Nyene Ntotụn̄ọ Ukpono nọ Ubọn̄ Ubọn̄ Enyịn̄ Jehovah
1 Satan ama abiat enyịn̄ Abasi ke ini enye akatapde akpa ete ye eka nnyịn ndinam idiọkn̄kpọ. Devil ọkọdọhọ ke n̄kari ete ke Jehovah okosu nsu ọnọ Adam. (Gen. 3:1-5) Sia enyịn̄ Abasi enyenede ebuana ye ukeme Abasi ndinam ikọ esie osu, edori ikọ Satan ekedi ndiọk-n̄kan edidọk. Ebede ke ndinam uduak esie osu ke adiana ke adiana, Jehovah anam enyịn̄ esie ọbọhọ esuene onyụn̄ ọnọ enye ubọn̄.—Isa. 63:12-14.
2 Nnyịn idi mme owo oro Jehovah ‘osiode enyịn̄ esie.’ (Utom 15:14, 17) Emi ọnọ nnyịn ifet ndiwụt nte nnyịn ikerede iban̄a edinam enye asana. Nnyịn imokụt ite ke enyịn̄ Jehovah enen̄ede enyene ubọn̄ ke akpanikọ, koro enye adade aban̄a kpukpru n̄kpọ oro ẹdide eti, ẹfọnde, ẹwụtde ima, ẹwụtde mbọm, ẹnyụn̄ ẹnende. Nnyịn iyọhọ ye uten̄e iban̄a ubọn̄ ubọn̄ enyịn̄ Abasi. (Ps. 8:1; 99:3; 148:13) Okponụk nnyịn ndinam nso?
3 Nam Enyịn̄ Abasi Asana: Owo ikemeke ndinam enyịn̄ Abasi asana akan nte asanade idahaemi. Edi ebede ke edisana ido nnyịn ye edikwọrọ Obio Ubọn̄, nnyịn imekeme ndiwụt nte ke nnyịn imenyene ata ntotụn̄ọ ukpono inọ enyịn̄ Abasi. Eyak nnyịn ifiori: “Mbufo ẹkọm Jehovah, ẹseme ẹkot enyịn̄ esie, ẹmen se enye anamde ẹtan̄a ẹnọ mme idụt, ẹti owo ẹte ke enyịn̄ esie okon̄.” (Isa. 12:4) Didie ke nnyịn ikeme ndinam emi?
4 Nnyịn imekeme ndida kpukpru ifet oro ẹbererede nditan̄a enyịn̄ Jehovah ye kpukpru se enye adade aban̄a. Edide ke ata ata usụn̄ ukwọrọikọ m̀mê eke ido nneme, to ke ufọk sịm ufọk mîdịghe to ke ufọkurua sịm ufọkurua, ke efak m̀mê ke urụk ukopikọ, utom ukwọrọikọ nnyịn ọnọ Jehovah ukpono. Ke ini nnyịn ikụtde mbon oro ẹnyenede udọn̄ ẹmi ẹkpan̄de utọn̄, nnyịn ikpenyene ndimek nnennen ini ndifiak n̄ka mbịne nnyụn̄ n̄kekpep mmọ mme n̄kpọ efen efen mban̄a Jehovah. Oro ọwọrọ ete ke ana nnyịn ye unana edikpu ika nte ikodiomide inyụn̄ iyịre ke ukeme nnyịn nditọn̄ọ mme ukpepn̄kpọ Bible. Nte enemde, kpukpru isua ediwak tọsịn owo ke mme itie ikie ke ẹdi ẹdidiọn̄ọ, ẹdikpono, ẹnyụn̄ ẹnam ubọn̄ ubọn̄ enyịn̄ Jehovah asana.
5 Ebuana ofụri esịt nnyịn ke utom edinam enyịn̄ Abasi asana owụt ebiet emi idade kaban̄a eneni oro Satan ekedemerede ke Eden in̄wan̄în̄wan̄. Emi edi ata uku uku ye ukpono ukpono utom oro nnyịn ikemede ndinam. Ẹyak nnyịn inyene ata ntotụn̄ọ ukpono inyụn̄ itoro ubọn̄ ubọn̄ enyịn̄ Jehovah ifịk ifịk!—1 Chron. 29:13.