N̄kani Owo Ẹkwọrọ Ikọ ye Unana Edikpa Mba
1 Nte mme owo ẹkọride ẹsọn̄, ediwak mmọ ẹdisak iso ẹse edikpọn̄ utom idịbi udia mmọ nnyụn̄ ndu uwem unana mfịna ke mme isua uwem mmọ oro ẹsụhọde. Mmọ ẹkeme ndikere nte ke mmimọ imanam utom ọkpọsọn̄ ekem ndien ke idahaemi imodot ndiduọk odudu. Mîdịghe mmọ ẹkeme ndikam nyom ndidara uwem, ke ofụri isua uwem osụhọde.—Luke 12:19.
2 Nte mme asan̄autom Jehovah oro ẹma ẹkeyak idem ẹnọ, nnyịn inyene isio isio idaha ekikere ke uwem. Nnyịn imọfiọk ite ke edikpọn̄ utom idụhe ke utom Abasi. Idaha ekikere nnyịn edi in̄wan̄în̄wan̄ koro nnyịn ifiọkde ke ‘emi edisụn̄ọ ke nsinsi uwem.’ (Jude 21) Mme isua ẹmi owo adade ọkọ ifiọk ye ifiọkutom ekeme ndifori mbufiọk ye ikike owo. Emi ekeme ndinam owo akabade enyene ọniọn̄ akan onyụn̄ etịm ada ukem ukem onyụn̄ owụt ntotụn̄ọ esịtekọm akan kaban̄a uwem. Kpukpru edu ẹmi ẹnen̄ede ẹnyene ufọn ẹnọ owo nte asan̄autom eti mbụk.
3 Ndikọri nsọn̄ idịghe sụk n̄kpọ aban̄ade owo ndisọn̄ ke ikpọkidem; enye abuana idaha ekikere owo n̄ko. Edieke afo oyomde ndidu uwem mbịghi onyụn̄ odomo ndidi nsek ke ekikere, ifet enen̄ede eberede ọnọ fi ndinam mbiba. Mbonusọn̄ ẹkeme ndifori uwem mmọ ebe ke ndikọri ifiọk eke spirit mmọ nnyụn̄ mbuana enye ye mbon en̄wen.—1 Cor. 9:23.
4 Mme Ataata Uwụtn̄kpọ: Ke edide isua 86, eyenete an̄wan kiet ọkọdọhọ ete: “Ke ini ntiede n̄kere isua 60 ẹmi ẹbede nte n̄kedifiọk akpanikọ, un̄wọn̄ọ Abasi oro ẹfiakde ẹsọn̄ọ ẹsiaha ke esịt mi. Ih, Jehovah emi edinyenede ima ọnọ mbonima ke ayak nnyịn idọk akpakịp idara.” (Ps. 18:25) Eyenete eren kiet oro ama ọkọsọn̄ ama eti nte n̄kpa n̄wan esie ekesịmde enye nte ata n̄kpọ n̄kpaidem, emi ke oro ebede idemesie ekenen̄ede ọdiọk. Enye ọkọdọhọ ete: “Edi, ebede ke mfọnido Jehovah oro owo mîdotke, mma n̄kop nsọn̄idem tutu edi se n̄kemede ndidụk utom usiakusụn̄ ke isua iba ẹma ẹkebe. Ami n̄wụt esịtekọm didie ntem nnọ Jehovah nte ke n̄kọri emi ke utom ukwọrọikọ ke akpanikọ amanam idem etịm ọsọn̄ mi!”
5Edi n̄kpọ odotde itoro didie ntem nte ke ata ediwak n̄kani owo ẹbiere ndika iso n̄kwọrọ ikọ nsịm udomo ekededi oro nsọn̄idem ye odudu mmọ ayakde—ye unana edikpa mba! Mmọ ẹnyene eti ntak ndifiori ete: “O Abasi, afo ama eteme mi toto n̄kedi eyenọwọn̄: ndien nsiak mme utịben̄kpọ fo tutu esịm ini emi.”—Ps. 71:17.