Babak Nam Ndutịm!

¹ Esop Jehovah odiomi ndutịm kaban̄a mme edinam ukara Abasi ofụri ini man ẹyụhọ ofụri udọn̄ nnyịn ke n̄kan̄ eke spirit. Esịtekọm onụk nnyịn ndibọ ufọn ọyọhọ ọyọhọ nto kpukpru n̄kpọ oro ẹdiomide, utọ nte edidi esenyịn oro asan̄ade-san̄a, mme mbono ye ikpọ mbono, ye mme san̄asan̄a edinam eken oro ẹdiomide ke n̄kann̄kụk. (Matt. 5:3) Nte ededi, ndusụk owo ẹsitaba ediwak ke otu mme ndutịm eke spirit ẹmi ke ntak ediomi eken oro mmọ ẹnamde. Nso ke ẹkeme ndinam man ẹkpan emi? Didie ke nnyịn ikeme nditịm n̄kụt nte ke mme edinam oro mîdịghe eke ukara Abasi ifụkke “se ifọnde ikan”?—Phil. 1:10.

² Ọniọn̄ Ọniọn̄ Ndutịm Edi Akpan N̄kpọ: Mme N̄ke 21:5 eteme ete: “Ekikere mme ọsọp-ubọk ẹkọ uwak ikpọn̄-ikpọn̄: edi kpukpru owo ibụmede ẹkọ unana ikpọn̄-ikpọn̄.” Man ikọ “uwak” eke spirit, oyom nnyịn ibabak inam ndutịm nte ọfọnde, itide mme edinam ukara Abasi oro ẹma ẹkedodiomi. Nnyịn ikpenyene ndidiomi mme ọkpọkpọ edinam nnyịn ke ini mmọ mîdibiọn̄ọke nnyịn ndidu man ibọ mme edidiọn̄ eke spirit. Edieke nnyịn inamde ndutịm ibụmede ibụmede man inam mme n̄kpọ oro nnyịn iyomde ndinam ọkpọkpọ, ye unana edikere mban̄a mme edinam ukara Abasi oro ẹdide, eyedi nnyịn ididu ke “unana” eke spirit.

³ Kûtaba! Kpukpru nnyịn imesinam ndutịm inọ ini iso, esịnede edinam ndutịm nnọ mme ini nduọkodudu, mme isan̄ mbubehe, edika isan̄ ye mme iman, ye ntre ntre eken. Mbemiso afo enyịmede n̄kpọ m̀mê ọsọn̄ọde mme ndutịm fo, dụn̄ọde mme ndutịm edinam eke spirit oro ẹdide. Edieke afo okụtde ete ke esenyịn circuit ke edi m̀mê nte ke ẹdiomi mbono ke ukem ini oro ekemede ndidi afo ududụhe, sịn ofụri ukeme ndifiak ndiomi mbubehe fo man otodo afo ekpekeme ndibuana. Ẹsisian nnyịn ke ata anyan ini ẹban̄a mme akpan edinam oro ẹdiomide ke ini iso. Mbiowo ke esop mbufo ẹkeme ndisian fi mban̄a se ẹdiomide ke n̄kann̄kụk.

⁴ Ebede ke ndiwụt ikike nnyụn̄ mbabak nnam ndutịm nnọ se ifọnde ikan, nnyịn ‘iyọyọhọ ye mbun̄wụm eti ido, inọ Abasi ubọn̄ ye itoro.’—Phil. 1:11.