April—Ini Ndisịn Ifịk Nnam Nti Utom!
1 Nte oyobio ekperede n̄kann̄kụk oro mme owo ẹdụn̄de, oyom ẹsọsọp ẹtọt mme owo ẹban̄a n̄kpọndịk oro asan̄ade ekpere. Nte oyobio oro ekperede akan, ntre ke ana ẹdori nsọn̄uyo ke ntọt oro ẹkan. Ntak-a? Koro uwem ẹdude ke itiendịk! Ekeme ndidi ndusụk owo ikokopke ntọt oro ẹkebemde iso ẹnọ. Ekeme ndidi mbon eken ẹma ẹkop edi ẹfụmi ndinam n̄kpọ mban̄a. Ntre ke edi ye ntọt oro Abasi ọdọn̄de nnyịn itọt mbemiso “oyobio” edinen iyatesịt Abasi osion̄o kpukpru in̄wan̄în̄wan̄ idiọn̄ọ idiọk ererimbot emi efep. (N̄ke 10:25) Nsinsi uwem ediwak biliọn owo ẹdu ke itiendịk! Ana ẹnọ ntọt. Ana nnyịn ‘isịn ifịk inam nti utom.’—Titus 2:11-14, NW.
2 Ke ediwak isua, ẹmenụk ikọt Jehovah ndinam ini Editi edi ini ndisịn san̄asan̄a ifịk ke utom ukwọrọikọ. Ke ini utọ eke 1939, Informant, emi ekebemde Utom Obio Ubọn̄ Nnyịn iso, ama ọnọ nsịnudọn̄ emi: “Ke ini utọ emi edide, ye ini eti idaha eyo, nnyịn ikpenyene ndidori enyịn ndikụt hour mme asuanetop ke esop awakde utịm ikaba akan nte esidide, ndien hour mme asiakusụn̄ ẹnen̄erede ẹdọk. April edi ọfiọn̄ emi enyenede Sunday ition. Enye enyene Saturday ition n̄ko. Nam kpukpru Saturday ye Sunday ke April . . . ẹdi san̄asan̄a ini unọ ikọ ntiense.” Oro ekedi akamba utịtmbuba oro ẹkenịmde ẹnọ nditọete ke isua 60 ko ke edem! Isua emi, kpa nte ekedide ke 1939, ọfiọn̄ April enyene ọyọhọ ọyọhọ utịturua ition. Nso idi ndutịm fo ọfiọn̄ emi? Nso n̄wetnnịm n̄kpọ ke afo ewet ke n̄wed usenọfiọn̄ fo ọnọ April 2000? Diomi ndinyene ntatara ebuana ke nti utom ye ikọt Jehovah eken ke san̄asan̄a ọfiọn̄ n̄kọri ke utom eke spirit emi.
3 Se Idoride Enyịn Ndinam: Ata akpan usen ke isua 2000 edi ke ọfiọn̄ emi. Enye edi April 19, edifiak nti n̄kpa Jesus. Ẹyak nnyịn isịn san̄asan̄a ukeme ndikot adan̄a ediwak owo nte ikekeme ẹdi Editi. Nte ẹkenọde ekikere ọfiọn̄ oko, wet enyịn̄ kpukpru owo oro ẹkemede ndidụk Editi nyụn̄ kụt ete ke ufreke owo ndomokiet. Mbon oro ẹkotde ẹkpenyene ndisịne asuanetop ekededi emi mînamke utom aba, nditọ ukpepn̄kpọ Bible, mme mfiakn̄ka, mbon oro ẹkesikpepde n̄kpọ ini kiet ko, mme nsan̄autom, nsan̄a ufọkn̄wed, mbọhọidụn̄, iman, ye mme ọdiọn̄ọ. Nte mbon oro ẹyomde ndidụk ẹnyene n̄kpọisan̄? Edieke mînyeneke, nte afo emekeme ndin̄wam ke ima ima usụn̄? Ke mbubịteyo oro ẹdinịmde Editi, kpukpru nnyịn iyenyene ifet ndikọm mbon oro ẹdụkde. Ke Editi asuanade, nnyịn imekeme ndinọ utọ mbon oro ẹnyenede udọn̄ mi un̄wam eke spirit efen efen.
