Neme Ikọ Jehovah Kpukpru Usen!
1 Usen kiet kiet akama mbufa n̄kpọ-ata ndidomo mbuọtidem fo. Eyedi ọdiọn̄ọ edide owo ererimbot aka iso ndifịna fi ete ọwọrọ an̄wa ye imọ. Andikpep fo ekeme ndiyom fi ebịne ubọkọkọ ererimbot, m̀mê eteutom fo ndiyom fi anam utom ke ata ediwak hour. Ekeme ndidi udọn̄ọ ke afịna fi. Okposụkedi afo edisobode mme utọ idomo ẹmi ke ini ekededi, afo udụhe ikpọn̄. Jehovah eben̄e idem ndinọ fi ọniọn̄ oro oyomde man ese aban̄a mmọ. Ndineme itien̄wed Bible ye mme utịn̄ikọ ke Ẹdụn̄ọde N̄wed Abasi edi usụn̄ kiet emi afo ekemede ndikot Ikọ Jehovah kpukpru ini. Nte afo ọmọbọ ufọn oto ndutịm emi?
2 Un̄wam Odu: Isaiah 30:20 (NW) etịn̄ aban̄a Jehovah nte “Akwa Anditeme” emi ikọt Abasi ẹkemede ndiberi edem kaban̄a un̄wam. Enye ọnọ fi nnennen se afo oyomde ndiyọ mme n̄kpọ-ata mbuọtidem fo. Didie? Udiana ufan̄ikọ Isa 30:21 anam an̄wan̄a ete: “Utọn̄ fo oyokop uyo ke edem fo, ete, ‘Emi edi ọkpọusụn̄, mbufo ẹsan̄a ke esịt.’” Mfịn, Jehovah ọnọ “uyo” esie ebe ke N̄wed Abasi ye mme n̄wed ‘ofụn anam-akpanikọ.’ (Matt. 24:45) Akpakịp ọniọn̄ odu ke n̄kani ibuotikọ Enyọn̄-Ukpeme ikpọn̄, ẹmi otụkde ke ekperede ndidi kpukpru ikpehe uwem Christian. Ndifiak ndụn̄ọde mbon oro ẹkotde ẹsịn ke Ẹdụn̄ọde N̄wed Abasi ayan̄wam fi ndinyene akpakịp ọniọn̄ emi edin̄wamde fi ndiyọ kpukpru orụk idomo.—Isa. 48:17.
3 Diomi Ini Nọ Enye: Idem okposụkedi ini ekesinanade ke mme usenubọk, eka kiet ama anam edi ido ndisikot nnyụn̄ nneme itien̄wed ye mme utịn̄ikọ ye eyen esie ke adan̄aemi adiade udia usenubọk. Mme ikọ ẹmi ye akam ẹkedi mme akpatre ikọ ẹmi enye ekesikopde kpukpru usenubọk mbemiso akade ufọkn̄wed. Mmọ ẹma ẹsọn̄ọ enye idem ndibiọn̄ọ idomo edinam idan̄, nditre ndikan̄ mbuọtidem ke ini osobode ufreidụt, ye edinọ nditọ ufọkn̄wed ye mme andikpep ikọ ntiense uko uko. Okposụkedi enye ekedide n̄kukụre Ntiense ke ufọkn̄wed, akananam enye ikekereke ke idu ikpọn̄.
4 Beri edem ke Jehovah ye Ikọ esie kaban̄a ndausụn̄. Edieke afo anamde ntre, enye eyedi ata owo ọnọ fi, nte ufan ibetedem. Ka bịne enye kpukpru usen! Ke adianade ye ediwak miliọn mbon en̄wen ẹmi ẹdụn̄ọrede Ikọ Abasi ke usen ke usen ke ofụri ererimbot, afo akpakam okụt nte enyịn fo ẹkabarede ẹdi ‘enyịn ẹmi ẹkụtde Akwa Anditeme fi.’