Da Mme Tract Tọn̄ọ Nneme
1 Nte afo unyịmeke nte ke ndinọ ikọ ntiense uforo uforo ọkọn̄ọ akamba akamba ke afo ndibem iso ntọn̄ọ nneme? N̄kpọ-ata edi nditịn̄ n̄kpọ oro omụmde owo udọn̄ nnyụn̄ nnam enye enyene ebuana. Edi didie ke ẹkeme ndinam emi uforo uforo?
2 Ediwak asuanetop ẹkụt nte ke ẹkeme ndida mme ikọ ifan̄ oro ẹtịmde ẹmek ntọn̄ọ nneme ebe ke ndinọ kiet ke otu mme tract nnyịn oro ẹkọn̄ọde ke Bible. Mme ibuotikọ mmọ ẹdemede udọn̄, ndien mme ndise mmọ ẹwak uduot ẹnyụn̄ ẹye. Tract inamke owo okop ndịk, anamde ẹkere nte ke ata ediwak ntọt odu ndikot. Edi, ibio ibio etop oro odude ke mme tract ẹmi anam owo ekere n̄kpọ ẹnyụn̄ ẹkeme ndida enye nnam n̄kpọ man ada ekesịm ukpepn̄kpọ Bible.
3 Ntiense kiet ekekere ntem: “Ke ererimbot unana ini emi, mme owo iyomke ndida ekese ini n̄kot n̄wed, edi mme tract ẹkponi ẹkem ndinọ ata akpan etop edi ikponike ikaha ndinam mme owo ẹwọn̄ọde ntịn̄enyịn ẹkpọn̄ enye. Ami mma n̄kot ediwak tract ẹmi, ndien ke akpatre mma n̄kpep akpanikọ.” Kûdede use odudu Ikọ Abasi oro ẹnamde an̄wan̄a ke mbio mbio etop emi ẹmịn̄de mi ke usụhọde.—Heb. 4:12.
4 Mmemmem Usio-Ukot Inan̄: Ediwak owo ẹkụt unen ebe ke ndikama mmemmem usụn̄ edisobo. (1) Wụt owo ibat ibat tract nyụn̄ bụp enye m̀mê ewe ke enye ama. (2) Ke owo oro ama ekemek kiet, bụp mbụme kiet oro ama eketịm mfọn mfọn oro osiode ata akpan n̄kpọ ke tract oro owụt. (3) Ke ibọrọ mbụme oro, kot ikpehe ekikere m̀mê itien̄wed kiet to tract oro. (4) Edieke ẹnọde n̄kpan̄utọn̄, ka iso ndineme se isịnede ke tract oro mîdịghe tịn̄ ban̄a ukpepn̄kpọ kiet ke ediye uduot ekpri n̄wed Oyom m̀mê ibuot kiet ke n̄wed Ifiọk oro esịnede mme utịn̄ikọ efen efen. Ke usụn̄ emi afo emekeme ndibe nnennen nnennen ndụk ukpepn̄kpọ Bible. Mme ekikere ẹtienede mi ẹyen̄wam fi nditịm se editịn̄de, akamade inan̄ ke otu tract ẹmi.
5 Ẹkeme ndibụp ibuotikọ tract oro “Anie Enen̄ede Akara Ererimbot?” nte mbụme.
◼ Edieke owo emi afo adade eneme nneme ọbọrọde “Abasi” m̀mê “Mfiọkke,” kot udịmikọ iba oro ẹdade ẹtọn̄ọ page 2 ye akpa ikpehe ekikere ke page 3. Tịn̄ se idude ke 1 John 5:19 ye Ediyarade 12:9. Edide owo oro enịm nte ke Satan kpa Devil odu m̀mê inịmke m̀mê enyịme ke enye akara ererimbot m̀mê inyịmeke, afo emekeme ndida ekikere emi odude ke idak ekpri ibuotikọ oro “Usọbọ ke Mme Idaha Ererimbot” n̄ka iso ke nneme. Edieke ẹwụtde udọn̄, dọhọ ke imọn̄ inam an̄wan̄a ebiet emi Devil okotode edi, adade mme akpan n̄kpọ ẹdude ke page 3 ye 4 ke tract oro.
6 Tract oro “Nso Idotenyịn Idu Inọ Mbonima Ẹmi Ẹkpade?” ekeme ndisọsọp ndemede owo udọn̄. Afo emekeme nditọn̄ọ nneme ke ndibụp:
◼ “Nte afo emekere ke tutu amama nnyịn iyafiak ikụt mbonima nnyịn ẹmi ẹkekpan̄ade?” Ke owo oro ama ọkọnọ ibọrọ, wụt udiana ikpehe ekikere ke page 4 ke tract oro nyụn̄ kot John 5:28, 29. Ekem nam an̄wan̄a nte ke enye an̄wam ndinam ẹfiọk ntọt oro esịnede ke akpa ekpri ibuotikọ ke tract oro. Dọhọ ke imọn̄ ineme ọtọkiet ye enye.
7 Tract oro “Dara Uwem Ubon” edemede udọn̄ mme ubon ke ofụri ekondo. Ke akamade enye, afo emekeme ndidọhọ ete:
◼ “Ekeme ndidi eyenyịme nte ke ubon odu ke en̄wan mfịn. Afo ekere ke nso ke ẹkeme ndinam man ẹsọn̄ọ mbọbọ ubon?” Ke owo oro ama ọkọnọ ibọrọ, dụri ntịn̄enyịn esie ka mme akpan n̄kpọ ẹdude ke akpa ikpehe ekikere ke page 6. Nam an̄wan̄a se kiet ke otu itien̄wed oro ẹkotde ẹsịn ke page 4 ye 5 ke tract oro ọwọrọde. Ekem dọhọ ke imọn̄ inịm ukpepn̄kpọ Bible mfọn.
8 Ẹkeme ndikama tract oro “Ntak Afo Ekemede Ndiberi Edem ke Bible” ke usụn̄ nneme enye emi:
◼ “Ata ediwak owo ẹkop mbụk Cain ye Abel, emi ẹkụtde ke akpa n̄wed ke Bible. Mbụk odude ke Genesis etịn̄ n̄ko aban̄a n̄wan Cain. Nte akanam afo emekere m̀mê enye okoto m̀mọ̀n̄?” Da akpatre ikpehe ekikere ke page 2 ke tract oro nọ ibọrọ. Nam an̄wan̄a nte ke tract oro eneme n̄ko mme akpan n̄kpọ oro Bible etịn̄de aban̄a se ini iso nnyịn akamade. Ka iso ke nneme oro, adade mme itien̄wed ẹmi ẹnọde nsọn̄ọ ke ọyọhọ ikpehe ekikere ita ke page 5.
9 Ndisuan tract edi uforo uforo usụn̄ ndinọ eti mbụk oro ẹma ẹkedomo ke anyan ini ẹse. Sia mmọ ẹmemde ndikama n̄ka ebiet ekededi emi afo akade, afo emekeme ndikama mmọ nnam n̄kpọ uforo uforo ke utom fo to ke enyịnusụn̄ sịm enyịnusụn̄, ye ke ini ọnọde ikọ ntiense ido nneme. Mme tract ẹnyene akpan udeme ke utom ukwọrọikọ nnyịn. Kụt ete ke amakama nsio nsio orụk, onyụn̄ ọnọ mmọ ke ntatubọk ndida ntọn̄ọ nneme.—Col. 4:17.