Nte Afo Emeben̄e Idem Ndikot N̄wed Nnyụn̄ N̄wet N̄kpọ?
1 Ikọ Abasi, kpa Bible, anam mme ata Christian ẹfiọk ufọn ‘ediben̄e idem ke kpukpru nde ndinam nti utom ekededi’ ebe ke ifiọk oro enye ọnọde. (2 Tim. 3:17) Ntem ẹtịm mme asan̄autom Jehovah idem nte odotde ebe ke mme mbono esop. Ikpọ owo oro mîkemeke ndikot nnyụn̄ n̄wet usem ekededi ẹsinen̄ede ẹdara edikere mban̄a eke esop Jehovah. Ntem ẹma ẹwụt inikiet ke magazine U.S. Catholic nte ke “ke ọfiọn̄ kiet, [K]ingdom [H]all ekededi eyenọ ukpepn̄kpọ ikpọ owo oro okponde akan se ekese ikpọ itie ukpepn̄kpọ mbon Catholic ẹkpepde ke isua kiet.”
2 Utọ ukpepn̄kpọ ikpọ owo oro abuana ukpep edikot n̄wed nnyụn̄ n̄wet n̄kpọ oro ẹnamde ẹnọ ikpọ owo ẹmi mîkemeke ndikot n̄wed m̀mê ndiwet n̄kpọ, adianade ye ntatara ntatara item ukpep Bible oro ẹnọde man ẹdiọn̄ọ mme ido ẹdide akpan n̄kpọ ke uwem Christian, esịnede editịm nse nditọwọn̄ enyịn. Edi nso ke ọwọrọ ndiben̄e idem? N̄wed ukabadeikọ kiet akabade ben̄e nte ‘ndinọ owo se ẹyomde, kaban̄a uduak m̀mê utom.’
3 Ke ama ọkọtọt ete ke ufọt 1962 ye 1976, ke Nigeria ikpọn̄, ẹma ẹnọ owo 15,156 ukpep ke ndikot n̄wed nnyụn̄ n̄wet n̄kpọ, Awake! eke February 22, 1978 ama adian ete: “Mmọ ẹkenen̄ede ẹdi mme owo ẹtode obio-in̄wan̄—mme ọtọin̄wan̄, mme ata-utop, mme ọkọiyak, ye iban ufọk ndọ. Ubiere mmọ ndinyene ifiọk Bible ye ndikeme ndinọ item N̄wed Abasi ama afiak edemede udọn̄ mmọ ndibọ ukpep.” Nso eti uduak kaban̄a edikpep ndikot n̄wed nnyụn̄ n̄wet n̄kpọ ke emi edi ntem! Nte utọ ubiere oro idinemke Jehovah esịt? Nso n̄kpọutom ke ẹyom ndien man ẹkụt unen ke ubọ ukpep ikpọ owo emi ebe ke ndutịm edikpep ndikot n̄wed nnyụn̄ n̄wet n̄kpọ?
4 Akpan N̄kpọutom: Jehovah ama asian prọfet Isaiah ete: “Da akamba ikpa-n̄wed ke idem fo, nyụn̄ da ntan̄wed owo wet ke esịt.” (Isa. 8:1, sịghisịghi ubọkn̄wed edi eke nnyịn.) Eyịghe idụhe, prọfet oro ama eben̄e idem ọnọ utom oro akanade enye ke iso. Ke ntre, ke ini owo ebierede onyụn̄ osiode ini enịm, ana enye enyene mme ọkpọkpọ n̄kpọ ndida n̄kpep n̄kpọ: n̄wed ukpepn̄kpọ (How to Read and Write), n̄wed uwet n̄kpọ, ọkpọ usọhi n̄kpọ, ye benetap m̀mê eton̄wed ndida nnam mme utom ubet ukpepn̄kpọ. Ọfọn ndinyene mme n̄kpọ ẹmi ke ekpat emi ẹnịmde san̄asan̄a ẹnọ ukpepn̄kpọ.
5 Kpa nte un̄wam mme ete ye eka edide akpan n̄kpọ ọnọ eti ubọ ukpep nditọ, ntre ke un̄wam ubon edi ọnọ ikpọ owo. Utọ un̄wam oro eyesịne ukpono ẹnyenede ẹnọ n̄kpọutom ufọkn̄wed ikpọ owo, udọn̄ ke utom ufọkn̄wed esie, ye edidianakiet man ẹn̄wam akwa owo emi ndinam utom oro enye akamade ke ubọk.
6 Kere ban̄a se ọtọ-in̄wan̄ akpanamde edieke enye okpoyomde nditọ in̄wan̄ a-bia. Enye eyebem iso etem onyụn̄ etịbi isọn̄. Emi ọkpọwọrọ edinyene udọk ye ofụt. Ekem enye oyoyom mbuot a-bia. Didie ke ọtọ-in̄wan̄ okpokụt unen ke mînyeneke mme utọ akpan n̄kpọutom ẹmi? Enye ekeme ndisobo n̄kpọsọn̄ ini ke usụn̄, edi eyedi mmemmem n̄kpọ ọnọ ọtọ-in̄wan̄ oro eben̄ede idem ndiyọ utọ n̄kpọsọn̄ ini oro tutu esịm ini idọk. Nte edide ye ọtọ-in̄wan̄, kpa ntre ke edi ye owo oro oyomde ndikpep nte ẹkotde n̄wed ẹnyụn̄ ẹwetde n̄kpọ—ana enyene mme akpan n̄kpọutom. Ọtọ-in̄wan̄ edikop uyụhọ didie ntem ke ini ọdọkde eti idọk, ke ama akakpa utom! Edieke edide ẹsịn fi enyịn̄ ke ufọkn̄wed oro ẹkpepde nte ẹkotde n̄wed ẹnyụn̄ ẹwetde n̄kpọ, nte afo emeben̄e idem ndikot n̄wed nnyụn̄ n̄wet n̄kpọ?