Nam Ini Oro Afo Abiatde Odot
1 Kpukpru owo ẹnyene ukem udomo ini oro ẹkemede ndida nnam n̄kpọ ke urua kiet kiet. Ubak oro nnyịn isịnde ndisuan eti mbụk enen̄ede ọsọn̄ urua koro enye edi ini oro ẹbiatde ke utom unyan̄a uwem. (Rome 1:16) Nnyịn iwụt esịtekọm nnyịn iban̄a emi ebe ke nditịm idem mfọn mfọn nnọ utom oro ẹdiomide, ikade mme mbono an̄wautom ke ini, inyụn̄ iwọrọde ika efakutom ye unana ubiatini. Nnyịn ikpọkwọrọ ikọ utu ke ndibebet. Sia Jehovah ekpepde nnyịn ete ke “ẹmenịm ini ẹnọ kpukpru n̄kpọ,” oyom nnyịn inam ini oro nnyịn ikosiode inịm inọ utom ukwọrọikọ enen̄ede odot.—Eccl. 3:1.
2 Da Ini Fo Nam N̄kpọ Ọniọn̄ Ọniọn̄: Nnyịn imesinyene ediwak edidiọn̄ ke ini nnyịn itienede ndutịm oro ayakde ibuana kpukpru ini ke utom ukwọrọikọ. Nte ido edide, nti utịp oro nnyịn inyenede ke utom ukwọrọikọ ẹkpenyene ndikem ye udomo ini oro nnyịn ibiatde ke an̄wautom. Ye ndusụk n̄kpri ukpụhọde ke edinam ofụri ini nnyịn, nte nnyịn imekeme ndisịn ini efen efen ke utom an̄wautom? Ke uwụtn̄kpọ, ke ima ikokụre utom magazine ke Saturday, nte nnyịn imekeme ndida ini efen efen nnam ibat ibat mfiakn̄ka? Edieke edide nnyịn imodu ke an̄wautom ke ndusụk ini ke Sunday, nte nnyịn imekeme ndibiat ndusụk ini n̄ko ke ndinam mme mfiakn̄ka m̀mê ke ndinịm ukpepn̄kpọ Bible? Nte imekeme ndidian edinọ ikọ ntiense efak ke utom eke ufọk ke ufọk nnyịn? Ke mme usụn̄ ẹmi m̀mê mmọ en̄wen, nnyịn imekeme ndinam n̄kọri ke utom nnyịn.
3 Ke ini nnyịn idude ke an̄wautom, nnyịn imekeme nditaba ọsọn̄urua ini edieke nnyịn mîkpemeke. Edi akpanikọ, ke ini idaha eyo ọdiọkde, ọkpọfọn ndiyom mfụt m̀mê itie udakibuot. Nte ededi, ke ediwak idaha nnyịn imekeme ndida ini oro n̄kwọrọ ikọ m̀mê ke ndikpep mbon efen akpanikọ. Nte nnyịn imekeme ndidak ibuot ke ufọk owo oro enyenede udọn̄ m̀mê kiet ke otu nditọ ukpepn̄kpọ Bible nnyịn?
4 Ke mme isua ndondo ẹmi, etetịm ọsọn̄ ndikụt mme owo ke ufọk. Man ẹse ẹban̄a idaha emi, ediwak asuanetop ẹsinam unọ ikọ ntiense eke enyịnusụn̄ ke enyịnusụn̄ mmọ ke isio isio ini ke usen. Ntak mûdomoke ndinọ ikọ ntiense ke utịt utịt uwemeyo m̀mê ke ntọn̄ọ ntọn̄ọ mbubịteyo?
5 Ọkpọfọn edieke nnyịn mîdaha ọtọkiet ineme nneme ke adan̄aemi ibuanade ke utom efak. Utu ke oro, ẹda nsannsan ẹkpọn̄ kiet eken ẹnyụn̄ ẹka ẹbịne mme owo man ẹtọn̄ọ nneme ye mmọ. Ntem ẹyeda ini ẹnam n̄kpọ uforo uforo ẹkan ndien ẹyenyene idara okponde akan ke utom.
