Nte Afo Emesikot Mme Magazine?
1 Ebe ye n̄wan ẹdide mme isụn̄utom ke Africa ẹketịn̄ emi ẹban̄a mme magazine nnyịn: “Enyọn̄-Ukpeme esin̄wam nnyịn ndidu ke edidemede ke n̄kan̄ eke spirit ke efakutom nnyịn. Nnyịn imesibọ nsịnudọn̄ ye odudu ito nsiondi kiet kiet.” Ndi afo emenyene ukem ntotụn̄ọ esịtekọm oro aban̄a mme n̄wed nnyịn? Ndien ndi afo emenyene ọkpọsọn̄ udọn̄ ndikot mmọ?
2 Esida ekese ini nditịm mme ibuotikọ magazine oro ẹkemede ndikot mma ke minit ifan̄ kpọt. Ke ọfiọkde emi, ndi afo n̄kukụre editotop enyịn ise mme ibuotikọ, ese mme ndise, mîdịghe ke ini ke ini okot ibuotikọ kiet oro omụmde ntịn̄enyịn fo? Nnyịn iyedi ọniọn̄ edieke inamde se ikande oro. Nnyịn ikpenyene ndida ini n̄kot nnyụn̄ ndụn̄ọde kpukpru ibuotikọ ke kpukpru nsiondi magazine nnyịn. Enyọn̄-Ukpeme edi akpan n̄wed nnyịn ẹdade ẹnọ ekem-ini udia eke spirit. Awake! esikama mme inem inem ibuotikọ ye mme ibuotikọ oro ẹsịnede ifiọk ke nsio nsio ibuot nneme. Se nnyịn ikpepde ebe ke ndikot mme magazine ẹmi isọn̄ọke nnyịn idem ke n̄kan̄ eke spirit kpọt edi n̄ko etịm nnyịn idem ọnọ edibuana ke utom ukwọrọikọ ke usụn̄ oro enyenede uforo akan. Ke nnyịn ke idem nnyịn idide mbon oro ikotde enye kpukpru ini, nnyịn iyenyene ifiopesịt iban̄a edinọ mbon efen mme magazine ẹmi.
3 Nte Ẹkemede Ndifori Edu Ukot N̄wed: Ndi afo emekeme ndinam ọfọn ke ndika iso n̄kot mme magazine kpukpru ini? Emi edi ekikere iba oro ẹnyenede ufọn ẹnọ ediwak owo. (1) Nyene ndutịm ukot n̄wed ofụri ini. Ebede ke ndikam nsio minit 10 m̀mê 15 nnịm ke usen kiet kiet ndikot, idem ayakpa fi aban̄a udomo oro afo edikemede ndikot ke ufan̄ urua kiet. (2) Nyene usụn̄ ndifiọk se ama okokot. Ndusụk afo emekeme ndisịn idiọn̄ọ ke ntọn̄ọ ibuotikọ kiet kiet oro afo okotde. Mûnamke emi, afo emekeme nditre ndikot ndusụk ibuotikọ m̀mê idem ofụri magazine kiet. Edi akpan n̄kpọ ndinyene ndutịm ukot n̄wed oro ọfọnde ye afo ndinyụn̄ ntiene enye.—Men Philippi 3:16 domo.
4 “Asan̄autom emi anamde akpanikọ, onyụn̄ enyenede ọniọn̄” anam n̄kpọ ke ọniọn̄ etiene nte mme ini ẹkpụhọrede ebe ke ndision̄o mme ibuotikọ oro ẹnemede se idide ata udọn̄ mme owo. (Matt. 24:45) Ke akpanikọ, mme magazine ẹmi ẹmetụk uwem nnyịn. Udomo n̄kọri eke spirit oro inamde, ke akamba udomo, ọkọn̄ọ ke uduot edu ukot n̄wed ukara Abasi nnyịn. Akwa edidiọn̄ eke spirit odu ọnọ mbon oro ẹsiode ini ẹnịm ẹnọ edikot kpukpru magazine.