Mme Mbonoesop Ẹdemerede Owo Ẹnọ Nti Utom
1 Akpan ikpehe utuakibuot nnyịn iba ẹdi edidụk mme mbonoesop ye edibuana ke utom an̄wautom. Mbiba ẹsan̄a ikpat kiet. Kiet enyene odudu ke idem enye eken. Mme mbonoesop Christian ẹdemede owo ẹnọ nti utom, emi mfọnn̄kan ke otu mmọ edide utom edikwọrọ Obio Ubọn̄ ye edinam mbet. (Heb. 10:24) Edieke nnyịn ikpetrede ndidụk mme mbonoesop, nnyịn imekeme ndisọp ntre ndikwọrọ ikọ koro nnyịn idinyeneke se idemede nnyịn ndinam ntre.
2 Ke mme mbonoesop eke urua ke urua, nnyịn imesibọ item eke spirit oro ẹnọde man ẹnụk nnyịn ndikwọrọ ikọ. Ẹsisọn̄ọ ẹtịn̄ ẹnọ nnyịn nte ini edide usọp usọp, onụkde nnyịn ndida ọnọ-uwem etop Bible nsọk mbon en̄wen. Ẹsịn udọn̄ ẹnọ nnyịn ẹnyụn̄ ẹsọn̄ọ nnyịn idem ndiyọ ke utom ukwọrọikọ. (Matt. 24:13, 14) Ebede ke ndida mme ifet nnọ mme ibọrọ ke mme mbonoesop, nnyịn inen̄ede imehe nditịn̄ mbuọtidem nnyịn ke iso mbon en̄wen. (Heb. 10:23) Ebede ke ndisịn enyịn̄ ke Ufọkn̄wed Utom Ukara Abasi, nnyịn ibọ ukpep ndidi mme asan̄autom ẹmi ẹnen̄ede ẹnyene uforo inyụn̄ ifori mme usọ unọ ukpep nnyịn.—2 Tim. 4:2.
3 Nte Mme Esoputom Ẹdemede Nnyịn Ndikwọrọ Ikọ: Ẹsịn udọn̄ ẹnọ kpukpru nnyịn ndibem iso nse se idude ke Utom Obio Ubọn̄ Nnyịn. Ntọt emi ndien ọyọsọn̄ọ owụhọ nnyịn ke ekikere nte nnyịn idụkde Esoputom inyụn̄ ikụtde nte ẹnamde mme nneme ẹwụt ke mbot utịn̄ikọ. Ke ini idude ke an̄wautom, nnyịn imekeme ndifiak n̄kere mban̄a Utom Obio Ubọn̄ Nnyịn, iti mme nneme oro ẹkenamde ẹwụt, ndien ke ntre inọ ikọ ntiense oro etịmde enyene uforo. Emi edi ifiọk n̄kpọntịbe ediwak asuanetop.
4 Ke usụn̄ edinam n̄kpọ mban̄a mme Esoputom, ndusụk owo ẹsidiomi ndisan̄a ye mmọ en̄wen man ẹnam utom ọtọkiet ke utom ukwọrọikọ. Mme asuanetop ẹsụk ẹteti mme akpan n̄kpọ oro ẹnyenede n̄kpọ ndinam ye an̄wautom onyụn̄ edemede mmọ ndidomo mmọ nse koro mme mbonoesop ẹmi ẹmesịn udọn̄ ẹnọ mmọ ndinyene ebuana ke utom ukwọrọikọ kpukpru urua.—Heb. 10:25.
5 Ukpụhọ ndomokiet idụhe inọ mme mbonoesop Christian nnyịn, ẹmi isisopde idem ye mme ekemmọ andituak ibuot ẹmi ẹsinyụn̄ ẹdemerede nnyịn ẹnọ nti utom. Edieke anade utom ukwọrọikọ nnyịn enyene uforo, nnyịn inyene ndidụk mme mbonoesop kpukpru ini. Nnyịn ikpakam iwụt esịtekọm inọ utịbe utịbe ndutịm emi otode Jehovah mi ebe ke ‘nditre ndisịn ndisop idem ọtọkiet.’—Heb. 10:25.