Nte Afo Emesikwọrọ Ikọ ye Uko?
1 Kpa ye oro mme andibiọn̄ọ ẹkemụmde ẹnyụn̄ ẹtịn̄de ikọ ndịghe, Peter ye John ẹma ẹka iso ẹtan̄a etop Obio Ubọn̄ emi ye uko. (Utom 4:17, 21, 31) Nso ke ndikwọrọ ikọ ye uko ọwọrọ ọnọ nnyịn mfịn?
2 Ndinọ Ikọ Ntiense Uko Uko: “Uko” ọwọrọ n̄ko “unana ndịk,” onyụn̄ ọwọrọ “ndinen̄ede mbiere nditre ndikop ndịk, ukeme ediyọ, ye ime.” Ye mme ata Christian, ndikwọrọ ikọ ye uko ọwọrọ unana edikop ndịk nditịn̄ ikọ ini ekededi oro idaha odotde ndibuana eti mbụk ye mbon en̄wen. (Utom 4:20; 1 Pet. 3:15) Enye ọwọrọ nte ke nnyịn idikopke bụt iban̄a eti mbụk. (Ps. 119:46; Rome 1:16; 2 Tim. 1:8) Ntem, uko edi edu oro ẹyomde man inam utom edikwọrọ eti mbụk Obio Ubọn̄ oro ẹdọn̄de nnyịn ima ke utịt ini emi. Enye onụk nnyịn ndibuana eti mbụk ye mme owo ke ebiet ekededi oro ẹkemede ndikụt mmọ.—Utom 4:29; 1 Cor. 9:23.
3 Uko ke Ufọkn̄wed: Nte ntụhọ edikop ndịk m̀mê bụt anam edi ọkpọsọn̄ n̄kpọ ndikwọrọ ikọ nnọ mme nsan̄a ufọkn̄wed fo? Isidịghe mmemmem n̄kpọ ke ndusụk idaha; ke akpanikọ, ekeme ndidi ata n̄kpọ-ata. Nte ededi, Jehovah ọyọsọn̄ọ fi idem edieke afo ọbọn̄de akam eben̄e uko ndikwọrọ ikọ nnọ mbon efen. (Ps. 138:3) Uko ayan̄wam fi ndinam ẹdiọn̄ọ fi nte kiet ke otu Mme Ntiense Jehovah ndinyụn̄ nsọn̄ọ nda mbiọn̄ọ nsahi. Nte utịp, afo ndikwọrọ ikọ ke ufọkn̄wed ekeme ndinyan̄a mmọ emi ẹkopde uyo fo.—1 Tim. 4:16.
4 Uko ke Itieutom: Nte ẹdiọn̄ọ fi nte kiet ke otu Mme Ntiense Jehovah ke itieutom? Ekeme ndidi n̄kukụre usụn̄ emi ẹdikemede ndinọ mme nsan̄autom fo eti mbụk edidi afo ndikwọrọ ikọ nnọ mmọ. Uko fo oyonyụn̄ an̄wam fi n̄ko ndibọ ini nda ndụk mme mbono esop ye ikpọ mbono Christian.
5 Nyene Uko ke Ini Idomo: Edi akpan n̄kpọ ndinyene uko ke ini isobode ubiọn̄ọ. (1 Thess. 2:1, 2) Enye an̄wam nnyịn ndisọn̄ọ mmụm mbuọtidem nnyịn n̄kama ke ini isobode ndịghe, nsahi, m̀mê ata ukọbọ. (Phil. 1:27, 28) Enye ọsọn̄ọ nnyịn idem ndisọn̄ọ nda ke ini isobode mfịghe edibiat nsọn̄ọnda nnyịn ke mme idaha Abasi nnyịn, Jehovah. Enye ọsọn̄ọ nnyịn idem ndidu ke emem ke ini mbon efen ẹdemerede eneni.—Rome 12:18.
6 Se ededi mfịna oro nnyịn isobode ọkpọkpọ, nnyịn ikpakam ika iso isịn ifịk ke ndikwọrọ eti mbụk ye uko.—Eph. 6:18-20.