4 ‘Ndisịn ifịk nnam nti utom’ mbemiso ye ke Editi ebede edi eti usụn̄ ndiwụt Jehovah nte ke nnyịn imenen̄ede iwụt esịtekọm ke kpukpru se enye anamde ọnọ nnyịn. Edieke afo anamde utom usiakusụn̄ unọ un̄wam, oyoyom afo anam ofụri ukeme fo ndibiat hour 50 m̀mê akande oro ke utom ukwọrọikọ. (Matt. 5:37) Sọn̄ọ yịre ke ndutịm oro afo akanamde ke ntọn̄ọ ọfiọn̄ oro. (Eccl. 3:1; 1 Cor. 14:40) Nnyịn mbon eken ikpakam inam se nnyịn ikemede ndinọ kpukpru mme asiakusụn̄ ibetedem, ebe ke ndisịn udọn̄ nnọ mmọ ye ke ndisan̄a ye mmọ ke an̄wautom. (Men 2 Ndidem 10:15, 16 domo.) Edieke nnyịn itọde ifịk ifịk ke April, nnyịn imekeme ndidori enyịn ndinyene akamba inemesịt ye edidiọn̄ otode Jehovah. (Mal. 3:10) Eyedi emi ayanam n̄kpọ nte usio-ukot ndika iso ke usiakusụn̄ unọ un̄wam m̀mê ndidụk usiakusụn̄ ofụri ini. Ifịk eke spirit oro iwụtde ke April akpakam aka iso ebe esịm mme ọfiọn̄ oro ẹditienede nte nnyịn ikade iso ndidi mme asuanetop Obio Ubọn̄ ofụri ini.
5 Nte eyịghe mîdụhe, ediwak tọsịn ikọt Jehovah ẹyetọn̄ọ mme ukpepn̄kpọ Bible efen efen ọfiọn̄ emi. Nte afo akpama nditọn̄ọ ukpepn̄kpọ kiet? Bọn̄ akam san̄asan̄a yom ukpepn̄kpọ, nyụn̄ nam n̄kpọ ke n̄kemuyo ye akam fo. Afo emekeme ndinịm ke akpanikọ nte ke Jehovah ayadara eben̄e nsụhọdeidem fo kaban̄a un̄wam ndikụt owo oro enyenede esịt akpanikọ man ekpep enye n̄kpọ.—1 John 3:22.
6 Emi edi usụn̄ edisobo kiet ke an̄wautom oro ẹma ẹkedodomo ẹse oro enyenede uforo ndida ntọn̄ọ nneme. Afo ọtọn̄ọ ebe ke ndibụp: “Nte afo emekere ke kpukpru afai oro ẹnamde ke mme ufọkn̄wed, ẹdi utịp utom mme demon m̀mê enye oto unana ete ye eka ndinọ ukpep?” Bet ibọrọ. Edieke owo oro ọdọhọde “utom mme demon,” kot Ediyarade 12:9, 12, nyụn̄ sọn̄ọ tịn̄ udeme oro Devil enyenede ke ndisịn udọn̄ nnọ ndutịme ke ererimbot. Ekem kụbọde ediye uduot ekpri n̄wed Oyom ka ukpepn̄kpọ 4, nyụn̄ bụp m̀mê akanam owo oro eyịk ebiet emi Devil otode. Ka iso ndikot nnyụn̄ nneme akpa ikpehe ekikere iba. Edieke owo oro ọbọrọde “unana ete ye eka ndinọ ukpep” nte ntak afai ke mme ufọkn̄wed, kot 2 Timothy 3:1-3 nyụn̄ wụt mme edu oro ẹtịpde n̄kpọ in̄wan̄în̄wan̄ ẹsịn ke mfịna emi. Ekem kụbọde ediye uduot ekpri n̄wed Oyom ka ukpepn̄kpọ 8, kot ikpehe ekikere 5, nyụn̄ ka iso ke nneme oro. Edieke afo ekemede ndinịm ini ndifiak n̄ka, ekeme ndidi afo ọtọn̄ọ ndidiọn̄ usụn̄ nnọ ukpepn̄kpọ Bible ye owo oro. Ke mme ediwaha oro ẹditienede, bụp enye m̀mê enye ọdiọn̄ọ owo efen ekededi oro ekpenyenede udọn̄ ndikop se enye ekpepde.
7 Usụn̄ efen ‘ndisịn ifịk nnam nti utom’ ke April edi ndibuana ke nsio nsio ikpehe ukwọrọikọ. Nte afo emekere aban̄a edinọ ikọ ntiense ke itie inemesịt m̀mê itie ubon n̄kpọisan̄? Ke itiembehe bọs m̀mê itie udụk tren? Mîdịghe nte afo akpama ndidomo ndinọ ikọ ntiense ke urụk ukopikọ, ke usụn̄isan̄, m̀mê ke efakutom mbubehe? Ntak mûdomoke mme ekikere ẹmi use ọfiọn̄ emi? Jehovah ayan̄wam fi enyene uko oro oyomde. (Utom 4:31; 1 Thess. 2:2b) Ndusụk afo emekeme ndinịm ini ndisan̄a ye asiakusụn̄ m̀mê asuanetop oro enyenede mbufiọk ke mme ikpehe utom ukwọrọikọ ẹmi.
