Ten̄e Jehovah Kpukpru Usen
1 “Uten̄e Jehovah edi editọn̄ọ ifiọk.” (Ps. 111:10) Enye edemede nnyịn ndinam nti utom onyụn̄ an̄wam nnyịn ndiwọn̄ọde n̄kpọn̄ idiọk. (N̄ke 16:6) Uten̄e emi edi ntotụn̄ọ ukpono oro inyenede inọ Andibot nnyịn, onụkde nnyịn ifep ndiyat enye esịt nnyụn̄ nsọn̄ ibuot ye enye. Enye edi n̄kpọ oro oyomde nnyịn ikọri inyụn̄ iwụt kpukpru usen.—N̄ke 8:13.
2 Kpukpru usen, edu ererimbot Satan ẹsinen̄ede ẹfịk nnyịn man itiene ndiọi usụn̄ esie. (Eph. 6:11, 12) Anana-mfọnmma ikpọkidem nnyịn ọyọhọ ye idiọkn̄kpọ onyụn̄ enyene ntụhọ ndinam idiọk nte ido edide. (Gal. 5:17) Ntem, man inịm mbet Jehovah, ikop inemesịt, inyụn̄ idu uwem, nnyịn inyene ndibak enye kpukpru usen.—Deut. 10:12, 13.
3 Ke Mme Hebrew 10:24, 25, ẹteme nnyịn ẹte isop idem ọtọkiet man inọ kiet eken item, inyụn̄ ‘idọdiọn̄ inam ntem,’ ke ini emi nnyịn idude uwem mi. Edidụk mbono esop kpukpru ini edi akpan n̄kpọ edieke anade nnyịn ibọhọ ukperedem ini emi. Mbak oro nnyịn inyenede man ikûyat Abasi esịt onụk nnyịn ndidụk mme mbono esop nnyụn̄ nnen̄ede nda mme uduak mmọ ke akpan n̄kpọ. Mbon oro ẹten̄ede Abasi ẹda edibuana ke mme mbono esop Christian nte edisana ifet.
4 Ndinịm ewụhọ edikwọrọ eti mbụk Obio Ubọn̄ edi usụn̄ en̄wen oro nnyịn iwụtde uten̄e Abasi nnyịn. (Matt. 28:19, 20; Utom 10:42) Akpan utịtmbuba utom ukwọrọikọ nnyịn edi ndin̄wam mbon efen ẹkọri uten̄e Jehovah ẹnyụn̄ ẹsụk ibuot ẹnọ uduak esie. Nnyịn inam emi ebe ke ndinam mme mfiakn̄ka, idomode nditọn̄ọ mme ukpepn̄kpọ Bible, ndien ekem ikpep mbon efen kpukpru item Abasi. Nnyịn ke ntre iwụt uten̄e Jehovah ye ima mbọhọidụn̄ nnyịn.—Matt. 22:37-39.
5 Mbon oro mîten̄eke Abasi ẹkpu ndikọri edu ediwụt esịtekọm nnọ mme n̄kpọ eke spirit, mmọ ẹnyụn̄ ẹyak idem ẹnọ ofụm n̄kpa ererimbot emi, m̀mê edu ukere n̄kpọ esie. (Eph. 2:2) Ọkpọsọn̄ ubiere nnyịn akpakam edi “[ndinọ] Abasi utom eke enemde Enye esịt ke ukpono ye uten̄e.” (Heb. 12:28) Nnyịn ke ntem iyọdọk mme edidiọn̄ ẹnyenede mbon oro ẹten̄ede Jehovah kpukpru usen.