Ekebe Mbụme

◼ Didie ke ẹkeme ndin̄wam owo oro mînamke utom aba ke anyan ini ndifiak ndot nte asuanetop eti mbụk?

Ke ini owo oro mînamke utom aba owụtde uyarade nte ke imọ imenyene udọn̄ ofụri esịt ndinam n̄kpọ Jehovah, emi edi ntak idatesịt. (Luke 15:4-6) Eyedi owo emi ama ayak ubiọn̄ọ m̀mê mfịghe uwem ada ini ọkpọkpọ ukpepn̄kpọ, edidụk mbono esop, ye edibuana ke an̄wautom. Didie ke ẹkeme ndinọ ọkpọkpọ un̄wam ke mfọnn̄kan usụn̄ man otodo enye ekeme ndinam n̄kọri eke spirit?

Kpukpru nnyịn ikpenyene ndinam usio-ukot ndiwụt owo emi ata ima Christian oro nnyịn inyenede inọ enye. Mbiowo ẹyenam n̄kpọ usọp usọp ndidiọn̄ọ mme akpan n̄kpọ eke spirit oro enye oyomde. (Jas. 5:14, 15) Edieke editre utom oro ekedide ke ekpri ibio ini, un̄wam otode asuanetop emi enyenede mbufiọk ekeme ndidi n̄kukụre se ẹyomde ndifiak nnam owo oro enyene ifịk ke utom an̄wautom. Nte ededi, edieke owo oro mînamke utom aba mîkabuanake ye esop ke anyan ini, ekeme ndidi oyoyom ẹnọ un̄wam efen efen. Man edemede mbuọtidem ye esịtekọm, ọyọfọn ndinịm ọkpọkpọ ukpepn̄kpọ Bible ye enye ke n̄wed etịmde odot. Ke edide ntre, esenyịn utom ayanam ndutịm man asuanetop oro odotde enịm ukpepn̄kpọ oro. (Heb. 5:12-14; se Ekebe Mbụme ke Utom Obio Ubọn̄ Nnyịn eke November 1998.) Edieke ọfiọkde owo oro oyomde utọ un̄wam oro, tịn̄ nọ esenyịn utom esop mbufo.

Mbemiso ẹdọhọde owo oro mînamke utom aba ke anyan ini abuana ke utom ukwọrọikọ, ọkpọfọn mbiowo iba ndisobo ye enye man ẹkụt m̀mê enye odot nte asuanetop Obio Ubọn̄. Mmọ ẹditiene ukem ndutịm oro ẹsinamde ke ini ẹsobode ye mbufa owo oro ẹyomde ndidot nte asuanetop eti mbụk. (Se Enyọn̄-Ukpeme eke November 15, 1988, page 17.) Akpana owo oro mînamke utom aba enyene ọkpọsọn̄ udọn̄ ndibuana eti mbụk ye mbon efen. Enye n̄ko enyene ndisịm mme akpan n̄kpọ ẹyomde oro ẹwụtde ke n̄wed Utom Nnyịn, page 98-99 onyụn̄ enyene ndidụk mme mbono esop kpukpru ini.

Ndinyene eti edinam eke spirit ofụri ini ayanam ekese ndin̄wam owo oro afiakde edi man ọsọn̄ọ ada onyụn̄ omụm ọsọn̄urua itie ebuana esie ye Jehovah akama, onyụn̄ aka iso ndisan̄a ke usụn̄ nsinsi uwem. (Matt. 7:14; Heb. 10:23-25) Nte mbet Christian, enye ndisịn “ifịk ke ofụri ukeme” nnyụn̄ n̄kọri mme edu Christian oro ẹbịghide ayakpan enye ndifiak ndi ‘enye oro mînamke utom aba m̀mê ananade mfri.’—2 Pet. 1:5-8, NW.