso ẹsịn idem ke ukpepn̄kpọ mme apostle ye ke edibuana ọtọkiet.” (Utom 2:42, NW, ikọ idakisọn̄) Edi akpan n̄kpọ nte nnyịn in̄wam nditọ ukpepn̄kpọ ndinam ukem oro mfịn. Didie ke nnyịn ikeme ndinam oro?
5 Biom Mbiomo: Kpukpru anam mbet enyene ndifiọk nte ke edi mbiomo imọ ndimen eyen ukpepn̄kpọ Bible n̄wụt esop Abasi. (1 Tim. 4:16) Ẹkpenyene ndise ukpepn̄kpọ kiet kiet nte itiat utọ-ukot ndụk usen inemesịt emi obufa owo ediyarade uyakidem esie ọnọ Jehovah ke baptism mmọn̄. Kiet ke otu mbụme ẹmi ẹdibụpde enye ke ini edinam baptism edi: “Nte afo ọmọfiọk ke uyakidem fo nnọ ye baptism anam ẹdiọn̄ọ fi nte kiet ke otu Mme Ntiense Jehovah ke ebuana ye esop Abasi oro spirit ọnọde ndausụn̄?” Ntem, edi akpan n̄kpọ enye ndifiọk nte ke imọ ikemeke ndinam n̄kpọ Abasi ye unana edibuana ifịk ifịk ye ata esop Christian.—Matt. 24:45-47; John 6:68; 2 Cor. 5:20.
6 Ka iso ndinọ eyen ukpepn̄kpọ ukpep mban̄a esop n̄kann̄kụk ye ndutịm ofụri ererimbot emi odude ke edem Mme Ntiense Jehovah. Nam emi ke ini ukpepn̄kpọ Bible kiet kiet, ọtọn̄ọde ke akpa. Toto ke ata akpa ntọn̄ọ, nọ eyen ukpepn̄kpọ ikot edi mme mbonoesop, nyụn̄ ka iso ndinọ enye ikot.—Edi. 22:17.
7 Kama Mme N̄kpọutom Oro Ẹnọde: Mme mfọnn̄kan n̄wed nnyịn ndikama ke ndinịm mme ukpepn̄kpọ Bible ẹdi ediye uduot ekpri n̄wed Nso ke Abasi Oyom Oto Nnyịn? ye n̄wed Ifiọk Oro Adade Osịm Nsinsi Uwem. Mbiba ẹsio ufọn edibuana ye esop ẹwụt. Utịt ukpepn̄kpọ 5 ke ediye uduot ekpri n̄wed Oyom ọdọhọ ete: “Afo enyene ndikaiso n̄kpep n̄kpọ mban̄a Jehovah nnyụn̄ nnam mme n̄kpọ oro enye oyomde. Ndidụk mme mbonoesop ke Ufọkmbono Obio Ubọn̄ n̄kann̄kụk eke Mme Ntiense Jehovah eyen̄wam fi ndinam ntre.” N̄wed Ifiọk esịn udọn̄ ndien ndien ọnọ eyen ukpepn̄kpọ ndibuana ke mme mbonoesop. Ibuot 5, ikpehe ekikere 22, ọnọ ikot emi: “Mme Ntiense Jehovah . . . ẹsịn udọn̄ ẹnọ fi ufiop ufiop ndibuana ye mmọ ke ndituak ibuot nnọ Abasi ‘ke spirit ye ke akpanikọ.’ (John 4:24)” Ibuot 12, ikpehe ekikere 16, ọdọhọ ete: “Nte afo akade iso ke ukpepn̄kpọ emi onyụn̄ anamde enye edi ido fo ndidụk mbonoesop eke Mme Ntiense Jehovah, mbuọtidem fo eyekam okop idem akan oro.” Ibuot 16, ikpehe ekikere 20, ọdọhọ ete: “Nam edi edu fo ndidụk mme mbonoesop eke Mme Ntiense Jehovah.” Enye adian ete: “Emi eyen̄wam ndinam n̄kpọ an̄wan̄a fi ndien ekem ada ifiọk Abasi esịn ke edinam ke uwem fo eyenyụn̄ ada inemesịt ọsọk fi. Ndidi ubak otu nditọete Christian ofụri ererimbot eyen̄wam fi asan̄a ekpere Jehovah.” Ibuot 17 eneme mfọn mfọn aban̄a nte owo okụtde ata ifụre ke otu ikọt Abasi. Nte nnyịn ikpepde n̄kpọ ye mbon en̄wen, edi mbiomo nnyịn ndisọn̄ọ ntịn̄ mme ikpehe n̄wed ẹmi.
