Nte Afo ke Ọyọ?
1 “Nnyeneke idatesịt eke okponde akan . . . nditọ mi [ndisan̄a] ke akpanikọ.” (3 John 4) Nditọ John eke spirit ndiyọ ama ada akwa idatesịt ọsọk enye. Enyene ndidi adat Ete nnyịn eke heaven esịt didie ntem ndikụt ediwak miliọn nditọ esie eke ini iso ‘ẹsan̄ade ke akpanikọ’!—N̄ke 23:15, 16; 27:11.
2 Ke adan̄aemi ikọt Abasi ke ofụri ofụri ẹkọbọde ke utom Christian ifịk ifịk, ndusụk ke ẹtek ke ifịk sụn̄sụn̄. Okposụkedi ekemede ndidi mmọ emi ẹma ẹnyene ifịk ke akpa ini oro mmọ ẹkekpepde akpanikọ, nte mme isua ẹbede, mmọ ẹmesụhọde ẹkesịm idaha oro ẹnyenede sụk esisịt m̀mê mînyeneke-nyene ebuana ke utom unam mbet.
3 Nte an̄wan̄ade, ekeme ndidi ndusụk owo ẹsụhọde ubọk ke ntak mmeme ikpọkidem ye mme mfịna usọn̄. Nte ededi, ẹnyene nditoro mmọ ke ediyọ mmọ. Mmọ ke ẹnam se mmọ ẹkemede. Edi owo kiet kiet oro ama akayak uwem esie ọnọ Abasi ekpenyene ndibụp idemesie ete: ‘Nte ami mmowụk ntịn̄enyịn n̄kaha ke mme ọkpọkpọ n̄kpọ tutu mme udọn̄ n̄kpọ Obio Ubọn̄ ẹnyene esisịt itie kpọt ke uwem mi? Nte ami mmakabade ndi “ndebe” ke ndusụk usụn̄, mîdịghe nte ami ke nsịn̄ede idem “ọkpọsọn̄”?’ (Edi. 3:15, 16; Luke 13:24, NW) Kpukpru nnyịn ikpakam ikere ke akam iban̄a se inamde inyụn̄ inam n̄kọri nte oyomde, inyenede ke ekikere nte ke Jehovah ọn̄wọn̄ọ ndinam ‘ubọn̄ ye ukpono ye emem odoro kpukpru owo eke ẹnamde eti ido’ ke idem.—Rome 2:10.
4 Nte Ẹkemede Ndiyọ: Nso ikan̄wam Jesus ndiyọ? Paul ama anam an̄wan̄a ete: “[Enye akabat] bụt ke ekpri n̄kpọ, kaban̄a idatesịt eke anade Enye ke iso; okonyụn̄ osụhọrede etetie ke ubọk nnasia ebekpo Abasi.” (Heb. 12:1-3) Idatesịt oro akanade Jesus ke iso ama enen̄ede okpon akan mme idomo ibio ini oro enye okosobode. Ndinyene idatesịt oro anade nnyịn ke iso ke ekikere ekeme ndin̄wam nnyịn ndiyọ n̄ko. (Edi. 21:4, 7; 22:12) Edieke nnyịn idoride enyịn ke Jehovah ndinọ nnyịn ukeme ebe ke ọkpọkpọ ukpepn̄kpọ, edidụk mme mbono esop kpukpru ini, ye edikọbọ ke akam, nnyịn iyekeme ndisịn ifịk ke utom oro enye ọnọde nnyịn inam.
5 Jehovah adat esịt ke mme anam-akpanikọ ikọt esie ndiyọ. Ntre ẹyak nnyịn inam idatesịt esie okpon ebe ke ndika iso ‘nsan̄a ke akpanikọ.’