Deme Mbụk Obio Ubọn̄ Nọ. 35 Ntatara Ntatara
1 October ye November ẹdidi mme ọfiọn̄ ẹmi ẹyọhọde ye utom ẹnọ kpukpru nnyịn. Ke akpa usen 11 ke ọfiọn̄ October, nnyịn idinọ mme editobo edide Awake! m̀mê Enyọn̄-Ukpeme m̀mê magazine mbiba. Ekem, ọtọn̄ọde ke Sunday, October 12, esịm Sunday, November 16, nnyịn iyetiene ibuana ke ndideme Mbụk Obio Ubọn̄ Nọ. 35 eke ofụri ererimbot. Edidi ifet ọnọ nnyịn ndida akpan etop nsọk kpukpru owo ke n̄kann̄kụk nnyịn. Enye edi ibọrọ mbụme oro, “Ndi Tutu Amama Kpukpru Owo Ẹyema Kiet Eken?” Ke ini san̄asan̄a ubịnikọt emi, nnyịn iyedeme Mbụk Obio Ubọn̄ Nọ. 35 ke ufọturua. Ke mme utịturua, ke adianade ye edinọ Mbụk Obio Ubọn̄, nnyịn iyọnọ mme editobo magazine Enyọn̄-Ukpeme ye Awake! Ke ebiet emi owo mîbọhọ editobo, ẹkeme ndinọ idem magazine kiet kiet.
2 Mmanie Ẹkeme Ndibuana? Nte ido edide, mbiowo ẹdida iso ke utom emi. Enem kpukpru owo ndideme Mbụk Obio Ubọn̄, ndien nte eyịghe mîdụhe ata ediwak asuanetop ẹyesịn enyịn̄ nte mme asiakusụn̄ unọ un̄wam ke kiet m̀mê mbiba ke mme ọfiọn̄ ubịnikọt oro. Mme asuanetop eken ẹyeyom ndibiat ini efen efen n̄kan nte ẹsinamde ke utom ukwọrọikọ.
3 Ndi afo emenyene eyen ukpepn̄kpọ Bible emi akade anyan ke ukpepn̄kpọ esie ke n̄wed Ifiọk emi edisọpde ndidot ndibuana ke utom an̄wautom? Eyedi enye ekeme ndikabade ndi asuanetop oro mînaha baptism nte ini akade man abuana ke ubịnikọt Mbụk Obio Ubọn̄. Mmemmem nneme edi n̄kukụre se ẹyomde man ẹnọ tract emi. Ke uwụtn̄kpọ, owo ekeme ndidọhọ: “Etop emi edi ata akpan n̄kpọ tutu edi se ẹdemede enye ke ofụri ererimbot ke ọfiọn̄ emi ke usem 169. N̄kpama fi ọbọ okwommọ.” Idem n̄kpri nditọ ẹkeme ndibuana mfọn mfọn ke aduai-owo-idem utom emi.
4 Mme ada ukpepn̄kpọ n̄wedesop ẹkpenyene ndisịn udọn̄ nnọ kpukpru mme andibuana ke otu mmọ ndinyene ọyọhọ ebuana ke ndideme Mbụk Obio Ubọn̄ Nọ. 35. Ekeme ndidu mme asuanetop n̄ko ẹmi mînamke aba utom edi ẹmi ẹkpefiakde ẹnam utom edieke ẹbọde nsịnudọn̄ oro oyomde. Mbemiso ubịnikọt oro, mbiowo ẹkpenyene ndika n̄kosobo owo kiet kiet ke otu mmọemi man ẹse se ẹkemede ndinam ndin̄wam mmọ ẹsan̄a ye mme asuanetop ẹmi ẹnyenede mbufiọk ke ikpehe utom ukwọrọikọ emi.
