Di Okop-Inemesịt Andinanam
1 Jesus ọkọdọhọ ete ke ata ediwak owo ‘idifiọkke’ ini edidu imọ ukem nte ekedide ke eyo Noah. (Matt. 24:37-39) Do, ẹdori enyịn ẹte ke ediwak owo idikpan̄ke utọn̄ inọ eti mbụk Obio Ubọn̄. Nso ikeme ndin̄wam nnyịn ndimụm edu idatesịt n̄kama nte nnyịn inamde utom ukwọrọikọ nnyịn?—Ps. 100:2.
2 Akpa, oyom nnyịn inyene ke ekikere nte ke etop nnyịn ye utom ukwọrọikọ oro ẹnọde nnyịn ndinam ẹto Abasi. Kpa ye mfọnn̄kan ukeme nnyịn, mme owo nditre ndinam n̄kpọ ekededi mban̄a utom ukwọrọikọ enen̄ede edi edisịn Jehovah. Nditi ke edinam akpanikọ nnyịn ke utom ukwọrọikọ enyene unyịme esie ayan̄wam nnyịn ndika iso nnyene idatesịt ye inemesịt esịtidem nte mme anam ikọ Abasi.—Jas. 1:25.
3 Ọyọhọ iba, mme owo ke ẹsụk ẹdodu emi ẹdinyịmede usụn̄ emi Jehovah adade ọnọ edinyan̄a. Okposụkedi n̄wakn̄kan ibat owo ẹkemede ndinana udọn̄, mbon mbieterọn̄ ẹsụk ẹdodu nditan̄ mbok, idem idahaemi, ke ata ata utịt ini emi. Oyom nnyịn ika iso ikwọrọ ikọ, idụkde “obio ekededi m̀mê obio-in̄wan̄ ekededi” ‘ndiyom owo eke odotde ke esịt.’—Matt. 10:11-13.
4 Ka Iso Nyene In̄wan̄ In̄wan̄ Edu: Idiọk mbụk ido ukpono amanam ndusụk owo ikopke inemesịt. Editịm n̄kpọ emi amanam mbon efen ‘ẹdu ke nnanenyịn ẹnyụn̄ ẹsuana.’ (Matt. 9:36) Unana utom, unana nsọn̄idem, ye unana ifụre ẹkeme ndikan ediwak owo ubọk. Ndifiọk emi ayan̄wam nnyịn isịn ifịk ke utom nnyịn. Sịn ukeme nditọn̄ọ nneme emi aban̄ade mme n̄kpọ emi ẹbehede mme owo ke efakutom nnyịn. N̄wam mmọ ẹkụt ke Obio Ubọn̄ Abasi edi n̄kukụre usọbọ. Da N̄wed Abasi ye mme akpan n̄kpọ ẹdude ke n̄wed nam eti mbụk esịm mmọ esịt.—Heb. 4:12.
5 Kpukpru ini mme okop-inemesịt andinam ikọ Abasi ẹsiti emi: “Idatesịt Jehovah [edi] odudu [nnyịn].” (Neh. 8:10) Ufọn idụhe nditaba idatesịt nnyịn. “Edieke ufọk oro odotde, yak emem mbufo odoro ke esịt; edi edieke ufọk oro mîdotke, yak emem mbufo afiak etiene mbufo.” (Matt. 10:13) Jehovah esidemede idatesịt ye odudu nnyịn nte nnyịn ke ime iyọde ke edisana utom esie, ndien enye ọdiọn̄ edinam akpanikọ nnyịn.