Mme N̄kpọutom Oro Ẹnọde Ukpep, Ẹdemerede Udọn̄, Ẹnyụn̄ Ẹsọn̄ọde Owo Idem
1 Mmọ ẹkop odudu ke ndinọ mme owo ukpep mban̄a Bible ye Mme Ntiense Jehovah. Mmọ ẹmedemede ediwak owo udọn̄ ndisọn̄ọ nda nnọ akpanikọ. Mmọ ẹsọn̄ọ mbuọtidem ye esịtekọm ikọt Abasi oro ẹma ẹkeyak idem ẹnọ. Nso ke mmọ ẹdi? Mme vidio oro esop Jehovah osion̄ode. Nte afo emese mmọ mboduop? Ebịghi didie? Nte afo emesida mmọ anam n̄kpọ ke utom ukwọrọikọ fo? Nte afo omotobo ndomokiet? Didie ke afo ekeme ndika iso mbọ ufọn nto utịbe utịbe n̄kpọutom emi?
2 Ibuotikọ Enyọn̄-Ukpeme eke July 1, 1999, “Ẹkpep Ikọ Abasi Kpukpru Ini Nte Ubon” ama otoro “ndisio ubak ini ukpepn̄kpọ mbufo nnịm nnọ edise ikpehe vidio N̄ka oro esịnede ukpepn̄kpọ . . . nnyụn̄ nneme mban̄a enye.” Ke n̄kemuyo ye eti item oro, ẹyeneme nsio nsio vidio ke Esoputom ke ọfiọn̄ kiet kiet ebede. Nnyịn imesịn udọn̄ inọ kpukpru owo ke esop ndise vidio emi ke ufọk mbemiso ẹnemede enye ke Esoputom.
3 Nnyịn itọn̄ọ ke ọfiọn̄ emi ye akpa vidio oro ikosiode, Jehovah’s Witnesses—The Organization Behind the Name. Se nyụn̄ kpan̄ utọn̄ nọ mme ibọrọ mbụme emi:
◼ Ẹnen̄ede ẹdiọn̄ọ Mme Ntiense Jehovah kaban̄a nso?
◼ Ẹbuan kpukpru se ẹnamde ke Bethel ye ewe itien̄wed Abasi?
◼ Ewe ikpehe edinam Bible ke okokụt ẹwụtde, ẹsiode ndise, ẹnyụn̄ ẹyetde ndom man ẹsịn ke n̄wed?
◼ Nso itụk fi kaban̄a usụn̄ nte ẹnamde n̄wed nnyịn?
◼ N̄wed ifan̄ ke N̄ka emịn̄ ọtọn̄ọde ke 1920 esịm 1990?
◼ Mmanie ke otu ikọt Abasi akpan akpan ẹkpenyene ndinam n̄kpọ mbịne ndidot ke utom Bethel?—N̄ke 20:29.
◼ Ke nso usụn̄ ke ubon Bethel enịm ata eti uwụtn̄kpọ ọnọ kpukpru Mme Ntiense Jehovah?
◼ Nso itụk fi iban̄a utom oro ẹnamde ke Bethel man ẹda eti mbụk ẹsọk adan̄a ediwak owo nte ẹkekeme?
◼ Ẹda okụk ke m̀mọ̀n̄ ẹse ẹban̄a utom ofụri ererimbot emi?
◼ Nso utom ke nnyịn ikeme ndinọ ibetedem ifịk ifịk, ndien ye nso edu?—John 4:35; Utom 1:8.
◼ Didie ke afo ese ndutịm oro ọnọde enyịn̄ nnyịn ibetedem?
◼ Didie ke afo ekeme ndida vidio emi nnam n̄kpọ ke utom ukwọrọikọ?
Ke December, nnyịn iyodụn̄ọde vidio oro The Bible—Accurate History, Reliable Prophecy.