5 Ini Ewe ke Ikeme Ndisop Idem Kaban̄a Utom? Kpukpru edinam emi ediyom mme ndutịm unọ ikọ ntiense otu emi eferede owo ke idem onyụn̄ ọfọnde. Ke ebiet ekededi ẹkemede, ẹkpenyene ndidiomi mme mbono an̄wautom nnọ usen kiet kiet ke urua, ke mme utịturua, ye ke mme mbubịteyo. Ẹkpenyene ndinịm mmọ ke mme ini oro ẹdin̄wamde mme asuanetop ye mme asiakusụn̄ ndida ini unọ ikọ ntiense nnam n̄kpọ nte ọfọnde ọyọhọ ọyọhọ. Ẹkeme ndinam mme ndutịm n̄ko ndisop idem ke mme utịt utịt uwemeyo ke ufọn nditọ ufọkn̄wed, mme anamutom ẹsikpụhọde-kpụhọ ini utom, ye mmọ eken. Esenyịn utom ekpenyene ndikụt nte ke efakutom eke ufọk ke ufọk ye eke mbubehe ẹdu man otodo kpukpru owo ẹkeme ndibuana ọyọhọ ọyọhọ ke utom emi. Ke ebiet emi ediwak asuanetop ẹdude ke ikpehe kiet, mmọ ẹkpenyene ndiwụt ọniọn̄ kaban̄a ibatowo ẹmi ẹnamde utom ke ndusụk ikpehe ke efakutom oro.
6 Nso Kaban̄a Mme Ufọk Oro Owo Mîdụhe? Nnyịn iyom ndinyene nneme ọkpọkpọ ye adan̄a ediwak enyeneufọk nte ikekeme man inam an̄wan̄a ntak mmọ ẹkpekotde Mbụk Obio Ubọn̄ Nọ. 35. Ntre edieke owo ndomokiet mîdụhe ke ufọk ke ini awahade, wet adres nịm nyụn̄ fiak waha ke ini efen ke usen oro. Edieke edide ke akpatre urua ubịnikọt emi afo usụk ukemeke ndikụt mme enyeneufọk ẹmi, afo emekeme ndinịm idem Mbụk Obio Ubọn̄ kiet ke enyịnusụn̄ ke ebiet emi mbon ẹmi ẹsan̄ade ẹbe mîkemeke ndikụt. Ke mme ikpehe ufọkidụn̄, du ke edidemede ndinọ mbon ẹmi ẹsan̄ade ẹbe ke efak Mbụk Obio Ubọn̄. Ke ini anamde utom ke mme obio-in̄wan̄ ye ke ebiet emi efakutom okponde akan se ẹkemede ndikụre ke ini ubịnikọt oro, ẹkeme ndinịm Mbụk Obio Ubọn̄ ke mme ufọk oro owo mîdụhe ke akpa ediwaha.
7 Nso Idi Uduak Nnyịn? Mme esop ẹkpenyene ndidomo ndida ofụri Mbụk Obio Ubọn̄ ẹnọde n̄kụre kpukpru efakutom mmọ mbemiso ubịnikọt okụrede ke November 16. Edieke efakutom ẹdemede ẹnọ esop mbufo enen̄ede okpon ndien edieke mfịna mîdụhe afo ndisan̄a ikpọn̄ utu ke ye nsan̄a, afo emekeme ndikụt ke ọfọn ndinam ntre. Emi ayan̄wam fi ndida eti mbụk nsịm adan̄a ediwak owo ẹmi ẹdotde nte ekekeme. (Matt. 10:11) Ekeme ndidi se ifọnde afo ndikama ibat ibat tract ke ubọk ye Bible ke ekpatọfọn̄ m̀mê ekpatokụk fo, utu ke ndikama ekpatn̄wed. Kụt ete ke emenyene eti n̄wetnnịm n̄kpọ aban̄a ebiet oro okụtde udọn̄.
8 Nte Afo Emeben̄e Idem Nditọn̄ọ? Mbiowo ẹkpenyene ndibem iso n̄kere mban̄a udiana ibat magazine oro esop ediyomde ẹkpenyụn̄ ẹnyene nditobo nte ekemde ye oro. Ufọn idụhe nditobo Mbụk Obio Ubọn̄ Nọ. 35, sia edide ẹyenọ ẹsọk esop kiet kiet. Mme akpan asiakusụn̄, asiakusụn̄ ofụri ini, ye mme asiakusụn̄ unọ un̄wam ẹdinyene idem 60 ndideme, ke adan̄aemi ẹdinọde mme asuanetop esop kiet kiet idem 20. Ẹdeme utom nnyịn ẹnọ nnyịn. Nte afo emenyene ọkpọsọn̄ udọn̄ ndibuana ke inem inem utom emi? Eyịghe idụhe nte ke emenyene. Ẹyak nnyịn ideme akpan etop emi ọkọn̄ọde ke Bible oro odude ke Mbụk Obio Ubọn̄ Nọ. 35 ntatara ntatara nte ikekeme!