“Yak Un̄wana Mbufo Ayama”
1 Ererimbot emi akande nnyịn okụk odu ke ekịm ke n̄kan̄ eke ido uwem ye ke n̄kan̄ eke spirit. Un̄wana akpanikọ ayarade mme “utom ekịm eke mîn̄wụmke mfri” man ẹkeme ndifep mme akama-n̄kpa n̄kpọ ubiọn̄ọ emi. Mmọdo, apostle Paul ama esịn udọn̄ ọnọ mme Christian ete: “Ẹsan̄a nte nditọ un̄wana.”—Eph. 5:8, 9, 11.
2 “Mfri eke otode un̄wana” edi ata isio ye ekịm ererimbot. (Eph. 5:9b) Man in̄wụm mfri emi oyom ete nnyịn idi n̄wọrọnda uwụtn̄kpọ ke uwem Christian, kpa orụk owo oro Jesus enyịmede. Ana nnyịn n̄ko iwụt utọ edu nte ima ofụri esịt, edinam akpanikọ, ye ifiopesịt inọ akpanikọ. Ikpenyene ndiwụt mfri emi ke uwem ofụri usen nnyịn ye ke utom ukwọrọikọ nnyịn.
3 Yama ke Kpukpru Ifet: Jesus ọkọdọhọ mme mbet esie ete: “Yak un̄wana mbufo ayama ke iso owo.” (Matt. 5:16) Ke ndikpebe Jesus, nnyịn iwụt un̄wana Jehovah ebe ke ndikwọrọ mban̄a Obio Ubọn̄ Abasi ye mme uduak esie. Nnyịn iyama nte un̄wana ke ini nnyịn ikade ufọk mme owo ye ke ini nnyịn isuande akpanikọ ke itieutom, ke ufọkn̄wed, ke otu mme mbọhọidụn̄ nnyịn, m̀mê ke ebiet efen ekededi oro nnyịn inyenede ifet.—Phil. 2:16.
4 Jesus ọkọdọhọ ete ke ndusụk owo ẹyesua un̄wana. (John 3:20) Ntre idem imemke nnyịn ke ini ata ediwak owo ẹsịnde ndiyak “un̄wana gospel ubọn̄ Christ” ayama ọnọ mmọ. (2 Cor. 4:4) Jehovah ọfiọk se idude ke esịt ubonowo inyụn̄ iyomke mme anam ukwan̄n̄kpọ ẹdu ke otu ikọt esie.
5 Ke ini nnyịn itienede mme usụn̄ Jehovah inyụn̄ idarade un̄wana eke spirit, nnyịn imekeme ndinam enye ayama ọnọ mbon efen. Edieke mmọ ẹdiọn̄ọde ebe ke edu uwem nnyịn nte ke nnyịn ‘imenyene un̄wana uwem,’ do ẹkeme ndinụk mmọ n̄ko ndinam ukpụhọde oro ẹyomde man ẹkabade ẹdi mme ọnọ-un̄wana.—John 8:12.
6 Ebede ke ndiyak un̄wana nnyịn ayama, nnyịn ida itoro isọk Andibot nnyịn inyụn̄ in̄wam mbon esịt akpanikọ ẹdi ẹdidiọn̄ọ enye ẹnyụn̄ ẹnyene idotenyịn nsinsi uwem. (1 Pet. 2:12) Sia nnyịn inyenede un̄wana, ẹyak nnyịn ida enye in̄wam mbon efen ẹkụt usụn̄ ediwọrọ n̄kpọn̄ ekịm eke spirit nnyụn̄ nnam utom un̄wana.