Yak Itịn̄ Akpan N̄kpọ!
1 Ndusụk owo mfịn inyeneke ime. Mmọ ẹyom ndidiọn̄ọ owo oro nnyịn idide ye ntak emi nnyịn idude do. Ke ini mmọ ẹfiọkde ẹte ke uduak ediwaha nnyịn edi ndineme mban̄a Bible, mmọ ẹkeme ndisịn ndikpan̄ utọn̄. Edikot Bible ye nneme eke spirit idịghe mme akpan n̄kpọ ke uwem ediwak owo. Didie ke nnyịn ikeme ndinam mme utọ enyeneufọk oro ẹnịm nte ke mmọ ẹkpenyene ndida minit ifan̄ nneme ibuotikọ Bible ye nnyịn?
2 Se Ifọnde Ikan: Akpan n̄kpọ edi ndiwụt enyeneufọk nte ke Bible ọnọ mme ata usọbọ ke mme mfịna oro ẹbehede enye ndien da ikọ ifan̄ nte ekekeme nam ntre. Mme nneme ẹmi ẹsitịmde ẹnyene uforo ẹsiwụt akpan mbụme oro etịmde man anam enyeneufọk ekere n̄kpọ, ndien ekem itien̄wed oro ọbọrọde mbụme oro etiene. Afo emekeme ndima ndidomo ndusụk ke otu mme ekikere ẹmi nse. Ẹtịm mmọ man ẹn̄wam nnyịn isọsọp itịn̄ akpan n̄kpọ ke adan̄aemi idemerede udọn̄ enyeneufọk.
3 Ke efakutom emi mme owo ẹsiwakde ndidọhọ ke mmimọ inyeneke udọn̄, demede mbụme oro abuanade mmọ ọkpọkpọ:
◼ “Nte nnyịn isan̄ade ikpere tọsịn isua efen, nte afo ọyọhọ ye idotenyịn m̀mê ọyọhọ ye eyịghe? [Bet ibọrọ.] Bible ama ebem iso etịn̄ aban̄a mme ntịme ntịme n̄kpọntịbe oro nnyịn ikụtde mfịn ọkọrọ ye utịp mmọ.” Kot 2 Timothy 3:1, 2, 5 ye Mme N̄ke 2:21, 22.
◼ “Ẹnyene ekese udọn̄ ke idụt emi ẹban̄a nsọn̄idem. Nte afo ama ọdiọn̄ọ ke Abasi ọn̄wọn̄ọ ete ke imọ iyọkọk kpukpru mfịna nsọn̄idem ke nsinsi?” Kot Ediyarade 21:3, 4.
◼ “Afo ekere ke ufọn akpasan̄a didie esịm obio nnyịn edieke kpukpru owo oro ẹdude uwem mi ẹkpedade mme edumbet Bible ẹsịn ke edinam?” Kot Matthew 22:37-39.
4 Sia utom ẹnọde nnyịn edide edikwọrọ eti mbụk Obio Ubọn̄, ini ekededi oro ikemede nnyịn ikpenyene ndidụri ntịn̄enyịn n̄wụt se Obio Ubọn̄ oro edinamde. Afo emekeme ndidọhọ:
◼ “Nte afo ama ọdiọn̄ọ ke n̄wed oro ebịghide akan ke ererimbot, kpa Bible, ama ebem iso etịn̄ ete ke ukara kiet edidu ke ofụri ererimbot?” Kot Daniel 2:44.
◼ “Afo ekere ke mme idaha ẹditie didie edieke Jesus Christ akarade isọn̄?” Kot Psalm 72:7, 8.
5 Ke efakutom emi mme owo ẹdide mbon ido ukpono, afo emekeme ndidomo kiet ke otu ntọn̄ọikọ ẹmi nse:
◼ “Ẹsari ediwak owo ke ntak mmọ ẹdide eren m̀mê n̄wan, ke ntak ido ukpono, ekpụk, m̀mê uduot ikpọkidem. Afo ekere ke Abasi ese utọ asari oro didie?” Kot Utom 10:34, 35.
◼ “Nnyịn imọdiọn̄ọ ite ke Jesus Christ ama anam ediwak utịben̄kpọ ke eyo esie. Edieke afo ekpekemede ndidọhọ enye anam utịben̄kpọ kiet efen, ewe ke ekpedi?” Kot Psalm 72:12-14, 16.
6 Edieke enyeneufọk emen̄ede ndiberede usụn̄, afo emekeme nditọn̄ọ nneme ke ndidọhọ:
◼ “Ata ediwak owo mfịn ẹkpa mba ke ndikop mban̄a mme mfịna. Mmọ ẹyom ndikop mban̄a mme usọbọ. Eyịghe idụhe nte ke ntre ke edi ye afo. Edi m̀mọ̀n̄ ke nnyịn ikeme ndikụt mme ata usọbọ nnọ mme mfịna nnyịn?” Bet ibọrọ. Kot 2 Timothy 3:16, 17.
7 Ntak Mûdomoke Enye Use? Ediwak ini mmemmem, ibio ibio mbụme edi ofụri se ẹyomde man ẹdemede udọn̄ enyeneufọk. N̄wan kiet emi ke akpa ekesibiọn̄ọde ama ọdọhọ nditọete iban iba ẹdụk ẹdi ufọk imọ ke kiet ke otu mmọ ama okobụp mbụme emi: “Nte afo ọmọdiọn̄ọ Obio Ubọn̄ oro afo esibọn̄de akam aban̄a ke Akam Ọbọn̄?” Mbụme oro ama edemede n̄wan oro udọn̄, ndien enye ama enyịme ukpepn̄kpọ Bible. Enye idahaemi edi asan̄autom Jehovah oro ama akayak idem ọnọ!
8 Ke ini afo etịn̄de ikọ ọnọ enyeneufọk, yak se etịn̄de edi ke esịt akpanikọ. Tịn̄ to esịt fo. Eyedi mme owo ẹyesọp ẹnam n̄kpọ mfọn mfọn ẹban̄a ke ini mmọ ẹnịmde ke akpanikọ ẹte ke nnyịn imenen̄ede inyene udọn̄ ke idem mmọ.—Utom 2:46, 47.
9 Utom edikwọrọ eti mbụk edi n̄kpọ-ata mfịn. Ndusụk enyeneufọk ẹsinyene eyịghe ẹban̄a isenowo. Mbon efen ẹdu uwem oro ọyọhọde ye utom ẹnyụn̄ ẹnyene esisịt ini ndibiat. Edi, nnyịn imekeme ndinịm ke akpanikọ nte ke ediwak mbon oro ẹdotde ẹsụk ẹdodu oro anade ẹyom. (Matt. 10:11) Eyedi ukeme nnyịn ndiyom mmọ eyenen̄ede okụt unen edieke nnyịn inamde nneme nnyịn edi ibio ibio inyụn̄ itịn̄de akpan n̄kpọ!