Afo Esinam N̄kpọ Didie Aban̄a Unana Udọn̄?
1 Unana udọn̄ edi unana ekikere m̀mê ntụk, unana edikere mban̄a. Enye edi kiet ke otu mme edu oro ẹdide ọsọ ẹnyụn̄ ẹsọn̄de ẹkan emi nnyịn isisobode ke utom ukwọrọikọ. Afo esinam n̄kpọ didie aban̄a oro? Ndi enye anam fi etehede ube ke utom ukwọrọikọ fo? Didie ke afo ekeme ndikan enye man ada etop Obio Ubọn̄ esịm mme owo?
2 Akpa, diọn̄ọ ntak emi mme owo ke efakutom mbufo ẹnanade udọn̄. Ndi edi koro mme adaiso ukara ye eke ido ukpono mmọ ẹkpude mmọ? Ndi mmọ ẹkere ke usọbọ idụhe ke mme mfịna oro mmọ ẹsobode? Ndi mmọ ẹnyene eyịghe ke mme un̄wọn̄ọ ẹban̄ade n̄kpọ ndikabade mfọn n̄kan? Ndi mmọ inyịmeke ndikere mban̄a mme n̄kpọ eke spirit ibọhọke mmọ ẹkụt mme ataata ufọn ke ndondo oro?
3 Sio Idotenyịn Obio Ubọn̄ Wụt: Idụhe mfịna oro Obio Ubọn̄ mîdikọkke. Ntre ke ini nnyịn ikemede ndinam ntre, nnyịn ikpenyene nditịn̄ mban̄a mme un̄wọn̄ọ Obio Ubọn̄, itịn̄de iban̄a mme akpan n̄kpọ emi N̄wed Abasi etịn̄de, idem ọkpọkọm idịghe se ẹkemede m̀mê se idotde ndiwụt itien̄wed Bible. (Heb. 4:12) Nte ededi, didie ke nnyịn ikeme nditọn̄ọ nneme n̄kesịm udomo oro?
4 Oyom mme owo ẹfiọk ntak emi nnyịn iwahade. Oyom mmọ ẹfiọk ẹte ke nnyịn ika do ke ntak ima mbọhọidụn̄ ye edikere mban̄a inyenede inọ mbio obio. Nnyịn imekeme ndibụp mbụme oro ẹtịmde ẹkere utọ nte, “Afo ekere ke nso idi usọbọ ke [mfịna oro otụkde mbio obio emi]?” Edieke usụn̄ unam n̄kpọ kiet mînyeneke ufọn, domo en̄wen.
5 Ke efakutom kiet emi mbon imọ ẹdụn̄de emi mme enyeneufọk ẹkenanade udọn̄ ẹban̄a etop Obio Ubọn̄, mme asuanetop ẹma ẹdomo ndiyom ntọn̄ọikọ oro edidemede owo udọn̄. Ke ini ẹnọde n̄wed Ifiọk, ebe ye n̄wan ẹma ẹdomo ntọn̄ọikọ emi: “Ndi afo emekere ke eti ubọ ukpep edi akpan n̄kpọ kaban̄a edikụt unen ke ererimbot mfịn? Ndi afo emenyịme nte ke ọyọhọ ubọ ukpep ekpesịne ifiọk Bible?” Ke uwemeyo kiet mmọ ẹma ẹnịm n̄wed ita, kiet ke otu emi ye n̄wan emi ọkọdọhọde ke ukperedem ete ke imọ ima ikot ofụri n̄wed Ifiọk oro ikụre okonyụn̄ enyịmede ukpepn̄kpọ Bible.
6 Ke ini afo osobode unana udọn̄, domo nsio nsio usụn̄ unam n̄kpọ, bụp mme mbụme oro ẹnamde owo ekere n̄kpọ, nyụn̄ da odudu emi Ikọ Abasi enyenede nam n̄kpọ. Afo emekeme ke ntem ndin̄wam mbon en̄wen ẹnyene utịbe utịbe idotenyịn Obio Ubọn̄ nnyịn.