Nte Afo Edi Ntiense Uyọhọ Ini?
1 Nte afo ọkpọbọrọ ih ke mbụme emi? Okposụkedi mîdịghe kpukpru mme asan̄autom Jehovah oro ẹma ẹkeyak idem ẹnọ ẹkeme ndisịn enyịn̄ ke utom uyọhọ ini, nte iwụtke eti ibuot ndidori enyịn ke kpukpru nnyịn ikpenyene ndise idem nnyịn nte Mme Ntiense uyọhọ ini esie? Ke akpanikọ nnyịn ikpenyene ndise.
2 Idụhe utọ n̄kpọ oro nte Christian ibio ini. Jesus eketịn̄ aban̄a Ete esie ete: “Ami [nnam] se inemde Enye esịt kpukpru ini.” (John 8:29) Paul, emi ekekerede ukem ntre, ama akpak ete ‘inam kpukpru n̄kpọ inọ Abasi ubọn̄.’ (1 Cor. 10:31) Ke ntre, kpukpru nnyịn ikpenyene ndida idem nnyịn nte Mme Ntiense uyọhọ ini Jehovah. Nnyịn ndikere ntre ayanam nnyịn inam eti ke kpukpru edinam oro nnyịn isịnde idem.
3 Kere Ban̄a Uyarade: Ukamaidem, ikọinua, ye eduuwem nnyịn ẹkeme ndiwụt mbon en̄wen ke nnyịn ke akpanikọ idi Mme Ntiense Jehovah. Nnyịn imesidu ke edidemede iban̄a ediyom oro oyomde ukamaidem owụtde iso o-bụt, eti ikọinua, ye eti eduuwem ke ini ekededi oro ibuanade ke utom an̄wautom m̀mê idụkde mme mbonoesop Christian. Nte ededi, edide nnyịn ika ufọkn̄wed, inam utom idịbi udia, m̀mê ibuana ke unọ idem nduọkodudu, kpukpru n̄kpọ oro ẹban̄ade nnyịn ẹkpenyene ndinọ uyarade nte ke nnyịn ida ndinen idaha Jehovah idu uwem.
4 Jesus ọkọdọhọ ete: “Obio eke ẹbọpde ke enyọn̄ obot ikemeke ndidịbe. . . . Yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.” (Matt. 5:14-16) Emi ekpedi ntre ke kpukpru se nnyịn inamde ye ke kpukpru ini. Edieke akanam nnyịn ikụtde ke nnyịn imemen̄e ndinọ ikọ ntiense ke ntak ebiet emi idude m̀mê se inamde, oyom ibụp idem nnyịn ite, ‘Nte ami nnam n̄kpọ Jehovah ibio ini m̀mê ke uyọhọ ini?’ Nnyịn ikpakam itre ndidede nyak ifet editịn̄ nnọ mbon en̄wen mban̄a eti mbụk Obio Ubọn̄ Abasi ebe.
5 Ti, nnyịn ikpono inyụn̄ inam esịt enem Jehovah ke ini nnyịn ikemede ndibọrọ “Ih!” ye nsọn̄uyo ke mbụme emi, “Nte afo edi Ntiense uyọhọ ini?”