8 Ediye uduot ekpri n̄wed oro Mme Ntiense Jehovah—Ẹdiana Kiet Ẹnam Uduak Abasi ke Ofụri Ererimbot edi eti n̄kpọutom oro ẹnọde ndinam mme owo ẹmehe ye n̄kukụre esop oro ẹkụtde ke enyịn oro Jehovah adade anam n̄kpọ mfịn ndiyọhọ uduak esie. Ọyọhọ ntọt esịnede ke enye aban̄ade utom ukwọrọikọ, mme mbonoesop, ye esop nnyịn eyesịn udọn̄ ọnọ andikot ndibuana ye nnyịn ke ndituak ibuot nnọ Abasi. Ke ndondo oro ẹtọn̄ọde ukpepn̄kpọ Bible, ẹtoro ẹte nnyịn inọ eyen ukpepn̄kpọ oro idem ediye uduot ekpri n̄wed emi kiet man okot ke idemesie. Ufọn idụhe ndikpep n̄wed emi ye enye nte ẹkesinamde ke ini edem.
9 Ndusụk vidio oro N̄ka osion̄ode ẹdi mfọnn̄kan n̄kpọutom ndida mmen nditọ ukpepn̄kpọ n̄wụt ndutịm oro odude ke edem enyịn̄ nnyịn. Ọkpọfọn edieke mmọ ẹkpekemede ndise (1) The New World Society in Action, ndise senima 1954 oro ẹfiakde ẹbre oro owụtde ifụre ifụre, uforo uforo, ye ima ima edu emi esop Jehovah anamde n̄kpọ; (2) United by Divine Teaching, emi odụn̄ọrede emem emem edidianakiet oro ẹkewụtde ke ikpọ mbono ofụri ererimbot nnyịn ke N̄kan̄ Edem Usiahautịn Europe, Edem Usụk America, Africa, ye Asia; (3) To the Ends of the Earth, emi owụtde ọyọhọ isua 50 eke Ufọkn̄wed Enyọn̄-Ukpeme Ukpep Bible eke Gilead onyụn̄ owụtde utịp oro mme isụn̄utom ẹnyenede ke utom ukwọrọikọ ofụri ererimbot; (4) Jehovah’s Witnesses Stand Firm Against Nazi Assault, emi owụtde aduai-owo-idem mbụk aban̄ade uko ye edikan oro Mme Ntiense ẹkekande kpa ye afai afai ukọbọ oro Hitler ọkọkọbọde mmọ; ye, nte ededi, (5) Jehovah’s Witnesses—The Organization Behind the Name.
