Ndinịm Mme Ukpepn̄kpọ Bible Ẹmi Ẹnyenede Uforo
1 Nso ebuana ke nurse ke Tanzania, akparawa owo ke Argentina, ye eka eyen ke Latvia ẹnyene? Ẹbụk ke 1997 Yearbook (p. 8, 46, ye 56) ẹte ke ofụri owo ita ẹmi ẹma ẹnam usọp usọp n̄kọri ke ukpepn̄kpọ Bible mmọ, ke ntak unyịme mmọ ndinyene se ikande ikpehe ini ukpepn̄kpọ kiet ke urua kiet kiet ke n̄wed Ifiọk. Ẹtoro ẹte ke ini ekededi ẹkemede, mme asuanetop ẹkpenyene ndidomo ndineme ibuot kiet ke n̄wed oro ke ikpehe ini ukpepn̄kpọ kiet kiet. Nte ededi, edi ọkpọsọn̄ n̄kpọ ọnọ ndusụk owo ndinam ntre. Okposụkedi ekese edikọn̄ọde ke mme idaha ye edu eyen ukpepn̄kpọ kiet kiet, mme andikpep ẹmi ẹnyenede usọ ẹmekụt unen ebe ke ndinam mme ekikere ẹtienede mi.
2 Nte ẹkenemede ke esịne-esịt Utom Obio Ubọn̄ Nnyịn eke June 1996, oyom ọnọ nditọ ukpepn̄kpọ fo ukpep ndisitịm idem nnọ ukpepn̄kpọ. Ke ata ntọn̄ọ ntọn̄ọ, ọkpọfọn ndinam an̄wan̄a nnyụn̄ nnam n̄wụt nte ẹnamde emi. Wụt mmọ n̄wed Ifiọk oro afo esikamade ọkpọkpọ ke ukpepn̄kpọ. Ẹtịm idem ọtọkiet ẹnọ akpa ukpepn̄kpọ oro. N̄wam nditọ ukpepn̄kpọ ndikụt mme ọkpọ ikọ m̀mê mme ubak udịmikọ ẹmi ẹnọde ibọrọ nnennen nnennen ke mbụme oro ẹmịn̄de-mịn̄ ndien ekem ẹdụri udịm m̀mê ẹnịm idiọn̄ọ ke mmọ. Ndusụk asuanetop ẹmekam ẹnọ nditọ ukpepn̄kpọ mmọ eton̄wed m̀mê benetap ẹkama. Sịn udọn̄ nọ mmọ ndikot kpukpru itien̄wed Abasi nte mmọ ẹtịmde idem ẹnọ ukpepn̄kpọ oro. Ke ndinam emi, afo ọyọnọ mmọ ukpep n̄ko nditịm idem nnọ edidụk Ukpepn̄kpọ N̄wedesop ye Ukpepn̄kpọ Enyọn̄-Ukpeme.—Luke 6:40.
3 Eti andikpep ayanam eyen ukpepn̄kpọ etịn̄ ikọ inyụn̄ itịn̄ke ikọ ikaha ke idemesie. Enye efep ndiyak n̄kpri n̄kpọ ẹwọn̄ọde enye ntịn̄enyịn. Enye idiwakke ndida mme n̄kpọ efen efen ndisịn. Utu ke oro, enye osio mme akpan n̄kpọ ke ukpepn̄kpọ oro owụt. Ndusụk owo ẹmenọ nditọ ukpepn̄kpọ mme n̄wed efen efen ndin̄wam mmọ ẹkụt mme ibọrọ ke mme mbụme. Ke adianade do, mbon ẹmi ẹnyenede udọn̄ ẹyebọ ọyọhọ ntọt efen efen ebe ke ndidụk mme mbonoesop.
4 Eyedi idiyomke ẹkot kpukpru itien̄wed Abasi ẹsiakde ẹsịn ke ukpepn̄kpọ oro. Ẹkeme ndida mme itien̄wed oro ẹkotde ẹsịn ke ikpehe ekikere oro nnam ndusụk akpan n̄kpọ an̄wan̄a. Ke ini ndụn̄ọde, sio mme akpan itien̄wed ẹmi ẹkenemede wụt nyụn̄ sịn udọn̄ nọ eyen ukpepn̄kpọ nditi mmọemi.
5 Ikpehe Ini Kiet Kiet Ekpebịghi Adan̄a Didie?: Ukpepn̄kpọ inyeneke nditre ke hour kiet. Ndusụk mme enyeneufọk ẹsinyene ini ndien ẹkeme ndinyene udọn̄ ndikpep n̄kpọ mbịghi. Mîdịghe eyen ukpepn̄kpọ ekeme ndiyom ndikpep n̄kpọ awak akan ini kiet ke urua. Emi ekeme ndinyene ufọn nnọ mbon oro ẹkemede ndinam ntre.
6 Nte Isaiah 60:8 owụtde, mfịn ediwak tọsịn mbufa mme anditoro Jehovah ke mme itie ikie ‘ẹfe ẹdi nte obubịt enyọn̄, ye nte ibiom ẹka ke mme window mmọ’ ẹdidụk mme esop ikọt esie. Ẹyak kpukpru nnyịn inam udeme nnyịn ke ndinam utom ikpat kiet ye Jehovah nte enye anamde utom editan̄ mbon mbieterọn̄ mbok awara.—Isa. 60:22.