6 Da Mme Ifet Ẹbererede Nọ Ikọ Ntiense: Ke ini enyeneufọk kiet ọkọdọhọde ete ke imọ ikenyeneke udọn̄, Ntiense kiet ama obụp m̀mê owo efen ama odu ke ufọk emi imọ ikemede nditịn̄ ikọ nnọ. Emi ama ada ekesịm edinyene nneme ye ete enyene ufọk oro, emi ọkọdọn̄ọde ke ediwak isua ndien ekesinade ke bed ediwak ini. Idotenyịn oro ẹwụtde ke Ikọ Abasi ama afiak edemede enye udọn̄ ndidu uwem. Ibịghike enye ama ọbọhọ udọn̄ọ oro, esidụk mme mbono esop ke Ufọkmbono Obio Ubọn̄, onyụn̄ abuana obufa idotenyịn esie ye mbon efen!
7 Eyenete an̄wan kiet edide uyen ama ada ekikere ndibuana ke an̄wautom ke ini oro odude mbemiso Ukpepn̄kpọ N̄wed Esop esịn ke edinam. Ke akpa enyịnusụn̄ oro enye akawahade, enye ama osobo n̄kaiferi oro ekedide isua 13 emi ekenen̄erede ọnọ n̄kpan̄utọn̄ onyụn̄ ọbọ n̄wed. Ke edem usen ke ufọkn̄wed, ekpri eyenete an̄wan emi ama okụt ukem n̄kaiferi emi. Ibịghike ke oro ebede, enye ama oyom ndikpep Bible ye enye, ndien n̄kaiferi oro ama enyịme.
8 Nam Enye Edi Eti: Ndinyene ebuana ofụri ini ke utom an̄wautom an̄wam nnyịn ndikọri usọ nnyịn ke ndikwọrọ eti mbụk. Nte afo emekeme ndifori ukeme fo nditọn̄ọ nneme ke enyịnusụn̄ ebe ke ndida ntọn̄ọikọ oro etịmde enyene uforo? Nte afo emekeme ndikabade ndi andikpep oro etịmde enyene usọ ke ini enịmde ukpepn̄kpọ Bible? Ke ndinam ntre, afo ke akpanikọ emekeme ndinam ini oro afo abiatde ke an̄wautom odot onyụn̄ anam utom ukwọrọikọ fo enyene utịp akan.—1 Tim. 4:16.
9 Sia ‘ẹsịbede ini omụhọ,’ uwem nnyịn ekpenyene ndiyọhọ ye mme utom Christian. (1 Cor. 7:29) Ndisio ini nnịm nnọ utom ukwọrọikọ ekpenyene ndidi akpa ke udịm mme ebeiso n̄kpọ nnyịn. Ẹyak nnyịn inyene eti, ifịk ifịk ebuana ke utom ukwọrọikọ. Ini edi utịbe utịbe inyene oro Jehovah ọnọde nnyịn. Kpukpru ini, da enye nam n̄kpọ ke eti ibuot nyụn̄ nam enye odot.
[Ekebe ke page 4]
Kere Ban̄a Mme Ekikere Ẹmi:
◼ Ka mme mbono an̄wautom ke ini.
◼ Nte owụtde eti ibuot, nam otu unọ ikọ ntiense edi ekpri.
◼ Fep ubiatini ke ndikesịm efakutom.
◼ Nam utom ke efakutom ke ini ediwak owo ẹdude ke ufọk.
◼ Nam utom ikpọn̄ ndusụk ini edieke enyenede ifụre ndinam ntre.
◼ Nam mme mfiakn̄ka ẹtịm ẹkpere efakutom oro anamde utom eke enyịnusụn̄ ke enyịnusụn̄.
◼ Yọhọ ye edinam ke an̄wautom ke ini mbon efen ke otu oro ẹbiatde ini ke enyịnusụn̄ kiet.
◼ Da mme ini oro etrede utom ke ntak idiọk enyọn̄ nam n̄kpọ ke eti usụn̄.
◼ Ke ebiet ekededi ekemede, ọkọn̄ọde ke mme idaha ẹdude, du bịghi kan hour kiet.