8 Owo ekededi oro oyomde ndinam n̄kọri ke utom edinọ ikọ ntiense esie oyoyom ndibuana ke utom edinọ ikọ ntiense ido nneme. Ediwak ini n̄kukụre se ẹyomde edi ndibuan owo ke ufan ufan nneme. Kam tọn̄ọ ibuot nneme oro omụmde owo udọn̄, ndusụk adade usụn̄ edisobo oro ẹwụtde ke ikpehe ekikere 6. Domo ndida idem n̄kpri ini oro akpatakde-tak nnam n̄kpọ ke eti usụn̄. Afo emekeme ndida idem minit ition, minit duop, m̀mê minit efịt nnọ ikọ ntiense ido nneme ke usụn̄ oro enyenede ufọn.
9 Ini Nditie N̄kere: Tie kere mme akpan n̄kpọ oro ẹkewụtde ke drama Mbono District “Ntịn̄nnịm Ikọ Abasi” emi osụk okụrede. Drama, oro ibuotikọ ekedide Ndiwụt Esịtekọm Mban̄a Mme N̄kpọ-Akpa eke Spirit Nnyịn, ama anam nnyịn itịm ikere ukpụhọde oro okodude ke ufọt Jacob ye Esau. Esau ọkọdọhọ ete ke imọ inyene ukem udọn̄ oro Jacob enyenede ke mme n̄kpọ eke spirit, edi mme utom Esau ikowụtke ntre. (Gen. 25:29-34) Nso okopodudu ntọt ke emi edi ntem ọnọ nnyịn! Ukem nte Jacob, ẹyak nnyịn iben̄e idem ndisịn̄ede idem, idem ndin̄wana mban̄a edidiọn̄ Jehovah. (Gen. 32:24-29) Ntak mîdaha April ye kpukpru ọfiọn̄ oro ẹditienede inam ifịk nnyịn okop idem, idehede ida utịbe utịbe n̄kpọ-akpa eke spirit nnyịn ke mfefere n̄kpọ?
10 “Akwa usen Jehovah emekpere, emekpere, oyonyụn̄ ọsọp eti-eti.” (Zeph. 1:14) Ana ẹka iso ẹtan̄a eti mbụk Obio Ubọn̄. Uwem ẹdu ke itiendịk! Ọfiọn̄ emi akpakam edi eti ọfiọn̄ ọnọ kpukpru ikọt Jehovah nte nnyịn idianade kiet iwụt nte ke nnyịn ‘imesịn ifịk inam nti utom.’
[Ekebe ke page 4]
Se Ẹtide Owo Ẹban̄a Editi
Usọrọ Editi eke isua emi edi ke Wednesday, April 19. Mbiowo ẹkpenyene ndinọ ntịn̄enyịn ke mme n̄kpọ ẹtienede mi:
◼ Ke ndinịm ini mboho emi, ẹkụt ẹte ke owo idimenke mme n̄kpọ idiọn̄ọ isan̄a ibọhọke ke utịn ama okosụhọde.
◼ Ẹkpenyene nditọt kpukpru owo, esịnede etịn̄ikọ nnennen ini ye ebiet usọrọ emi.
◼ Ẹkpenyene ndinyene nnennen uduot bred ye wine ẹnyụn̄ ẹtịm ẹnịm.—Se Enyọn̄-Ukpeme February 15, 1985, page 19.
◼ Ẹkpenyene ndibabak mmen mme usan, mme akrasi, okpokoro, ye ọfọn̄ okpokoro oro ẹdotde ndi ufọkmbono nnyụn̄ nnịm ke itie.
◼ Ẹkpenyene ndibabak nnam Ufọkmbono Obio Ubọn̄ m̀mê ebiet usopidem en̄wen enen̄ede asana.
◼ Ẹkpenyene ndibabak mmek mme adaidaha ye mme andimen n̄kpọ idiọn̄ọ nsan̄a nnyụn̄ nnọ mmọ item mban̄a nnennen usụn̄ unam n̄kpọ ye utom mmọ.
◼ Ẹkpenyene ndinam ndutịm man ẹmen n̄kpọ idiọn̄ọ ẹsọk owo ekededi oro ẹyetde aran emi edide owo n̄kpọnnam mînyụn̄ ikemeke ndidu do.
◼ Ke ini ẹnamde ndutịm ẹnọ se ibede esop kiet ndida Ufọkmbono Obio Ubọn̄ nnam n̄kpọ, mme esop oro ẹkpenyene ndinam ndutịm nte ọfọnde man ẹfep ndisuana nyọhọ usụn̄otop, mbenusụn̄, ye itie ubon n̄kpọisan̄ nte mîdotke.