10 Nịm Utịtmbuba Ẹmi Ẹkade-Ka Iso Kaban̄a Mme Mbonoesop: Ẹnyene ndinam an̄wan̄a nditọ ukpepn̄kpọ nte ke nnyịn imoyom ọkpọkpọ ukpepn̄kpọ oro ẹnọde ke ukpepn̄kpọ Bible ẹnịmde ke ufọk ye mme nneme ubet ukpepn̄kpọ oro ẹnọde ke mme mbonoesop. (John 6:45) Oyom obufa owo ọkọri n̄ko ke edifiọk oro enye ọfiọkde N̄wed Abasi ye esop. Ke ntak oro, n̄kpọ idụhe ndida n̄kpụhọ ye edidụk mme mbonoesop. (Heb. 10:23-25) Tọn̄ọ nọ owo oro ikot ndidi mme mbonoesop ye unana ubiatini. Ndusụk mbufa mbon oro ẹnyenede udọn̄ ẹsitọn̄ọ ndidụk mme mbonoesop idem mbemiso ẹnyenede ukpepn̄kpọ Bible ofụri ini. Nte ededi, nnyịn ke idem nnyịn iyom ndinịm eti uwụtn̄kpọ ke ndidụk kpukpru ini.—Luke 6:40; Phil. 3:17.
11 Buana ntọt oro ekemde ban̄a mme mbonoesop ye nte ẹsinịmde mmọ man eyen ukpepn̄kpọ enyene ifụre ke ini odụkde akpa mbonoesop esie. Sia ndusụk owo ẹsitiede esen esen ke ini ẹkade mbufa ebiet ke akpa ini, ọkpọfọn ndisan̄a ye eyen ukpepn̄kpọ n̄ka Ufọkmbono Obio Ubọn̄ ke ini enye odụkde akpa mbonoesop esie. Enye oyokop idem inem akan edieke afo odude ye enye nte enye osobode mme andibuana ke esop. Ke kpukpru usụn̄, di eti enyeneufọk nọ esenowo fo, anamde enye okụt ke ẹdara imọ onyụn̄ enyene ifụre.—Matt. 7:12; Phil. 2:1-4.
12 Sịn udọn̄ nọ eyen ukpepn̄kpọ ndidụk usen akpan mbono, mbono circuit, m̀mê mbono district ke akpa ini ifet eberede. Iso-ọfọn afo emekeme ndisịn enye ke mme ndutịm n̄kpọisan̄ fo.
13 Demede Ntotụn̄ọ Esịtekọm: Ẹtịm Man Inam Utom Nnyịn Ima, page 92, anam an̄wan̄a ete: “Edieke ntotụn̄ọ esịtekọm oro afo enyenede aban̄a esop Jehovah owụtde idem ke mme nneme fo ye mbon oro ẹnyenede udọn̄, eyetịm edi mmemmem n̄kpọ ọnọ mmọ ndikọri esịtekọm eyenyụn̄ onụk mmọ ndinam ikpọ n̄kọri ke ndidi ndifiọk Jehovah.” Kpukpru ini tịn̄ ikọ oro ọbọpde-bọp, kûdede utịn̄ ikọ oro asuande-suan, uban̄a esop n̄kann̄kụk mbufo. (Ps. 84:10; 133:1, 3b) Ke akam oro afo ọbọn̄de ke ini ukpepn̄kpọ Bible, tịn̄ ban̄a esop ye ediyom oro oyomde eyen ukpepn̄kpọ abuana ye enye kpukpru ini.—Eph. 1:15-17.
14 Nnyịn ke akpanikọ iyom mbufa owo ẹkọri ntotụn̄ọ esịtekọm ẹnọ inem inem itie nsan̄a ye ifụre eke spirit oro ẹdude ke otu ikọt Abasi. (1 Tim. 3:15; 1 Pet. 2:17; 5:9) Nte Mme Ntiense Jehovah, ẹyak nnyịn inam kpukpru se nnyịn ikemede ndimen nditọ ukpepn̄kpọ Ikọ Abasi n̄wụt ndutịm oro odude ke edem enyịn̄ nnyịn.
[Ekebe ke page 3]
Nditọ ukpepn̄kpọ ẹsinam usọp usọp n̄kọri eke spirit ke ini mmọ ẹkụtde ndutịm ke idemmọ
[Ekebe ke page 4]
Kûnam ubịghi ndinọ nditọ ukpepn̄kpọ ikot ndidụk mme mbonoesop