Ubiere Nnyịn—Nditiene Usụn̄ Uwem Jehovah

¹ Akpan n̄kpọ udọn̄ ke mme Mbono “Usụn̄ Uwem Abasi” ekedi ubiere oro ẹkenamde ke akpatre utịn̄ikọ. Enye ọkọtọn̄ọ ye ntọt emi: “Nnyịn . . . imenyịme ke ofụri esịt ite ke usụn̄ Abasi edi mfọnn̄kan usụn̄ uwem.” Ti ndusụk mme akpan n̄kpọ ubiere oro, emi kpukpru nnyịn ikọdọhọde, “IH!”

² Edi ubiere nnyịn ndika iso ndi edisana ke iso Jehovah, ikpemede idem ye idiọkn̄kpọ oro odude ke ererimbot. Nnyịn iyaka iso ndinịm uduak Abasi akpa ke uwem nnyịn. Ke idade Ikọ esie, kpa Bible, nte ndausụn̄ nnyịn, nnyịn idiwọn̄ọkede ika nnasia m̀mê ufien, ntem isọn̄ọde nte ke usụn̄ Abasi enen̄ede ọfọn akan usụn̄ ererimbot.

³ Ererimbot ke ofụri ofụri ofụmi usụn̄ uwem Abasi onyụn̄ ọdọk mme utịp. (Jer. 10:23) Nnyịn ke ntre inyene ndika iso mbọ ukpep nto Akwa Anditeme nnyịn, Jehovah, emi ọdọhọde ete: “Emi edi ọkpọusụn̄, mbufo ẹsan̄a ke esịt.” (Isa. 30:21) Nte ẹwụtde ke N̄wed Abasi, usụn̄ uwem Jehovah ọfọn ke kpukpru idaha. Man itiene usụn̄ oro, oyom nnyịn ibọ ọyọhọ ufọn ito kpukpru se Jehovah ekpepde nnyịn.

⁴ Eti Ndutịm Unọ Ukpep Jehovah: Jehovah ekpep nnyịn ata uduak ke uwem ye nte ikemede ndida uwem nnyịn nnam n̄kpọ man ibọ mfọnn̄kan ufọn. Enye ekpep nnyịn nte ikemede ndifori uwem nnyịn ke n̄kan̄ eke ekikere, eke ido uwem, ye ke n̄kan̄ eke spirit. Enye ekpep nnyịn nte ikemede ndidu ke emem ye nditọete nnyịn, ubon nnyịn, ye ekemmọ owo. Enye anam emi ebe ke n̄wed ukpepn̄kpọ esie, kpa Bible, onyụn̄ ebe ke esop esie.

⁵ Mme mbono esop nnyịn ẹnyene akwa ufọn ke afan̄ emi. Nte nnyịn idụkde inyụn̄ ibuanade kpukpru ini ke kpukpru mbono esop ition, nnyịn ibọ ọyọhọ ukpep nte mme asan̄autom eti mbụk ye ukpep oro etịmde ada ukem ukem ke udu uwem Christian. (2 Tim. 3:16, 17) Akwa Anditeme nnyịn ọnọ n̄kaiso ukpep eke ukara Abasi ebe ke n̄kpri ye ikpọ mbono. Utịtmbuba nnyịn ekpedi editre ndidede ntaba mbono esop m̀mê ikpehe edinam edieke nsọn̄idem ye mme idaha nnyịn ẹyakde nnyịn idụk.

⁶ Nnyịn ikpakam ika iso isịn ifịk nditiene usụn̄ uwem Abasi ke mme usen ẹdide, kpukpru kaban̄a itoro Jehovah ye ke nsinsi ufọn nnyịn!—Isa. 48:17.